الماتى وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە, وقيعا 24 ساۋىرگە قاراعان ءتۇنى بولعان. شالقار اۋىلىنىڭ 62 جاستاعى تۇرعىنى زارداپ شەككەن.
«تەكسەرۋ بارىسىندا قاسكەلەڭنىڭ 29 جاستاعى تۇرعىنى انىقتالدى. ونى ۇستاۋ بويىنشا جەدەل ىزدەستىرۋ ءىس-شارالارى ءجۇرىپ جاتىر. بۇل فاكت «ادام ولتىرۋگە وقتالۋ» ارەكەتى رەتىندە تىركەلدى. ءىستىڭ سەبەپتەرى مەن ءمان-جايى انىقتالادى. وزگە اقپارات جاريا ەتىلمەيدى», دەدى الماتى وبلىستىق پوليتسيا دەپارتامەنتىنىڭ ءباسپاسوز قىزمەتى.
دارىگەرلەر زارداپ شەككەن ادامنىڭ سول اياعىن وق تەسىپ وتكەنىن ايتتى. ول شامامەن ساعات 23:00-دە قاراساي اۋداندىق ورتالىق اۋرۋحاناسىنا جەتكىزىلگەن. ەر ادامنىڭ جاعدايى وتە اۋىر.
وبلىستىق قوعامدىق دەنساۋلىق ساقتاۋ باسقارماسىنىڭ وكىلى: «ناۋقاس رەانيماتسيا بولىمىنە ءتۇستى. ول سول جاق اياعىنان جارالانعان. سول جاق جىلىنشىگىنە وق تيگەن. اياعىنىڭ ەكى سۇيەگىنىڭ جوعارعى بولىگى سىنعان. جالپى جاعدايى وتە اۋىر. جاساندى تىنىس الدىرۋ اپپاراتىندا جاتىر», دەپ اتاپ ءوتتى.
