جالپى, ەكسپورت 9 پايىزعا, اقشاعا شاققاندا 892,6 ملن دوللارعا وسسە, يمپورت 1,7 پايىزعا – 2,1 ملرد دوللارعا قىسقارعان. وداق ەلدەرىنىڭ ىشىندە رەسەيمەن اراداعى تاۋار اينالىمى ەڭ جوعارى كورسەتكىشكە يە: 2,7 ملرد دوللار. ودان كەيىنگى ورىندا 112,4 ملن دوللار تاۋار اينالىمى كورسەتكىشىمەن بەلارۋس تۇر. قازاقستاننىڭ بەلارۋس ەلىمەن ساۋدا-ساتتىعى بىلتىرمەن سالىستىرعاندا 17 پايىزعا وسكەن. تيىسىنشە, قىرعىزستانمەن اراداعى تاۋار اينالىمى 109,8 ملن, ارمەنيامەن تاۋار اينالىمى 2,3 ملن دوللاردى قۇرايدى.
ەكسپورتتىڭ دا باسىم بولىگى رەسەيگە جونەلتىلەدى: 795,9 ملن دوللار. 2020 جىلمەن سالىستىرعاندا 10,7 پايىز ءوسىم بايقالادى. ال يمپورت 1,9 ملرد دوللاردى قۇرايدى. بۇل رەتتە 2020 جىلدىڭ قاڭتار-اقپانىمەن سالىستىرعاندا يمپورت كولەمى 2,3 پايىزعا ازايعان. بەلارۋسقا ەكسپورت 15,1 ملن دوللاردى قۇراسا, قىرعىزستانعا جىبەرىلگەن ءونىم كولەمى 80,3 ملن دوللار مولشەرىندە. قازاقستاننان ارمەنياعا 1,3 ملن دوللاردىڭ ءونىمى جەتكىزىلگەن.
قازاقستان وداق ەلدەرىنە نەگىزىنەن تەمىر رۋداسى مەن پروكاتتى ەكسپورتتاسا, بۇل ەلدەردەن اۆتوكولىك, تابيعي گاز, تەمىر جانە بولات شىبىقتارى يمپورتتالعان. ساۋدا جانە ينتەگراتسيا ءمينيسترى باقىت سۇلتانوۆتىڭ ايتۋىنشا, رەسەيدە اشىلعان قازاقستاننىڭ ساۋدا وكىلدىگى بيزنەس-كەلىسىمشارتتاردى جولعا قويىپ, وتاندىق ءونىمدى تاسىمالداۋعا, ساتۋعا كومەكتەسەدى.
– وتكەن جىلى تاۋار اينالىمىنىڭ جالپى قۇلدىراۋىنا قاراماستان, رەسەيگە اگروونەركاسىپ ونىمدەرىنىڭ ۇلكەن جەلىسىنىڭ ەكسپورتىن ۇلعايتۋعا مۇمكىندىك تۋدى. نەگىزگى ءوسىم قازاقستاندىق جەتكىزۋشىلەر مەن رەسەيلىك ساۋدا جەلىلەرىنىڭ «توعىسۋىنا» بايلانىستى. رەسەيدىڭ ءىرى جەلىلەرىنە تەك 85 265 توننا كوكونىس پەن جەمىس جەتكىزىلدى. ءدال وسى اگروونەركاسىپتىك كەشەن ءونىمى ساۋدا جەلىلەرىنىڭ سۇرانىسىنداعى يمپورتتالاتىن ءونىمنىڭ بارلىق كولەمىنىڭ 70 پايىزىن قۇرايتىنىن ناقتىلايمىن. مەن ءوز تاۋارلارىن رەسەيگە ەكسپورتتاۋعا مۇددەلى بارلىق قازاقستاندىق تاۋار وندىرۋشىلەردى ءبىزدىڭ ماسكەۋ نەمەسە قازان قالالارىنداعى ساۋدا وكىلدىگى بولىمشەسىمەن بايلانىسۋعا شاقىرامىن, – دەيدى مينيستر.
سوڭعى ۋاقىتتا ەاەو اياسىنداعى قازاقستاننىڭ ءرولى تۋرالى ءجيى ءسوز بولىپ ءجۇر. حالقىنىڭ كوپتىگى جانە ەكونوميكالىق الەۋەتىنىڭ بەرىكتىگىنە بايلانىستى وداقتاعى رەسەيدىڭ ۇلەس سالماعى بارىنەن جوعارى بولىپ تۇرعانى بەلگىلى. بۇعان وراي ب.سۇلتانوۆ ءوز پىكىرىن ايتادى.
– زاماناۋي حالىقارالىق ەكونوميكادا جەكەلەگەن ەلدەردىڭ نارىعى ءۇشىن ەمەس, جەكەلەگەن وڭىرلىك ساۋدا بىرلەستىكتەرىنىڭ نارىعى ءۇشىن بەلسەندى كۇرەس ءجۇرىپ جاتىر. مەن وسى سالادا الەۋەتتى ينۆەستورلارمەن ءجيى كەزدەسەمىن. ولاردىڭ كوبى ءوز بيزنەسىنىڭ تابىستىلىعىن قازاقستان نارىعىنا بايلانىستىرىپ ەمەس, رەسەيگە تاۋار ەكسپورتتاۋ تۇرعىسىنان قاراستىرىپ باعالايدى. كەز كەلگەن ينتەگراتسيالىق بىرلەستىكتە ەكونوميكالىق ليدەردىڭ بولاتىنى ءسوزسىز. ەكونوميكالىق قۋاتى تومەن ەل ءوز الەۋەتىن وزىنەن دە مىقتى سەرىكتەستەر ەسەبىنەن كوتەرۋگە مۇمكىندىك الادى. ماسەلەن, ەۋروپالىق وداقتا 27 مەملەكەت بار. ارقايسىسىنىڭ ەكونوميكالىق دەڭگەيى ءارتۇرلى. ءوزارا ساۋدانىڭ باسىم بولىگى ەو ليدەرى – گەرمانياعا تيەسىلى. بۇكىل شىعىس ەۋروپا سوعان ۇمتىلادى. بىرلەسكەن جوبالار, كووپەراتسيا, ءبىلىم دەڭگەيىن ارتتىرۋ, ادامدار مەن كاپيتالدىڭ ەركىن اينالىمى ارقىلى تاجىريبە جيناپ, دەڭگەي ارتتىرۋعا تالپىنادى, – دەپ ءتۇسىندىردى مينيستر.
