پاندەميا جاعدايىنا قاراماستان ءۇشىنشى مەگاپوليستە اعزا الماستىرۋ وتاسى قارقىندى دامۋدا.
بۇل تۋرالى شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ ءباسپاسوز بريفينگىندە مالىمدەدى.
باسقارما باسشىسىنىڭ ايتۋىنشا, شىمكەنت ءبىرىنشى ترانسپلانتاتسيا ورتالىعىنا اينالماق.
– شىمكەنت قالاسىنداعى №1 قالالىق كلينيكالىق اۋرۋحاناسىندا وتكىزىلگەن ترانسپلانتاتسيا حيرۋرگيالىق تاجىريبەدە ۇنەمى قولدانىلىپ كەلەدى. سونداي-اق, وسى جىلى شەتەلدىك ارىپتەستەرىمىزبەن بىرگە تۋىستىق باۋىر ترانسپلانتاتسياسى بويىنشا 2 ماستەر-كلاسس وتكىزدىك. سوڭعى جىلدارى ەلىمىزدە ترانسپلانتولوگيا دامي باستادى. وزدەرىنىڭ جاقىندارىنا دونور بولعان ءساتتى وتالار وسىنى دالەلدەيدى. بولاشاقتا شىمكەنت ترانسپلانتاتسيا ورتالىعىنا اينالادى, – دەدى ب.پوزيلوۆ.
ايتا كەتەيىك, شىمكەنت قالاسىنداعى №1 قالالىق كلينيكالىق اۋرۋحاناسىندا 2016 جىلدان بەرى اعزا الماستىرۋ وتاسى جاسالىپ كەلەدى. بۇگىنگە دەيىن قالادا 166 بۇيرەك جانە 24 باۋىر الماستىرۋ وتاسى جاسالعان.
