جاقىندا مۇمكىندىگى شەكتەۋلى بولسا دا ەل قاتارلى جۇمىس ىستەپ وتىرعان مامانمەن تىلدەسۋدىڭ ءساتى ءتۇستى. اتى-ءجونى ەربول ەسكەنوۆ ەكەن. وسىندا جۇمىس ىستەگەنىنە ەكى جىلداي ۋاقىت بولىپتى. نەگىزگى ماماندىعى – تەحنيك-باعدارلاماشى. «فيزيكالىق مۇمكىندىگىمنىڭ شەكتەۋلى بولۋى جۇمىس ىستەۋگە ەشقانداي دا كەدەرگى ەمەس. ويتكەنى مۇگەدەكتىك ماسىلدىق ەمەس, جۇمىس ىستەۋگە ءبارىمىز تالپىنۋىمىز كەرەك. قايتا ۇيدە وتىرعان ادام اۋرۋعا بەرىلىپ, ءوزىن-ءوزى مۇجىگىش كەلەدى. ال ۇجىمدا جۇمىس ىستەسەڭ, بارلىق قيىندىقتى ۇمىتىپ, ۋاقىتتىڭ قالاي وتكەنىن بىلمەي قالاسىڭ», دەيدى ەربول.
جالپى, الەۋمەتپەن جۇمىس ىستەيتىن سالادا قىزمەت ەتۋ – وڭاي ەمەس. اسىرەسە حالىققا قىزمەت كورسەتۋ ورتالىعىنىڭ قىزمەتكەرى بولۋ ءۇشىن جاۋاپكەرشىلىك پەن توزىمدىلىك كەرەك. ويتكەنى مۇندا حالىق سان سالالى ماسەلەلەرمەن كەلەدى. سولاردىڭ ىشىندە سابىرسىزدىق تانىتىپ, بىردەن اشۋعا بەرىلەتىندەر دە بارشىلىق. «كوپشىلىكتىڭ كوڭىلىنەن شىعۋ ءۇشىن الدىمەن ءوزىڭ سابىرلى بولۋىڭ كەرەك. جىلى سويلەسەڭ, بايىپپەن تۇسىندىرسەڭ, بارىمەن ءتىل تابىسۋعا بولادى. مەن باستاپقىدا كىرەبەرىستە جۇرتشىلىققا كەڭەس بەرىپ وتىردىم. حالىق ماعان مۇسىركەۋشىلىكپەن قاراپ, حقكو-نىڭ شىن قىزمەتكەرى ەكەنىمە سەنە قويمادى. قانشا كەڭەس بەرىپ تۇرسام دا كوزىمەن باسقا ماماندى ىزدەپ تۇراتىن. قازىر كوزدەرى ۇيرەنگەن سياقتى. مەنىمەن كادىمگى مامانمەن سويلەسكەندەي سويلەسەدى, بۇل مەنىڭ دە مارتەبەمدى بيىكتەتە ءتۇستى» دەيدى ە.ەسكەنوۆ.
قازىر ەربول «ناتيجە» ازاماتتاردىڭ وتىنىشتەرىن قابىلداۋدىڭ بىرىڭعاي ورتالىعى» قاناتقاقتى جوباسىمەن جۇمىس ىستەپ جاتىر ەكەن. بۇل جوبا پرەزيدەنت قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە قولعا الىنعان. بيىلعى شىلدە ايىنان باستاپ, بارلىق مەملەكەتتىك مەكەمەگە «ە-ءوتىنىش» اقپاراتتىق جۇيەسىن ەنگىزۋ جوسپارلانىپ وتىر. جوبانىڭ تيىمدىلىگى سول, جۇرتشىلىق ارىز-شاعىمىن ارقالاپ, ءارتۇرلى مەملەكەتتىك مەكەمەگە بارىپ جۇرمەيدى. رەسمي ورگاندارعا باعىتتالعان ءوتىنىشىن, شاعىمىن حقكو-عا قالدىرىپ كەتسە بولعانى, ءارى قارايعى جۇمىستى وسى ورتالىقتىڭ ماماندارى رەتتەيدى. وتىنىشكە جاۋاپتى دا يەلەرى وسى ورتالىقتان الىپ كەتەدى, ياعني حالىقتىڭ ۋاقىتى ۇنەمدەلەدى ءارى مەملەكەتتىك مەكەمەنىڭ ارىز-شاعىمعا جاۋاپ بەرۋ مەرزىمى قىسقارادى. «بۇل – حالىقتىڭ وتىنىشتەرىنە قاتىستى پروتسەستەردى تسيفرلاندىرۋعا ارنالعان اقپاراتتىق جۇيە. پايداسى بار. ماسەلەن, مەملەكەتتىك ورگاندار اراسىندا ساۋالدار سانىن وڭتايلاندىرۋعا, سونىڭ ەسەبىنەن ەلدىڭ وتىنىشتەرىن قاراۋ مەرزىمىن قىسقارتۋعا مۇمكىندىك بەرەدى. ال ءبىز ءوتىنىشتى قاراۋدىڭ بارلىق ساتىسى مەن ۋاقىتى جونىندە ءوتىنىش يەسىنە اقپارات بەرىپ وتىرامىز. جاڭا جوبا مەملەكەتتىك مەكەمەلەردىڭ جۇمىسىن باعالاۋعا دا جول اشادى», دەيدى مامان. وسى جوباعا قاتىستى حقكو ماماندارىن وقىتۋ جۇرگىزىلىپ جاتىر. ەربول دا سولاردىڭ قاتارىندا. «مۇنداي حالىققا ءتيىمدى جوبالار كوبىرەك قولدانىسقا ەنگىزىلسە, جۇمىس تا جەڭىلدەي تۇسەر ەدى» دەيدى ول.
