عىلىم • 30 ءساۋىر، 2021

قازاقستاندىق عالىمدار ءبىر ۋاقىتتا 5 ءتۇرلى ۆاكتسينا ازىرلەپ جاتىر

72 رەت كورسەتىلدى

بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ عالىمدارى كوروناۆيرۋسقا قارسى ۆاكتسينانىڭ بەس ءتۇرىن ازىرلەپ جاتىر. ينستيتۋتتىڭ باس ديرەكتورى كۇنسۇلۋ زاكاريا QazVac-تان وزگە ءتورت ۆاكتسينانىڭ قازىر قانداي ساتىعا شىققانىن ايتتى، دەپ حابارلايدى Egemen.kz قازاقپاراتقا سىلتەمە جاساپ.

«عالىمدار ءبىر ۋاقىتتا بەس ءتۇرلى پلاتفورمادا بەس ءتۇرلى ۆاكتسينا ازىرلەپ جاتىر. QazCOVID-in نەمەسە QazVac تۋرالى ءبارىن بىلەسىزدەر دەپ ويلايمىن. ەكىنشىسى – سۋبۋنيتتىك ۆاكتسينا. بۇگىنگى تاڭدا ول بيولوگيالىق قاۋىپسىزدىك ماسەلەلەرى ينستيتۋتىنىڭ بازاسىندا جانۋارلارعا ەگىلىپ، كلينيكاعا دەيىنگى كەزەڭنەن تولىق ءوتتى. دارىلىك زاتتاردى ساراپتاۋ ۇلتتىق ورتالىعىندا مەملەكەتتىك ساراپتامادان دا ءساتتى ءوتتى. ولار دا وڭ قورىتىندىسىن بەردى. ەندى اتالعان سۋببىرلىكتى ۆاكتسينا كلينيكالىق زەرتتەۋدىڭ ءبىرىنشى كەزەڭىنە شىعادى»، دەدى كۇنسۇلۋ زاكاريا.

ينستيتۋتتىڭ باس ديرەكتورى وزگە ۆاكتسينالار تۋرالى دا ايتتى.

«بىزدە ءبىر مەزگىلدە ەكى ۆەكتورلىق ۆاكتسينا ازىرلەنۋدە. بىرەۋى تۇماۋ ۆەكتورى نەگىزىندە، ەكىنشىسى ۆيرۋستىڭ كاپريپوكس ۆەكتورىندا جاسالدى. قازىر بۇل ەكى ۆاكتسينا جانۋارلارعا ەگىلىپ، كلينيكاعا دەيىنگى سىناقتاردان ءوتىپ جاتىر. ۆاكتسينانىڭ بەسىنشى ءتۇرى – ء«تىرى» ۆاكتسينا. ءبىز الەمدە ءبىرىنشى بولىپ السىرەتىلگەن ۆاكتسينانى الۋعا تىرىسامىز. جۇزدەن استام سىنامانىڭ ىشىنەن ىرىكتەپ الدىق. جۋىق ارادا ونى دا جانۋارلارعا ەگىپ، كلينيكاعا دەيىنگى زەرتتەۋگە شىعارامىز»، دەدى كۇنسۇلۋ زاكاريا.

عالىمنىڭ ايتۋىنشا، ازىرلەنىپ جاتقان ءتورت ۆاكتسينانى ساقتاۋ تەحنولوگياسى QazCOVID-in (QazVac) ۆاكتسيناسىنان وزگەشە بولادى.

سوڭعى جاڭالىقتار

ۇقساس جاڭالىقتار