تاريحي دەرەكتەرگە ۇڭىلسەك, سادىر شايىق يسلام جولىندا ەڭبەك ەتكەن تۇلعا. جارىقتىق جاڭاقورعان اۋدانىنا قاراستى قوجاكەنت اۋىلى ماڭىنداعى قويلاقى كولىنىڭ جانىنا جەرلەنگەن. شايىق وقىپ, ءبىلىم الۋ ءۇشىن سايرامنان تۇركىستانعا كەلۋى, ودان كەيىن سىر بويىنداعى وزگەنت شاھارىنا باس يمام بولعانى جايلى حالىق اراسىندا اۋىزەكى دەرەك ساقتالعان.
«سوڭعى كەزدە قوجا احمەت ياساۋي بابامىزدىڭ تۋعان-تۋىستارى جايلى دەرەكتەر ىزدەستىرۋ, ونى حالىققا ناسيحاتتاپ, كەلەر ۇرپاققا تولىققاندى مالىمەت قالدىرۋ ماقساتىندا جۇمىس جۇرگىزىپ جاتىرمىز» دەيدى ەكسپەديتسيا جەتەكشىسى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ.
ال سادىر شايىقتىڭ جاڭاقورعانعا قونىس اۋدارۋى تۋرالى ايتار بولساق, ءبىر دەرەكتە قوجا احمەت ءياساۋيدىڭ ۇلى يبراحيم سۇلتان كىسى قولىنان جاستاي قازا تاپقاندىقتان, ەل ىشىندە كەك الۋ قاقتىعىسى تۋماس ءۇشىن حازىرەت تۋعان باۋىرى سادىردى جاڭاقورعان جاققا ءوزى قونىس اۋدارتقان دەيدى.
وسى ساپار بارىسىندا ەكسپەديتسيا مۇشەلەرى سادىر شايىقتىڭ نەمەرەسى ءماۋلانا سافي-اد-دين ورىن قويلاقىنىڭ جانە تۇگىسكەن اۋىلىنداعى اققورعان قورىمىندا جەرلەنگەن ياساۋي جولىن جالعاستىرۋشى اعالى-ءىنىلى ۇسەن شايىق پەن قارا شايىقتىڭ كەسەنەلەرىنە تاعزىم ەتۋمەن قاتار, حح عاسىردىڭ 30-شى جىلدارى ومىردەن وتكەن بايمەن قوجا (بايمۇحاممەد) كەسەنەسىنە دە ات باسىن بۇردى. ساپار بارىسىندا ەل ىشىنەن تىڭ دەرەكتەر مەن اڭىزدار دا جيناقتالدى.
