ەسەپ بەرۋ كەزدەسۋىندە دەنساۋلىق ساقتاۋ ءمينيسترى الەكسەي تسوي سالاداعى نەگىزگى پروبلەمالارعا توقتالدى.
«دەنساۋلىق ساقتاۋ سالاسىندا نازار اۋدارۋ قاجەت كوپتەگەن ماسەلە بار. سالانىڭ بىرقاتار ماڭىزدى كورسەتكىشى تومەندەدى. بۇل ەڭ الدىمەن انا ولىمىنە قاتىستى. سونداي-اق جۇرەك-قانتامىر جۇيەسى اۋرۋلارىنان بولاتىن ءولىم-ءجىتىمنىڭ 15 پايىزعا وسكەنى بايقالدى. مۇنىڭ ءبارى كوروناۆيرۋس ينفەكتسياسىمەن بايلانىستى. وسى پروبلەمالاردى شەشۋ ءۇشىن بۇرىن-سوڭدى بولماعان شارالار قابىلداندى. قىسقا مەرزىم ىشىندە ازاماتتاردىڭ دەنساۋلىعىن ساقتاۋعا باعىتتالعان ايتارلىقتاي كۇش پەن قاراجات جۇمىلدىرىلدى», دەدى مينيستر.
ونىڭ ايتۋىنشا, قازىر دەنساۋلىق ساقتاۋ جۇيەسى ءۇشىن نەگىزگى باعىت – العاشقى مەديتسينالىق-سانيتارلىق كومەكتىڭ قولجەتىمدىلىگى مەن ساپاسىن قامتاماسىز ەتۋ. بۇگىنگى تاڭدا حالىققا مەديتسينالىق قىزمەتتەردى 7 مىڭنان استام امبۋلاتورلىق-ەمحانالىق ۇيىم كورسەتەدى, ونىڭ ىشىندە مەملەكەتتىك – 59%, جەكەمەنشىك – 41%. ۋچاسكەلىك دارىگەردىڭ جۇكتەمەسىن ازايتۋ ءۇشىن 2020 جىلى قوسىمشا جالپى پراكتيكا دارىگەرلەرىنىڭ 480 ۋچاسكەسى اشىلدى. مەديتسينالىق كومەكتىڭ قولجەتىمدىلىگىن قامتاماسىز ەتۋ ماقساتىندا ەل وڭىرلەرىندە 63 امبۋلاتوريالىق-ەمحانالىق نىسان سالىنىپ, پايدالانۋعا بەرىلدى. مەديتسينالىق-سانيتاريالىق العاشقى كومەكتى قارجىلاندىرۋ وتكەن جىلى دەنساۋلىق ساقتاۋدى قارجىلاندىرۋدىڭ جالپى كولەمىنىڭ 52,4%-ىنا دەيىن جەتكىزىلدى. بۇل رەتتە دارىلىك زاتتارعا جازىپ بەرىلگەن جەڭىلدىكتى رەتسەپتىلەر سانى 13,7 ميلليونعا جەتتى.
سونداي-اق ەل حالقى سكرينينگتىك زەرتتەۋلەرمەن قامتاماسىز ەتىلگەن, ولاردىڭ سانى 2020 جىلى 12 ملن زەرتتەپ-قاراۋدى قۇرادى. ناتيجەسىندە, 600 مىڭنان استام اۋرۋ انىقتالدى. قانت ديابەتى, گيپەرتونيا جانە جۇرەك فۋنكتسياسىنىڭ سوزىلمالى جەتكىلىكسىزدىگى سياقتى اۋرۋلارعا قاتىستى باعدارلامانى ىسكە اسىرۋ جالعاسۋدا. 2020 جىلى ديناميكالىق باقىلاۋداعى پاتسيەنتتەردىڭ 55 پايىزى وسى باعدارلاماعا قاتىستى. ۇيدە مەديتسينالىق كومەك كورسەتۋ ءۇشىن موبيلدىك بريگادالاردىڭ سانى 3 700-گە جەتتى, ونىڭ 49%-ى – اۋىلدا. بۇل رەتتە 2020 جىلى ولار 750 مىڭنان استام مەديتسينالىق قىزمەت كورسەتتى. بۇل ۇيدە كۆي جۇقتىرعان ناۋقاستارعا مەديتسينالىق كومەك كورسەتۋدە ماڭىزدى ءرول اتقاردى.
