سپورت • 30 ءساۋىر، 2021

كەلەسى قارسىلاسى – «بارسەلونا»

18 رەت كورسەتىلدى

بۇل كۇندەرى سەربيانىڭ زادار قالاسىندا فۋتزالدان ەۋروپانىڭ ەڭ ۇزدىك سەگىز كومانداسىنىڭ قاتى­سۋىمەن چەمپيوندار ليگاسىنىڭ فينالدىق كەزەڭى ءوتىپ جاتىر. ايتۋلى دودادا وسى جارىستا ەكى مارتە توپ جارعان الماتىنىڭ «قايرات» كلۋبى دا باق سىناۋدا. «قايراتتان» بولەك بيىلعى دوپ دوداسىنا چەمپيوندار ليگاسىنىڭ ءۇش دۇركىن جانە ەڭ كەيىنگى چەمپيونى «بارسەلونا» (يسپانيا)، بەس دۇركىن جەڭىمپازى «ينتەر» (يسپانيا)، سونىمەن قاتار وسى تۋرنيردە ءبىر مارتەدەن توپ جارعان پور­تۋگاليانىڭ «سپورتينگ» جانە «بەن­فيكا»، رەسەيدىڭ «گازپروم-يۋگرا»، تۋرنيرگە ەكىنشى مارتە قاتى­سىپ جاتقان كپرف (رەسەي) پەن سلو­ۆەنيالىق دەبيۋتانت – «دوبوۆەتس» كوماندالارى قاتىسىپ جاتىر.

ءتۋرنيردىڭ جەرەبەسى بويىنشا «قايرات» شيرەك فينالدا چەمپيوندار ليگاسىنىڭ 2010 جىلعى جەڭىمپازى پورتۋگاليانىڭ «بەنفيكا» كومانداسىمەن كەزدەسىپ، وسى جىلعى جارىستىڭ شىمىلدىعىن اشتى. تاجىريبەلى ەكى كوماندا اراسىنداعى ماتچتىڭ تارتىستى وتكەنى سونشالىق، جەڭىمپاز كوماندا قوسىمشا تايمدا انىقتالدى. ءبىرىنشى تايمنىڭ العاشقى 15 مينۋتىنا دەيىن قارسىلاستار ءبىر-ءبىرىنىڭ قاقپاسىنا بىرنەشە رەت قاۋىپتى شابۋىل ۇيىمداستىرعانىمەن، گول سوعا المادى. تەك 16-مينۋتتا قازاقستاندىق كلۋب ساپىنان گادەيا ەسەپ اشىپ، مەرگەندىگىمەن كوزگە ءتۇستى. دەگەنمەن جەرلەستەرىمىزدىڭ قۋانىشى ۇزاققا سوزىلمادى. «بەنفيكا» ساپىنان جەزۋش افونسۋ جىلدام قارىمتا گول سالىپ، تارازى باسىن تەڭەستىرىپ كەتتى.

ماتچتىڭ ەكىنشى كەزەڭىندە قارسىلاس كوماندا ويىنشىلارى بەلسەندىرەك بولعانىمەن، كەزدەسۋدىڭ 30-مينۋتىندا ەدسون «بەنفيكا» قاقپاسىن ءدال كوزدەپ، «قايراتتى» قايتادان ەسەپتە العا شىعاردى. ەكىنشى گولدان كەيىن جەرلەستەرىمىز قاقپاشى اۋىستىرۋعا ءماجبۇر بولدى. ويتكەنى دوپتى قايتارا­مىن دەپ ابايسىزدا قارسىلاس ويىنشىعا اياعى ءتيىپ كەتكەن يگيتانى تورەشى ەكىنشى سارى قاعازبەن جازالاپ، الاڭنان قۋدى. ءسويتىپ الاڭنان كەتكەن يگيتانىڭ ورنىن 19 جاستاعى نارۋن سەرىكوۆ باس­تى. قاقپاشى اۋىسقاننان كەيىن پسيحو­لو­گيالىق باسىمدىققا جانە ەكى مينۋت ءبىر ويىنشىعا ارتىق ويناعان «بەنفيكا»  قانشا تورۋىلداسا دا، سەرىكوۆتىڭ شەبەر­لىگىنىڭ ارقاسىندا قاقپاعا گول سوعا المادى. دەگەنمەن ويىنشى سانى تەڭەسكەن تۇستا پورتۋگاليالىقتار ءبارىبىر قاقپادان ساڭلاۋ تاۋىپ، ەسەپتى تاعى دا تەڭەستىرىپ كەتتى. گولدىڭ اۆتورى – تياگۋ بريتۋ.

