جالپى, اسسامبلەيا جايلى ءارتۇرلى پىكىر ايتىلىپ جاتادى. بىراق باسقا پوستكەڭەستىك ەلدەرگە قاراعاندا ءبىز – 30 جىلدىڭ ىشىندە ىشكى سوعىستى كورمەگەن, ەتنوتسيدكە, ەتنوسەپاراتيزمگە جول بەرمەگەن كوپەتنوستى حالىق, بەيبىت مەملەكەت ەكەنىمىزدى ەشكىم بەكەرگە شىعارا المايدى.
ءيا, تۇرمىستىق قاقتىعىستار قاي ەلدە بولسىن ۇشىراسادى. ءتۇرلى ەتنوس وكىلدەرى اراسىنداعى جەكە تارتىستار دا ءار مەملەكەتتە بار. بىراق ءبىز سونداي داۋ-دامايلاردى جەكەتۇلعالىق دەڭگەيدەن جالپىۇلتتىق دەڭگەيگە شىعارمادىق. قوعامدىق كەلىسىم مودەلىمىزدى بۇۇ, ەقىۇ, باسقا دا ۇلكەن مارتەبەسى بار ۇيىمدار مويىنداعان. تەك ىشكى تۇراقتىلىعىمىزدىڭ جانە وسىنداي ۇيىمداردىڭ جوعارى باعاسىنىڭ ارقاسىندا قازاقستانعا شەتەلدىك ينۆەستيتسيالار كەلىپ تۇسۋدە. قازاقستاندى بۇكىل الەم قۇرمەتتەيدى. ۇلگى رەتىندە جاھاندىق الاڭداردا ءبىزدىڭ ەلىمىز تۋرالى ءسوز قوزعالادى. كەيبىرەۋلەر تاۋەلسىزدىگىمىز بەن ىشكى كەلىسىمىمىزدى دۇرىس باعالامايدى, ولاردىڭ قادىر-قاسيەتىن جەتە تۇسىنبەيدى. ءبىز 30 جىلدىڭ ىشىندە شەكارامىزدى بەكىتتىك. جاڭا ساياسي جانە ەكونوميكالىق ينستيتۋتتاردى قۇردىق.
ال ەڭ باستىسى – ءبىز ەگەمەن ەلىمىزدى قۇردىق! ءدال قازىر ءبارىمىز ءۇشىن تاۋەلسىزدىكتەن اسقان باقىت جوق. بارلىق جەڭىسىمىز – ەگەمەندىگىمىزدىڭ ارقاسى. ال جاڭا ەگەمەن مەملەكەتىمىزدىڭ قالىپتاسىپ, ورلەپ-ءوسۋى ەلباسىمىزدىڭ ەرەن ەڭبەگىمەن تىكەلەي بايلانىستى. جىلى كوفەينيادا كاپۋچينو ءىشىپ, تەگىن ۆايفاي مەن سوڭعى سمارتفون ارقىلى وتكەن داۋىرگە ءتۇرلى «ساياسي باعا» بەرۋگە بولادى. ويتكەنى ءبىز – دەموكراتيالىق مەملەكەتپىز. ءسوز بوستاندىعىمىز بار. بىراق سىناۋدىڭ ورنىنا, ءبارىمىز ناقتى ىسپەن ەلىمىزدىڭ دامۋىنا ۇلەس قوسساق, بىرنەشە جىلدىڭ ىشىندە تاريحتا كورمەگەن جەڭىسكە جەتەمىز دەپ كامىل سەنەمىن.
جالپى, كەشە قازاقستان حالقى اسسامبلەياسىنىڭ تاريحي سەسسياسى ءوتتى. ەندى وسىدان 25 جىل بۇرىن قۇرىلعان ماڭىزدى ينستيتۋتتى پرەزيدەنتىمىز قاسىم-جومارت توقاەۆ باسقاراتىن بولدى. اسسامبلەيانىڭ نەگىزىن قالاۋشى, الەمگە تانىمال «بەيبىتشىلىك پەن كەلىسىم» مودەلىنىڭ اۆتورى, ەلباسىمىز نۇرسۇلتان نازارباەۆقا قحا-نىڭ «قۇرمەتتى توراعاسى» قۇرمەتتى اتاعى بەرىلدى. بۇل دا ينستيتۋتىمىز جىلناماسىنىڭ جاڭا مەجەسى دەپ ايتۋعا بولادى. بەيبىتشىلىك پەن دوستىق – بوس, ابستراكتىلى سوزدەر ەمەس. بۇل – ءبىزدىڭ ۇلكەن دە ورتاق ەڭبەگىمىز. سوندىقتان ءبىز, تاۋەلسىزدىك جاستارى, قوعامدىق كەلىسىمدى نىعايتۋ جولىندا بار كۇش-جىگەرىمىزدى سالۋعا دايىنبىز.
ماكسيم سپوتكاي,
«جاڭعىرۋ جولى» جاستار قوزعالىسىنىڭ توراعاسى