ء«بىز ءۇشىن ەڭ باسىم باعىتتاردىڭ ءبىرى انا مەن بالانى قورعاۋ بولىپ قالا بەرەدى. ستاتيستيكالىق دەرەكتەر بويىنشا 2021 جىلعى 1 قاڭتارداعى جاعداي بويىنشا ەلىمىزدە بالا تۋاتىن جاستاعى 4 ملن 645 مىڭ ايەل ءومىر ءسۇرىپ جاتىر, بۇل 2019 جىلدىڭ ۇقساس كەزەڭىنىڭ كورسەتكىشتەرىنەن 26 مىڭعا ارتىق. جۇكتى ايەلدەردىڭ سانى 436 مىڭعا جۋىق بولدى, ولاردىڭ سانى 2020 جىلى 2019 جىلمەن سالىستىرعاندا 21 مىڭعا ارتتى. سونىمەن قاتار 2020 جىلى بوسانۋ سانى وتكەن جىلمەن سالىستىرعاندا 22 مىڭعا ارتتى. وتكەن جىلى ءتىرى تۋعان بالالار سانى 427 مىڭنان استام ادامدى قۇرادى, بۇل 2019 جىلمەن سالىستىرعاندا 24 مىڭعا جوعارى. مەملەكەت باسشىسىنىڭ تاپسىرمالارىن ىسكە اسىرۋ اياسىندا ءبىز ەكستراكورپورالدى ۇرىقتاندىرۋعا كۆوتالار سانىن 1 105-تەن 2021 جىلى 7 مىڭعا دەيىن ۇلعايتتىق. جىل سايىن حالىققا 7 مىڭ كۆوتا بەرىلەتىنىن ايتا كەتۋ كەرەك. رەسپۋبليكانىڭ 8 قالاسىندا قازىرگى ۋاقىتتا قوسالقى رەپرودۋكتيۆتى تەحنولوگيالار قىزمەتىن ورىندايتىن 27 كلينيكا جۇمىس ىستەيدى, ولاردىڭ 19-ى ءمامس اياسىندا قىزمەت كورسەتەدى», دەدى ا. تسوي.
ەسەپ بەرۋ بارىسىندا بيىل مەديتسينا سالاسىنداعى ەنگىزىلەتىن بىرەگەي تەحنولوگيالار جونىندە ءسوز بولدى. دەنساۋلىق ساقتاۋ جۇيەسىنىڭ ماماندارى جاڭا مەديتسينالىق تەحنولوگيالاردى ىزدەستىرۋ مەن ەنگىزۋدى تۇراقتى نەگىزدە جۇرگىزەدى. قازاقستاندا مەديتسينانىڭ بىرقاتار باعىتى حالىقارالىق دەڭگەيدە تابىستى باسەكەلەسە باستادى. ءبىزدىڭ ەلدە جوعارى تەحنولوگيالى مەديتسينالىق كومەكتىڭ (جتمك) 78 ءتۇرى بويىنشا حالىققا قولجەتىمدىلىك قامتاماسىز ەتىلگەن. بۇل رەتتە 2020 جىلى 10 مىڭعا جۋىق جتمك قىزمەتى كورسەتىلدى. 2011 جىلدان باستاپ ەلىمىزدە ورگانداردى ترانسپلانتاتسيالاۋ تەحنولوگيالارى بەلسەندى ەنگىزىلۋدە. 2020 جىلى 112 ترانسپلانتتاۋ جاسالدى. 2020 جىلى مىناداي بىرەگەي تەحنولوگيالار ەنگىزىلدى. بۇل – 3D باسىپ شىعارۋ تەحنولوگياسى بويىنشا جەكە ۇلگىلەنگەن جاساندى ومىرتقالى پروتەزدى ورناتۋ, باسسۇيەك نەرۆتەرىنىڭ ميكروۆاسكۋليارلىق دەكومپرەسسياسى كەزىندەگى ەندوسكوپيالىق اسسيستەنتسيا.
«2021 جىلى ءبىز تاعى بىرقاتار تەحنولوگيانى يگەرۋدى جانە ەنگىزۋدى جوسپارلاپ وتىرمىز. بۇل – گامما-پىشاق اپپاراتىن قولدانۋمەن ورتالىق جۇيكە جۇيەسى اۋرۋلارىن ەمدەۋدىڭ راديوحيرۋرگيالىق ءادىسى, جۇرەكىشىلىك ستيمۋلياتوردى ترانسكاتەتەرلىك يمپلانتتاۋ. سونىمەن قاتار سەمەي قالاسىندا يادرولىق مەديتسينا ورتالىعىنىڭ قۇرىلىسى اياقتالدى. ورتالىقتىڭ تولىق قىزمەت سپەكترى وسى جىلدىڭ ماۋسىم ايىنان باستاپ كورسەتىلەدى. نازارباەۆ ۋنيۆەرسيتەتى جانىنان بالالار كارديوحيرۋرگيالىق ورتالىعىن اشۋ جوسپارلانۋدا», دەدى مينيستر.
