«وبلىسىمىزدا كۆي جۇقتىرۋشىلار قارقىنى ءوسىپ بارادى. وتكەن اپتادا 308 جاعداي تىركەلسە, وسى سوڭعى اپتادا 394 جاعداي انىقتالدى. 26 ءساۋىر, ياعني بۇگىننەن باستاپ وبلىسىمىز «قىزىل ايماققا» ەندى. وبلىس ىشىندە پاۆلودار قالاسى, پاۆلودار جانە ماي اۋداندارى «قىزىل ايماقتا». باياناۋىل اۋدانى عانا «جاسىل ايماقتا», دەدى زامزاگۇل دوسجانوۆا.
زامزاگۇل دوسجانوۆا وبلىستاعى ەپيدەميولوگيالىق جاعداي 5 كۇن بويى باقىلاناتىنىن ايتتى. 5 كۇن ىشىندە جاعداي ۋشىقسا, كارانتيندىك شەكتەۋ شارالارى كۇشەيتىلەتىن بولادى.
«جاعداي ۋشىقسا, كارانتين تالاپتارى قالاي كۇشەيتىلەتىنىن دايىنداپ قويدىق. الەۋمەتتىك ۇيىمدار جابىق تۇردە جۇمىس ىستەيدى. تاماقتانۋ ورىندارى ساعات 9-20:00 ارالىعىندا, 30 ادامنان اسىرماي جۇمىس جاسايدى. پاۆلودار-اقسۋ باعىتىنان باسقا, اۋدان ارالىق جولاۋشىلار تاسىمالى توقتاتىلادى. دەمالىس كۇندەرى مونشا, ساۋنالار جۇمىس جاسامايدى. جابىق ەمەس بازارلار جەكسەنبى كۇندەرى, جابىق بازارلار سەنبى, جەكسەنبى كۇندەرى جابىلادى. كەڭسەلەردە ۇجىمنىڭ 80 پايىزى قاشىقتىقتان جۇمىس جاساۋعا كوشەدى», دەدى زامزاگۇل دوسجانوۆا.
سونىمەن قاتار كارانتين كۇشەيتىلسە, ازىق-ت ۇلىك دۇكەندەرى ساعات 20:00-گە دەيىن ىستەيدى. ال تەاتر, كينوتەاترلار جۇمىستارى توقتايدى.
سپيكەردىڭ ايتۋىنشا, وقۋشىلار اراسىندا دا كۆي جۇقتىرۋشىلار سانى وسكەن. جىل باسىنان بەرى وقۋشىلار اراسىندا 1573 ادام كۆي جۇقتىرعان.
«ولاردىڭ ىشىندە 428 وقۋشى مەكتەپتەرگە بارىپ وقىعان بولسا, 1145 وقۋشى قاشىقتىقتان ءبىلىم العان. تەك ءساۋىر ايىندا 101 وقۋشىدان كۆي انىقتالدى. ال, جىل باسىنان بەرى 259 مەكتەپ جاسىنا دەيىنگى بالالار اراسىندا كۆي تىركەلدى. وقۋشىلار سانىنىڭ ءوسۋى مەكتەپتەردە الەۋمەتتىك قاشىقتىقتىڭ, بەتپەردە تاعۋ رەجيمىن ساقتاماۋدان بولۋى مۇمكىن», دەدى زامزاگۇل دوسجانوۆا.
ايتا كەتەيىك, پاۆلودار وبلىسىندا وسى ۋاقىتقا دەيىن 20225 ادامنان كۆي انىقتالعان. وتكەن تاۋلىكتە 75 ادام كوروناۆيرۋس جۇقتىرعان.
