شەبەردىڭ ايتۋىنشا, كيىز ءۇيدىڭ ۇلكەنى 38, قوسالقى ۇشەۋى 24 قانات, جەراستى بولىگى – تۇعىرىمەن قوسا ەسەپتەگەندە بيىكتىكتەرى تيىسىنشە 16,5 جانە 15 مەتر كولەمىندە بولادى.
– بۇلار كادىمگى كيىز ۇيلەر. تەز قۇراستىرىلادى, ءارى ءتۇرلى تابيعي توتەنشە جاعدايلارعا دا توتەپ بەرە الادى. كوپتەن ويىمدا جۇرگەن شارۋا ەدى. ونىڭ ناقتى ىسكە اسىرىلاتىن كەزى كەلگەن سياقتى, – دەيدى ول. – ۆيزيتتىك ورتالىققا لايىقتالعان كيىز ءۇي كەشەنىنىڭ اۋماعى 1400 شارشى مەتردى قۇرايدى, جىلۋ جۇيەسىمەن قامتاماسىز ەتىلەدى. استىڭعى ءبىرىنشى قاباتىنا قويما, اسحانا, جىلۋ ورتالىعى سەكىلدى شارۋاشىلىق قۇرىلىمدار, ەكىنشى قاباتىنا قوناقۇي, كافە بار ورنالاستىرىلادى. «حان سارايى» باسقا وڭىردە ەمەس, 2000 جىلدان استام تاريحى بار كونە دە جاڭا قالا تارازدا ەڭسەسىن تىكتەسە, قۇبا-قۇپ بولار ەدى. الداعى ۋاقىتتا جانىبەك پەن كەرەي حاندار ەسكەرتكىشىنىڭ ماڭىنان بوي كوتەرگەلى جاتقان ەتنواۋىلعا ورنالاستىرىلۋى مۇمكىن. بولماسا مەركى شيپاجايىنا, تەكتۇرماس ەتنوتاريحي كەشەنى اۋماعىنا قويسا دا بولادى.
ءبىر اتاپ وتەرلىگى, كيىز ۇيلەرگە تابيعاتتىڭ وزگەرۋ قۇبىلىسىنا قاراي بەيىمدەلگىش قوس شاڭىراق ورنالاستىرىلىپتى. ولاردىڭ نەگىزگى تىرەك-تايانىشى ءدال ورتاسىنا سامۇرىق قۇستىڭ جۇمىرتقاسى – التىن ءتۇستى شار ورنالاسقان بايتەرەك-ۇستىن بولماق.
جوباسى ءتيىستى تاراپتاردان قولداۋ تاۋىپ, قۇرىلىسى قولعا الىنىپ جاتسا, بۇل شىن مانىندە دە گيننەستىڭ رەكوردتار كىتابىنا كىرەتىن-اق دۇنيە-اۋ.
بايماحانبەت احمەت,
جۋرناليست
تاراز
