اۋانىڭ تەمپەراتۋراسى -40 گرادۋستان اسقان كەزدەر باسقا جىلدارعا قاراعاندا ءجيى بولدى. مىنە, وسى قىس تا اياقتالىپ, جىلىتۋ ماۋسىمى توقتاتىلدى.
قالا اكىمى بولات جۇمابەكوۆتىڭ ايتۋىنا قاراعاندا قالانىڭ جىلۋ جۇيەسىنە قارايتىن 4,5 مىڭ عيماراتتىڭ, ونىڭ ىشىندە الەۋمەتتىك سالانىڭ 188 ءۇيىنىڭ بىردە-بىرىندە سۋى قاتقان نەمەسە قۇبىرى جارىلعان سياقتى شەكتەن شىققان اپاتتى جاعداي بولعان جوق. بۇعان قىسقا دايىندىقتىڭ مۇقيات جۇرگىزىلگەندىگىنىڭ ارقاسىندا قول جەتكىزىلگەن. جىلۋ جۇيەلەرىندە 51 زاقىمدانۋ جوندەلىپ, 230 شاقىرىمدىق بىتەلگەن قۇبىرلار اۋىستىرىلعان.
بىراق تۇرعىن ۇيلەردىڭ سۋىقتىعىنا شاعىم ايتىلعان 167 ارىز تۇسكەن. ولاردىڭ ءبارى دە ءوز ۋاقىتىندا تەكسەرىلىپ, ءتيىستى شارالار قولدانىلعان. ماسەلەن, جامبىل كوشەسىندەگى 123 ءۇيدىڭ تۇرعىندارى اقپان ايىندا ۇيلەرىنىڭ سۋىقتىعىن ايتىپ شاعىمدانعان. تەكسەرىس بارىسىندا پيك جىلىتۋ قۇبىرلارىن تازالاماعانى, قىسقا دايىندىق پاسپورتىن الماعاندىعى انىقتالعان. سونىڭ كەسىرىنەن ۇيگە ىستىق سۋ تولىق جەتپەگەن. پيك-ءتىڭ توراعاسى تۇرعىنداردىڭ وزدەرىنە كىنا ارتىپ, پاتەر اقىسىن تولەمەي, 1,5 ملن تەڭگە قارىز بولىپ وتىرعاندارىن ايتقان.
قالانىڭ كوممۋنالدىق قىزمەتتەرى جارتى كۇننىڭ ىشىندە بويى تاتتانىپ, جىلۋ وتكىزبەي جاتقان قۇبىرلاردى اۋىستىرعان.
بۇل جۇمىستى پيك توراعاسى اتقارۋى ءتيىس بولعانىمەن, ءوز كاسىپتەرىنە سالعىرتتىق تانىتقان.
ۇيلەردىڭ جىلۋ جۇيەلەرىنەن ىستىق سۋدىڭ وتۋىنە كەدەرگى بولاتىن تاعى ءبىر سەبەپ – قۇبىرلاردى اۋىستىرعاندا بالانستىق تالاپتىڭ ساقتالمايتىندىعى كورىنەدى. اتاپ ايتقاندا, جەرتولەلەردى جوندەگەندە پيك-تەر ۇلكەنىرەك ديامەترلى قۇبىردىڭ ورنىنا باعاسى ارزان دەپ جىڭىشكەسىن ورناتقان. ال بۇدان بالانس ساقتالماي, سىرتتان كەلگەن ىستىق سۋ ەركىن جۇرە الماي قالادى. سونىڭ كەسىرىنەن ۇيلەرگە دە ىستىق كۇيىندە جەتپەيدى ەكەن. نەگىزىنەن وسىنداي جاۋاپسىزدىقتاردىڭ سالدارىنان ۇيلەردىڭ تەمپەراتۋراسى سۋىقتاۋ بولعان.
«جالپى العاندا پەتروپاۆلدىڭ جىلۋمەن قامتىلۋى بيىلعى قىستا شتاتتىق رەجىمدە بولدى», دەگەن قالا اكىمى بولات سەرىك ۇلى جاڭا ماۋسىمعا دايىندىق بويىنشا اتقارىلاتىن جۇمىستار تۋرالى دا ايتتى.
سونىڭ ىشىندە «جاس وركەن», «سولنەچنىي» سياقتى جاڭا شاعىناۋدانداردا جىلۋ جۇيەلەرى كۇشەيتىلەتىنىن جەتكىزدى.
پەتروپاۆل
