ايماقتار • 06 مامىر، 2021

تۇركىستان وبلىسىندا سويلەمدى ەجىكتەپ وقيتىن مۇعالىم ديرەكتوردىڭ قىزى بولىپ شىقتى

2072 رەت كورسەتىلدى

تۇركىستان وبلىسىنىڭ سارىاعاش اۋدانىنداعى مەكتەپتەردىڭ بىرىندە ورىسشا سوزدەردى ەجىكتەپ وقيتىن مۇعالىم بالالارعا ورىس ءتىلى پانىنەن ساباق بەرىپ كەلگەن. ىنتىماق اۋىلىنداعى سادريددين ايني اتىنداعى №1 مەكتەپتە جۇمىس ىستەيتىن مۇعالىم تەستىلەۋدە شەكتى بالدى ارەڭ جيناعان، دەپ حابارلايدى Egemen.kz.بۇل تۋرالى جەرگىلىكتى تەلەارنا حابار تاراتتى. 

جۋرناليستەر ءمان-جايدى انىقتاۋ ءۇشىن مەكتەپكە بارادى. بىراق جۇمىس ۋاقىتىندا ديرەكتور ورنىندا بولماي شىقتى. ديرەكتوردىڭ وقۋ ءىسى جونىندەگى ورىنباسارىنىڭ ايتۋىنشا، ول وتباسىنداعى جاعدايعا بايلانىستى شىعىپ كەتكەن. ال سويلەمنىڭ ءوزىن ەجەلەپ وقيتىن ورىس ءتىلى ءپانىنىڭ مۇعالىمى 1 ناۋرىزعا دەيىن بالا وقىتىپ، دەكرەتتىك دەمالىسقا شىققان. 

«مۇعالىم ديرەكتوردىڭ قىزى ما؟»، دەگەن ساۋالعا ديرەكتوردىڭ وقۋ ءىسى جونىندەگى ورىنباسارى ء«يا»، دەپ جاۋاپ بەردى.

اۋداندىق ءبىلىم بولىمىندەگىلەر مەكتەپتەگى پەداگوگتارعا قاتىستى بارلىق جاۋاپكەرشىلىك ديرەكتورعا جۇكتەلگەنىن ايتتى. مۇعالىمدى جۇمىسقا الۋ نە الماۋ جونىندە شەشىمدى ديرەكتوردىڭ ءوزى عانا قابىلدايدى ەكەن.

«ەگەر دە مەكتەپتە بوس جۇمىس ورنى بولسا، ول جونىندە حابارلاما پورتالدا جاريالانۋعا ءتيىس. وسىدان كەيىن نيەت بىلدىرگەندەر ءوتىنىش جازىپ، تەستىلەۋدەن وتۋىنە بولادى. ال سىناقتان وتپەسە، كەلەسى جولى كەلىپ تاپسىرۋعا مۇمكىندىك بار. سىناقتان وتكەن تالاپ بەرۋشىمەن سۇحبات جۇرگىزىلىپ، ونىڭ قورىتىندىسى بويىنشا ارنايى كوميسسيا مۇشەلەرى مۇعالىمدى جۇمىسقا الۋ، نە الماۋ جونىندە شەشىم قابىلدايدى»، دەپ ءتۇسىندىردى سارىاعاش اۋداندىق ادام الەۋەتىن دامىتۋ ءبولىمىنىڭ باس مامانى زاكير تۇرسىنباەۆ.

بۇل كوميسسيانىڭ توراعاسى – مەكتەپ ديرەكتورى، ال كوميسسيا مۇشەلەرىنىڭ قاتارىندا قوعام بەلسەندىلەرى، اتا-انالار كوميتەتىنىڭ وكىلدەرى بار.

بەلگىلى بولعانداي، سىناقتى مۇعالىم ارەڭ دەگەندە تاپسىرىپ، شەكتى 50 بالدى جيناعان ەكەن. بىراق بىلىكتىلىگى تومەن مۇعالىمنىڭ بالدى قالاي جيناعانىنا قاتىستى دا ساۋال تۋىندايدى. جاۋاپتىلار «مۇعالىمنىڭ ورىس ءتىلى جانە ادەبيەت ءپانى ماماندىعى بويىنشا جوعارى ءبىلىمى بار» دەپ سەندىردى. ال ءتيىستى قۇجاتتى جۇمىس كۇنىنىڭ سوڭىنا دەيىن كورسەتەتىنىن ايتتى.

ەڭ قىزىعى، مۇعالىمنىڭ ساباعىنا اۋداندىق ءبىلىم ءبولىمىنىڭ ماماندارى قاتىسىپ، دەڭگەيىن تەكسەرگەن. مۇعالىمنىڭ بىلىكتىلىگىن تەكسەرگەندەر مەن بۇل وقيعاعا قاتىستى جاۋاپتىلار تۋرالى مالىمەت تۇركىستان وبلىستىق ادام الەۋەتىن دامىتۋ باسقارماسىنا جولداندى.

سوڭعى جاڭالىقتار

«شىڭىراۋ» شىڭعا شىقسىن

ونەر • بۇگىن، 00:18

تىڭ تاسىلدەردىڭ ءتيىمدى تۇسى كوپ

مەديتسينا • بۇگىن، 00:14

پاسپورت

رۋحانيات • كەشە

جەكە پەسا جازۋعا لايىق

رۋحانيات • كەشە

انا مەيىرىمى

قوعام • كەشە

دوللار ارزاندادى

قارجى • كەشە

ۇقساس جاڭالىقتار