بايانداما بارىسىندا مينيستر بيىل قازاقستاندا وڭالتۋ قىزمەتتەرىنىڭ سانى 800 مىڭعا دەيىن ارتاتىنىن العا تارتتى. رەسپۋبليكادا 610 مەديتسينالىق وڭالتۋ ۇيىمى جۇمىس ىستەيدى, ونىڭ ىشىندە مەملەكەتتىك – 377, جەكە – 233, رەسپۋبليكالىق – 7. تۇڭعىش پرەزيدەنت قورىنىڭ باستاماسىمەن 8 جاڭا وڭالتۋ ورتالىعى اشىلدى. قازىرگى ۋاقىتتا مەديتسينالىق ۇيىمداردا 695 مىڭ مۇمكىندىگى شەكتەۋلى ادام ديناميكالىق باقىلاۋدا تۇر, ونىڭ ىشىندە 95 مىڭى – بالالار. ءمينيستردىڭ مالىمەتىنشە, بۇل ادامدارعا 2020 جىلى 638 مىڭنان استام مەديتسينالىق قىزمەت كورسەتىلدى. 2020 جىلعى 1 قاڭتاردان باستاپ ءمامس جۇيەسىن ەنگىزۋ ارقىلى وڭالتۋ قىزمەتتەرىن قارجىلاندىرۋ 2019 جىلمەن سالىستىرعاندا 1,2 ەسەگە ۇلعايدى جانە 55,7 ملرد تەڭگەنى قۇرادى. 2021 جىلى ءمامس جۇيەسىنە تۇسەتىن تۇسىمدەر ەسەبىنەن وڭالتۋ قىزمەتتەرىنىڭ سانىن 800 مىڭعا جەتكىزۋ, سونداي-اق وسى قىزمەتتەردى قارجىلاندىرۋدى 62 ملرد تەڭگەگە دەيىن ارتتىرۋ جوسپارلانىپ وتىر.
«دارىمەن قامتاماسىز ەتۋدە ىركىلىستەردى بولدىرماۋ ءۇشىن بىرىڭعاي ديستريبيۋتوردىڭ قويمالارىندا سovid-19-دى ەمدەۋگە ارنالعان دارىلىك زاتتاردىڭ 38 پوزيتسياسى بويىنشا 6 ملرد تەڭگەدەن استام سوماعا پرەپاراتتاردىڭ 2 ايلىق قورى ايىنا 60 مىڭ پاتسيەنتتى قامتۋ ءۇشىن قالىپتاستىرىلدى. قازىر زەرتحانالىق پتر-تەستىلەۋدىڭ قۋاتى تاۋلىگىنە 123 مىڭعا دەيىن جەتكىزىلدى. قالالاردا ۋاقتىلى مەديتسينالىق كومەك كورسەتۋ ءۇشىن 16 مودۋلدىك ينفەكتسيالىق اۋرۋحانا سالىندى. 36 مىڭعا جۋىق توسەكتىك ورىن وتتەگىمەن قامتاماسىز ەتىلگەن. مەديتسينالىق ۇيىمداردىڭ وكپەنى جاساندى تىنىستاندىرۋ اپپاراتتارىنا قاجەتتىلىگى تولىق قامتاماسىز ەتىلدى. كوروناۆيرۋس ينفەكتسياسىنىڭ تارالۋىنىڭ بارلىق تاۋەكەلىن ەسكەرە وتىرىپ, ءبىز اۋرۋحانالارداعى ورىن قورىنىڭ دايىندىعىن قامتاماسىز ەتۋ بويىنشا شارالار قابىلدادىق. ەلىمىز بويىنشا ورىنداردىڭ ەڭ جوعارى ىقتيمال سانى 62 مىڭدى قۇرادى, ونىڭ ىشىندە 36 مىڭى – جۇمىس ىستەپ تۇرعان ينفەكتسيالىق ورىن, 3 مىڭنان استامى – رەانيماتسيالىق, 23 مىڭى – رەزەرۆتىك توسەك. ينفەكتسيالىق ورىنداردىڭ جۇكتەمەسى 42 پايىزدى, رەانيماتسيالىق ورىنداردىڭ جۇكتەمەسى 29 پايىزدى قۇرادى», دەدى ۆەدومستۆو باسشىسى.