جالپى, «ازاماتتارعا ارنالعان ۇكىمەت» كورپوراتسياسىندا ەربول سياقتى ەرەكشە قاجەتتىلىگى بار 831 ادام جۇمىس ىستەيدى ەكەن. كورپوراتسيانىڭ ءباسپاسوز قىزمەتىنىڭ جەتەكشى مامانى اسەل ميزامقىزىنىڭ مالىمەتىنشە, «ازاماتتارعا ارنالعان ۇكىمەت» مۇقتاج جاندارعا قاتىستى قىزمەتتەرگە ءجىتى كوڭىل بولەدى. «ماسەلەن, مۇگەدەكتىكتى بەلگىلەۋگە بايلانىستى قىزمەتكە قول جەتكىزۋ ءۇشىن ازاماتتار بۇرىن ەكى مەكەمەنى ارالاپ, 67 قۇجات جيناۋعا ءماجبۇر ەدى. قازىر مەديتسينالىق-الەۋمەتتىك ساراپتامانىڭ شەشىمى بىردەن ەلەكتروندى ۇكىمەتتىڭ پورتالىنا قويىلادى دا, وسى مالىمەتكە سايكەس مەملەكەتتىك كورپوراتسيا جاردەماقى تاعايىندايدى, ال جەرگىلىكتى اتقارۋشى ورگان قاجەتتى كومەكتەردى كورسەتەدى. كورپوراتسيا مۇقتاج جاندارعا قولايلى جاعداي جاساپ قانا قويماي, ولاردى جۇمىسقا الۋ ماسەلەسىنە دە ۇلكەن ءمان بەرىپ كەلەدى. قازىرگى تاڭدا كورپوراتسيادا جۇمىس ىستەيتىن مۇگەدەك جانداردىڭ ءبارى دە وزدەرىن ەڭبەكقور, جاۋاپتى دا ساۋاتتى مامان رەتىندە تانىتتى», دەيدى اسەل.
قازىرگى تاڭدا حالىققا قىزمەت كورسەتۋ ورتالىقتارىندا پاندۋستار, شاقىرۋ تەتىكتەرى, تاكتيلدى جولدار, جەڭىلدىك تەرەزەلەرى مەن برايل تاقتايشالارى قاراستىرىلعان. فرونت-وفيستەردە مۇمكىندىگى شەكتەۋلى جاندارعا قىزمەت كورسەتەتىن ارنايى «جەڭىلدىك تەرەزەلەرى» بار. ال 1,2 - توپتاعى مۇگەدەكتەر حقكو-عا كەلمەي-اق, 1414 نومىرىنە قوڭىراۋ شالىپ نەمەسە gov4c.kz سايتىندا ءوتىنىش قالدىرىپ, قىزمەتكەرلەردى ۇيىنە شاقىرتا الادى. سوڭعى بەس جىل ىشىندە 206 092 مەملەكەتتىك قىزمەت مۇقتاج ادامداردىڭ ۇيىنە بارىپ كورسەتىلگەن ەكەن.
1411-الەۋمەتتىك-اقپاراتتىق ورتالىعى مۇقتاج كىسىلەرگە كەڭەس بەرىپ قانا قويماي, مورالدىق تۇرعىدا دەمەۋ دە كورسەتەدى. وپەراتورلاردىڭ ايتۋىنشا, ەرەكشە قاجەتتىلىگى بار جاندار مەملەكەتتىك قىزمەتتەر بويىنشا كەڭەس الۋ ءۇشىن عانا ەمەس, سىرلاسىپ, مۇڭىن شاعۋ ءۇشىن دە حابارلاسادى ەكەن. «ونداي كەزدە ءبىز ازاماتتاردىڭ اڭگىمەسىن بايىپەن تىڭداپ, شەرىن تارقاتۋعا مۇمكىندىك بەرەمىز. جاندارىنا جىلۋ سىيلار سوزدەر ايتىپ, مورالدىق قولداۋ كورسەتۋگە تىرىسامىز», دەيدى ماماندار.
