ۇكىمەت باسشىسى تۇپقاراعان اۋدانىندا ءساۋىر ايىندا پايدالانۋعا بەرىلگەن «اقتاۋ اگرو» جشس قۇس فابريكاسىنا باردى. كاسىپورىننىڭ قۋاتتىلىعى جىلىنا 5 مىڭ توننا تاۋىق ەتىن قۇرايتىن ينكۋباتور تسەحى, وندىرىستىك كەشەنى جانە قۇس سويۋ تسەحى بار. قۇس فابريكاسى ماڭعىستاۋ وبلىسىنىڭ ىشكى نارىعىنىڭ قۇس ەتىنە قاجەتتىلىگىن 50% قامتاماسىز ەتۋگە مۇمكىندىك بەرەدى. ءونىمنىڭ ءبىرىنشى پارتياسىن وسى جىلدىڭ ماۋسىم ايىنىڭ سوڭىندا ءوڭىردىڭ ساۋدا سورەلەرىنە جەتكىزۋ جوسپارلانۋدا.
ينۆەستيتسيالاردىڭ جالپى كولەمى 5,1 ملرد تەڭگەنى قۇرايدى. كاسىپورىندا 90-نان استام تۇراقتى جۇمىس ورنى اشىلدى.
سونداي-اق پرەمەر-مينيستر مۇنايلى اۋدانىندا 85 گا اۋماقتا سالىنىپ جاتقان «Aktau Green House» جشس جىلىجاي كەشەنىنىڭ قۇرىلىس جوباسىمەن تانىستى. جوبا 2 كەزەڭدە جۇزەگە اسىرىلادى. ءبىرىنشى كەزەڭدە ينۆەستيتسيا كولەمى 26 ملرد تەڭگەنى قۇرايدى. بيىلعى جەلتوقسان ايىنا قاراي كاسىپورىندا 180-نەن استام جۇمىس ورنى قۇرىلادى, ال ءوندىرىس كولەمى جىلىنا 8 مىڭ توننا كوكونىستى قۇرايدى. ەكىنشى كەزەڭدە – 2022 جىلدىڭ سوڭىنا قاراي جۇمىس ورىندارىنىڭ سانى 430-عا دەيىن, ال جىلىجاي كەشەنىنىڭ قۋاتى 13 مىڭ توننا ونىمگە دەيىن ۇلعايتىلادى.
ۇكىمەت باسشىسى حالىقارالىق اۋەجايدان اقتاۋ كۋرورتتىق ايماعىنا دەيىنگى جولدى رەكونسترۋكتسيالاۋ, رەسپۋبليكالىق ماڭىزى بار «جەتىباي – قۇرىق» اۆتوموبيل جولىن كۇردەلى جوندەۋ بارىسىن, سونداي-اق وڭىردەگى باسقا دا اۆتوجول جوبالارىنىڭ ىسكە اسىرىلۋىن تەكسەردى.
ا. مامين اقتاۋ قالاسىنىڭ تۋريستىك ينفراقۇرىلىمىنىڭ قۇرىلىس الاڭدارىن — تاقىرىپتىق ويىن-ساۋىق پاركىن, گولف-كلۋبىن, اپارتامەنتتەر مەن جالپى سانى 600-دەن استام ءنومىرى بار Fairmont, Hilton, Aqualina Resort برەندتەرىنىڭ قوناق ۇيلەرىن ارالادى.
ۇكىمەت باسشىسى جوسپارلانعان نىساندار قۇرىلىسىنىڭ ۋاقىتىلى ءارى ساپالى اياقتالۋىن قامتاماسىز ەتۋدى تاپسىردى.
سونداي-اق جۇمىس ساپارى اياسىندا پرەمەر-مينيستر «ياسين» مەديتسينالىق ورتالىعىندا بولىپ, ءوڭىر تۇرعىندارىن كوروناۆيرۋس ينفەكتسياسىنا قارسى ۆاكتسينالاۋ بارىسىمەن تانىستى.
