ۇجىمدىق مونوگرافيادا ينستيتۋتتىڭ يتاليالىق ارحەولوگتارمەن بىرلەسكەن «ارحەولوگيالىق كونتەكستەگى سارىارقانىڭ كيەلى لاندشافتى: گەنەزيس, تيپولوگيا, سەمانتيكا» جوباسى بويىنشا عىلىمي-زەرتتەۋ جۇمىسىنىڭ ناتيجەلەرى كورسەتىلگەن. بۇل – سارىارقانىڭ اۋماعى كيەلى كەڭىستىك رەتىندە قاراستىرىلاتىن العاشقى ەڭبەك. سارىارقا ءوڭىرى باي مۇراعا يە جانە ءتول تاريحىمىزداعى الار ورنى ايرىقشا. ينستيتۋت جۇمىسىنىڭ عىلىمي-زەرتتەۋ ناتيجەلەرى جانە اقمولا, ەسىل جاعالاۋى ارحەولوگيالىق جۇمىستارىنىڭ 20 جىلدىق كەزەڭىندە الىنعان جاڭا ماتەريالداردىڭ اۋقىمى تاريحي ينتەرپرەتاتسيالار دەڭگەيىنە شىعۋعا جانە سارىارقانىڭ دالاسىن قازاق مەملەكەتتىلىگىنىڭ قالىپتاسۋىنىڭ ەتنوستىق اۋماعى رەتىندە ۇسىنۋعا مۇمكىندىك بەرەدى.
«تۇساۋكەسەرگە مۋزەي مەن مادەنيەت وكىلدەرى كەزدەيسوق شاقىرىلعان جوق. سەبەبى بۇل جۇمىس مۋزەيلەردىڭ عىلىمي-زەرتتەۋ قىزمەتى ءۇشىن ۇستەل كىتابىنا اينالۋى كەرەك. ءبىزدىڭ مىندەتىمىز ءاربىر قازاقستاندىق ءوڭىردىڭ تاريحىن ءبىلۋى, اتا-بابالارىمىز قالدىرعان باي مۇرانىڭ اۋقىمىن ءتۇسىنۋى ءۇشىن وتاندىق عالىمداردىڭ زەرتتەۋ ماتەريالدارىن جۇرتشىلىققا جەتكىزۋ. بۇگىندە «بوزوق» تاريحي-مادەني ورتالىعى عالىمداردىڭ عىلىمي ىزدەنىستەرى ءۇشىن تۇراقتى جۇمىس ىستەيتىن ءتۇرلى فورماتتاعى ديالوگ الاڭىنا اينالدى. ءبىز ينستيتۋتتىڭ زەرتتەۋلەرى جۇرتشىلىق اراسىندا سۇرانىسقا يە بولاتىنىنا سەنىمدىمىز», دەدى ك.اقىشەۆ اتىنداعى ارحەولوگيا عىلىمي-زەرتتەۋ ينستيتۋتىنىڭ ديرەكتورى مارال حابدۋلينا.
تۇساۋكەسەرگە جەتەكشى ارحەولوگتار, ەتنولوگتار, بارلىق ءوڭىردىڭ مۇراجاي قىزمەتكەرلەرى, سونداي-اق عىلىمي-زەرتتەۋ ينستيتۋتتارىنىڭ قىزمەتكەرلەرى قاتىستى. دوڭگەلەك ۇستەل بارىسىندا مونوگرافيا اۆتورلارى م.حابدۋلينا سارىارقا – قازاقستاننىڭ كيەلى ورتالىعى تاقىرىبىندا, اتالعان ءوڭىردىڭ ارحەولوگياسىن زەرتتەۋدەگى حالىقارالىق ىنتىماقتاستىق تاجىريبەسى بويىنشا جان لۋكا بونورا, ينستيتۋتتىڭ دالا باعىتتارى جونىندە د.تلەۋعابۇلوۆ, قاراوتكەلدىڭ قالانىڭ كيەلى نىسانى رەتىندە ۆ.كوشمان بايانداما جاسادى.
