سولتۇستىك قازاقستان وبلىسى توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, 2 مامىر كۇنى پەتروپاۆل ماڭىندا قۇرعاق ءشوپ پەن قامىس ورتەندى. بۇل جونىندە تۇرعىندار 101 نومىرىنە ساعات 13.22 مينۋت كەتكەندە حابارلاپ, بىلعارى زاۋىتى ىقشاماۋدانىندا قۇرعاق ءشوپتىڭ جانىپ جاتقانىن ايتقان. وقيعا ورنىنا وبلىس ورتالىعىنىڭ بىردەن ءۇش ءورت ءسوندىرۋ بولىمشەسى جونەلتىلدى. قاتتى جەلدەن جالىن ءورشىپ, جاقىن ماڭداعى قامىستى شارپىدى, وسىلايشا ءورت 3 گەكتار جەرگە جايىلدى. ماماندار شاعىناۋدانداعى تۇرعىن ۇيلەردى امان الىپ قالۋ ءۇشىن 2 ساعات بويى ارپالىستى. الايدا ءبىر تۇرعىن ءۇي مەن ەكى قورا-قوپسى جانىپ كەتتى. ءورت تەك ساعات 17.16 مينۋت كەتكەندە عانا تولىق ءسوندىرىلدى. قازا تاپقاندار مەن زارداپ شەككەندەر جوق.