نەگىزگى كەزەڭ 2:2 ەسەبىمەن تەڭ اياقتالىپ، ويىن 5 مينۋتتان ەكى وۆەرتايمعا ۇلاستى. ءبىرىنشى قوسىمشا كەزەڭنىڭ سوڭعى مينۋتىندا داۋرەن تۇرساعۇلوۆ كومانداسىنىڭ ءۇشىنشى گولىن سوقسا، ەكىنشى وۆەرتايمنىڭ العاشقى مينۋتىندا «قايرات» ساپىنان گادەيا پەنالتيدى ءساتتى ورىنداپ، ءدۋبلدىڭ اۆتورى اتاندى. اراعا ءۇش مينۋت سالىپ فەرناندينو ەسەپتى 5:2-گە جەت­كىزسە، ماتچتىڭ سوڭعى مينۋتىندا ءبىرجان ورازوۆ ويىننىڭ نۇكتەسىن قويدى. بۇل جەردە ءبىرجاننىڭ ءۇش بىردەي «بەنفيكا» ويىنشىسىن قاپى قالدىرىپ، قاقپانى ءدال كوزدەگەنىن ايتا كەتكەن ءجون. وسىلايشا «قايرات» 6:2 ەسەبىمەن جەڭىسكە جەتىپ، جارتىلاي فينالعا جولداما الدى.

ەندى جەرلەستەرىمىز ەرتەڭ وتەتىن ال­عاش­قى جارتىلاي فينالدا يسپانيانىڭ ازۋلى كومانداسى – «بارسەلونامەن» كەزدەسەدى. ءوز كەزەگىندە ءتۋرنيردىڭ ءدال قازىرگى چەمپيوندارى شيرەك فينالدا سلوۆەنيالىق «دوبوۆەتس» كلۋبىن ەش قيىندىقسىز 2:0 ەسەبىمەن جەڭدى. «بارسەلونا» ساپىنان ويىننىڭ 9-مينۋتىندا فەرراو، 12-مينۋتىندا ايكاردو مەرگەندىك تانىتتى.

«قايرات» پەن «بارسەلونا» اراسىنداعى ماتچ سەنبى كۇنى نۇر-سۇلتان ۋاقىتىمەن 22:00-دە باستالادى. جالپى يسپانيالىق كلۋبقا قارسى وتەتىن ويىن كاكا شاكىرتتەرى ءۇشىن وڭايعا سوقپايىن دەپ تۇر. ويتكەنى چەمپيوندار ليگاسىنىڭ فينالدىق كەزەڭىندە ەكى كوماندا ءۇش مارتە كەزدەسىپ، ۇشەۋىندە دە جەرلەستەرىمىز باسىم تۇسكەن. اتاپ ايتار بولساق، الماتىنىڭ كلۋبى 2013 جانە 2015 جىلعى جارتىلاي فينالدا كاتالونيا كومانداسىن جارىستان شىعارىپ جىبەرسە، 2015 جىلى پورتۋگاليادا وتكەن ءتۋرنيردىڭ فينالىندا «قايرات» «بارسەلونانى» 3:2 ەسەبىمەن قاپى قالدىرىپ، چەمپيوندار ليگاسىن جەڭىپ العان بولاتىن. ەندى مىنە، ءتورتىنشى كەزدەسۋدە «بارسەلونا» فۋتزالشىلارى «قايراتتان» قالايدا ەسە قايتارۋدى كوزدەيتىنى انىق. بىراق ءبىزدىڭ جىگىتتەر قانداي جاعدايدا دا قارسىلاسقا جەڭىستى وڭاي بەرە سالمايتىنىن كەشەگى شيرەك فينالداعى ويىن دالەلدەپ بەردى.

سونداي-اق كەشەگى شيرەك فينالدا «ينتەر» (يسپانيا) – «گازپروم-يۋگرا» (رەسەي) جانە «سپورتينگ» (پورتۋگاليا) – كپرف (رەسەي) كوماندالارى كەزدەستى. جارتىلاي فينال ويىندارى 1 مامىردا، فينال باسەكەسى 3 مامىردا وتەدى دەپ جوسپارلانعان.

 

سوڭعى جاڭالىقتار

شىمكەنتتە كارانتين كۇشەيتىلەدى

ايماقتار • بۇگىن، 15:47

اتوم كولگە ساپار

ايماقتار • بۇگىن، 15:37

قازاقستاندا جاڭا تەلەارنا اشىلدى

قازاقستان • بۇگىن، 11:55

ۇقساس جاڭالىقتار