ەلورداداعى ابۋ-دابي پلازا ساۋدا ورتالىعىندا كوروناۆيرۋسقا قارسى ۆاكتسينالاۋ جۇمىستارى ۇزدىكسىز ءجۇرىپ جاتىر. بۇگىن سولاردىڭ اراسىندا نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىنىڭ ۇجىمى دا بار.
«ابۋ-دابي پلازا» ساۋدا, ويىن-ساۋىق ورتالىعىنا ۆاكتسينا سالدىرۋعا ارىپتەستەرىمىزبەن كەلدىك. سپۋتيك-V ۆاكتسيناسىن الۋدى ۇيعاردىق. ءبىز كورەرمەندەرمەن تىكەلەي جۇمىس ىستەيمىز. حالىقتىڭ ورتاسىندا جۇرەمىز. سوندىقتان ارتىستەر مەن ونەر ادامدارىنا ءبىرىنشى كەزەكتە ساقتانۋ كەرەك. جان مەن ءتاندى اۋىرتاتىنداي ەشنارسە كورمەدىم. ءوزىمدى جاقسى سەزىنىپ تۇرمىن. قازىرگى كەزەڭدە وركەنيەتتى ەلدەردىڭ كوپشىلىگى, اسىرەسە يزرايل, اقش, ەۋروپا مەملەكەتتەرىنىڭ كوپشلىگى ۆاكتسينا الۋدا العا شىعىپ جاتىر. ءوز كەزەگىندە مەن وتانداستارىمدى ۆاكتسينا سالدىرۋعا شاقىرعىم كەلەدى. وتكەن عاسىردىڭ باسىندا دا وسىنداي ناۋبەتتى كەزەڭدەر بولعان. سودان ادامزات بالاسى نەبىر ۆاكتسينا ويلاپ تاۋىپ, جەڭىپ وتىرعان. مەنىڭ ۇعىمىمدا ۇلتتى, مەملەكەتتى ساقتاۋدىڭ بىردەن-ءبىر جولى – ۆاكتسينا الۋ. ءوزىم ءبىر جىل بۇرىن وسى كوروناۆيرۋسپەن قاتتى اۋىرىپ جازىلعانمىن. سوندىقتان, بيىل ەكىنشى رەت قايتالانباۋى ءۇشىن ەكپە سالدىرىپ وتىرمىن», دەدى ا.ماەميروۆ.
وسى تەاتردىڭ جەتەكشى اكتەرى اسىلحان تولەپوۆ تە «سپۋتنيك V» ۆاكتسيناسىن سالدىردى.
«بۇگىن مەن ءۇشىن ەرەكشە كۇن. ءوزىم تاڭداۋ جاساپ ۆاكتسينا سالدىرايىن دەپ شەشتىم. ءار ادامعا دەنساۋلىق كەرەك. وزىمىزبەن قاتار وزگەلەردى ويلاۋ ماڭىزدى. بىرەۋگە سىن ايتپاس بۇرىن اركىم وزىنەن باستاۋ قاجەت. وتباسىمدا ەڭ ءبىرىنشى بولىپ ۆاكتسينانى مەن قابىلدادىم. مەنىڭ تاڭداۋىم — سپۋتنيك-V ۆاكتسيناسى بولدى. دارىگەرلەر ءبارىن ءتۇسىندىردى. ساقتىق شارالارىنىڭ ءبارىن قاتاڭ ساقتايمىن. ۆاكتسينا الدىم ەكەن دەپ بەتپەردەنى شەشۋگە بولمايدى», دەدى اسىلحان تولەپوۆ.
