«ۆاكتسيناتسيانى ەكى كەزەڭمەن جۇرگىزەدى: ەڭ الدىمەن 0,5 مل دوزادا I كومپونەنتپەن, سودان كەيىن ۆاكتسيناتسيا كۇنىن ەسەپتەمەگەندە 45 كۇننەن كەيىن - 0,5 مل دوزادا II كومپونەنتپەن; بۇل رەتتە 45-ءشى كۇنگە II كومپونەنتپەن ۆاكتسيناتسيا جۇرگىزۋ مۇمكىن بولماعان جاعدايدا (دەمالىس, مەرەكە كۇندەرىنە سايكەس كەلۋ, باسقا ەلدى مەكەنگە شىعۋ جانە باسقالار) ۆاكتسيناتسيانى 90 كۇن ىشىندە جۇرگىزۋگە جول بەرىلەدى; ۆاكتسيناتسيانىڭ وسى كۋرسى 2021 جىلعى 21 ساۋىردەن باستاپ «گام-كوۆيد-ۆاك» ۆاكتسيناسىنىڭ ءبىرىنشى كومپونەنتىن العان ادامدارعا ەنگىزىلەدى», دەپ جازىلعان قاۋلىدا.
قۇجات 2021 جىلعى 3 مامىردا ساعات 00-دەن باستاپ كۇشىنە ەندى. ايتا كەتسەك, بيىل ءساۋىر ايىنىڭ سوڭىندا رەسەيدىڭ ن.گامالەي اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىنىڭ ديرەكتورى الەكساندر گينتسبۋرگ ۆاكتسينالاۋ مەرزىمىنە قاتىستى مالىمدەمە جاسادى. بۇل جايىندا «سپۋتنيكا V» Telegram كانالىندا جاريالاندى.
ء«بىزدىڭ ورتالىقتا دايارلانعان «سپۋتنيك V» ۆاكتسيناسىنا توقتالساق, شەتەلدىك سەرىكتەستەردىڭ سۇراۋى بويىنشا ءتيىستى جاۋاپتى جولدايمىز. وسى ورايدا ولاردىڭ ءوتىنىمى بويىنشا شەتەلدىك نارىقتاردا ۆاكتسينانىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆالدى بۇرىن بەكىتىلگەن ەڭ از ىقتيمال 21 كۇننەن ءۇش ايعا دەيىن ۇلعايتۋعا بولادى دەپ سانايمىز», دەدى الەكساندر گينتسبۋرگ.
عالىمنىڭ ايتۋىنشا, ينتەرۆالدى 21 كۇنىننەن 3 ايعا دەيىن ارتتىرۋ ۆاكتسينا قالىپتاستىراتىن يممۋندىق جاۋاپتىڭ كۇشىنە اسەر ەتپەيدى, سونداي-اق كەيبىر جاعدايدا ونى ۇزارتۋى دا مۇمكىن.
«مۇنداي پايىمعا ۇقساس ادەنوۆيرۋستىق پلاتفورمادا ۆاكتسينالاردى پايدالانۋ تاجىريبەسىنە سۇيەنىپ, سونداي-اق رەسەي مەن شەت مەملەكەتتەردە جاپپاي ۆاكتسينالاۋ بويىنشا تابىستى ناۋقاندار نەگىزىندە كەلىپ وتىرمىز», دەپ ناقتىلادى پروفەسسور. بۇل تۇرعىدا ءاربىر ۇلتتىق رەتتەۋشى ءوز ەركىمەن ءبىرىنشى جانە ەكىنشى كومپونەتتەردى ەگۋ اراسىنداعى ينتەرۆالدى 21 كۇن ارالىقتا قالدىرۋ نەمەسە ونى 3 ايعا دەيىن ۇزارتۋ تۋرالى شەشىمدى قابىلداي الادى. الەكساندر گينتسبۋرگنىڭ ايتۋىنشا, رەسەي تاراپى ءوز اۋماعىندا ۆاكتسينانىڭ ءبىرىنشى جانە ەكىنشى دوزاسى اراسىنداعى ينتەرۆالدى بۇرىنعى مەرزىمدە قالدىرىپ وتىر. وسىنىڭ بارلىعىن ەسكەرە وتىرىپ, جاقىندا كۆي-عا قارسى ۆاكتسيناتسيالاۋ كەستەسىن وزگەرتۋ ماسەلەسى بويىنشا قر باس مەملەكەتتىك سانيتاريالىق دارىگەرى ەرلان قياسوۆ تۇسىنىكتەمە بەردى.
«قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ 2021 جىلعى 30 ساۋىردەگى № 17 قاۋلىسىنا سايكەس «سپۋتنيك V» ۆاكتسيناسىمەن ۆاكتسيناتسيالاۋ كەستەسىنە وزگەرىستەر ەنگىزىلدى. بۇل رەتتە وسى ۆاكتسينانىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆال 45 كۇندى قۇراۋى ءتيىس. ەكىنشى كومپونەنتپەن 45-ءشى كۇنى ۆاكتسيناتسيا جۇرگىزۋ مۇمكىن بولماعان جاعدايدا (دەمالىس, مەرەكە كۇندەرىنە تۇسپا-تۇس كەلۋ, باسقا ەلدى مەكەنگە شىعۋ جانە باسقالارى) ەكپەنى 90 كۇن ىشىندە جۇرگىزۋگە جول بەرىلەدى. ۆاكتسيناتسيا كەستەسىنە قاتىستى بۇل ۇستانىم پروفەسسور, رعا اكادەميگى, گامالەي اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىنىڭ ديرەكتورى ا.گينتسبۋرگتىڭ 2021 جىلعى 22 ساۋىردەگى رەسمي مالىمدەمەسىنە نەگىزدەلگەن», دەدى ە.قياسوۆ.
اتالعان مالىمدەمەگە سايكەس, «سپۋتنيك V» ۆاكتسيناسىنىڭ ءبىرىنشى جانە ەكىنشى كومپونەنتتەرىن ەنگىزۋ اراسىنداعى ينتەرۆالدى ەڭ از ىقتيمال 21 كۇننەن 90 كۇنگە دەيىن ۇلعايتۋعا بولادى جانە ينتەرۆالدى ۇلعايتۋ يممۋندىق جاۋاپتىڭ كۇشىنە اسەر ەتپەيدى.
بۇل حالىقتى يممۋنداۋدى ايتارلىقتاي جىلدامداتۋعا مۇمكىندىك بەرەدى. كەيبىر جاعدايلاردا ينتەرۆالدى ۇزارتۋ ادامنىڭ يممۋندىق رەاكتسياسىنىڭ كۇشى مەن ۇزاقتىعىنىڭ ارتۋىنا اكەلەدى.
