شۇكىر, سوڭعى جىلدارى پاۆلودار قالاسىنداعى بىرنەشە كوشەنىڭ اتاۋى قازاقشالاندى. بۇل جان-جاقتى جۇرگىزىلگەن جۇيەلى جۇمىستىڭ جەمىسى ەكەنى ايتپاسا دا تۇسىنىكتى. ەندى بىرتىندەپ اتاۋى تۇسىنىكسىز ءارى وزەكتىلىگىن جويعان اۋدان-اۋىل اتاۋلارىن قازاقىلاندىرۋ قاجەت. قازاقىلاندىرعاندا دا جاڭادان اتاۋ ويلاپ تابۋدىڭ قاجەتى جوق. تەك بۇرىنعى قازاقى اتاۋلارىن قايتارساق بولعانى.
جالپى, اۋدان-اۋىل اتاۋلارىن وزگەرتۋدە پاۆلودار وبلىسىنىڭ وزىندىك تاجىريبەسى بار. ماسەلەن, 2018 جىلى وڭىردەگى ەكى اۋداننىڭ اتاۋى قازاقشالاندى. ۇزاق جىلدار بويى لەبياجى اتانىپ كەلگەن اۋدانعا ءوزىنىڭ بايىرعى اتاۋى – اققۋلى قايتارىلدى. سول سەكىلدى كاچير اۋدانى تەرەڭكول دەپ وزگەردى. بۇل اۋماق اۋەلدە تەرەڭكول بولىسى دەپ اتالعان. مىنە, تاۋەلسىزدىكتىڭ ارقاسىندا كونە اتاۋ كوپشىلىكپەن قايتا قاۋىشتى.
سول سەكىلدى سوڭعى جىلدارى بىرنەشە اۋىلدىڭ اتاۋى وزگەرگەنىن جاقسى بىلەمىز. اتاپ ايتقاندا, 2019 جىلى اقسۋ قالاسىنا قاراستى «پۋت يليچا» ەلدى مەكەنى «ەڭبەك» دەگەن قازاقى اتاۋعا يە بولدى. سونىمەن قاتار پاۆلودار اۋدانىنداعى «كراسنوارمەيكا» اۋىلى «كەمەڭگەر» دەپ وزگەرتىلدى. تيىسىنشە, اۋىلدىق وكرۋگتىڭ اتاۋى دا قازاقشالانىپ, «كەمەڭگەر اۋىلدىق وكرۋگى» اتاندى. ماي اۋدانىنداعى «قىزىل وكتيابر» ەلدى مەكەنى «اباي» دەپ وزگەردى.
بۇل الداعى ۇلكەن جۇمىستىڭ باسى عانا. ويتكەنى ءبىزدىڭ وڭىردە ءمانسىز-ماعىناسىز اتاۋلاردان ءالى ارىلماعان اۋىلدار وتە كوپ. اتاۋى ء«بىرتۇرلى» ەكى اۋدان بارى تاعى راس. ولار – ۋسپەن جانە جەلەزين اۋداندارى. نەگىزىنەن, اتاۋى قازاقشا ەمەس اۋىلداردىڭ دەنى اتالعان ەكى اۋدانعا تيەسىلى. ماسەلەن, جەلەزين اۋدانىن الايىق. بۇل اۋداندا 12 اۋىلدىق وكرۋگ بار. سونىڭ جەتەۋىنىڭ اتاۋى قازاقشالانباعان. مىسالى, پريرتىشسك, وزەرنىي, نوۆومير, ميحايلوۆ, لەسنوي, ۆەسەلوروششين, باشماچين اۋىلدىق وكرۋگتەرىنىڭ اتىن قازاقشالايتىن ۋاقىت جەتتى. اتالعان وكرۋگتەرگە قارايتىن اتاۋى قازاقشالانباعان ەلدى مەكەندەردى دە ەستەن شىعارماۋ كەرەك. جەلەزيننەن بولەك, ۋسپەن, تەرەڭكول, شارباقتى, پاۆلودار سەكىلدى اۋدانداردىڭ اۋماعىنداعى وزگە تىلدەگى اتاۋلاردان كوز سۇرىنەدى.
اۋىل-اۋدان اتاۋلارىن قازاقىلاندىرۋعا مەملەكەتتىك تۇرعىدان ءمان بەرىلۋى كەرەك دەپ ەسەپتەيمىن. ۋاقىتتىڭ ءوزى بىزدەن وسىنى تالاپ ەتىپ وتىر. ونىڭ ۇستىنە قازىر جەرگىلىكتى تۇرعىندار دا مۇنداي ورىندى وزگەرىستەرگە تۇسىنىستىكپەن قارايدى ءارى بارىنشا قولداۋعا تىرىسادى. ال ونوماستيكا ماسەلەسىنىڭ ەل گازەتى «ەگەمەندە» ءجيى كوتەرىلۋى جاقسىلىققا باستايدى دەپ سەنەمىن.
سوتسيال ايتەنوۆ,
حالىقارالىق «قازاق ءتىلى» قوعامى پاۆلودار وبلىستىق فيليالىنىڭ قۇرمەتتى توراعاسى, قازاقستاننىڭ قۇرمەتتى ءجۋرناليسى
پاۆلودار
