بىلتىرعى كورسەتكىشتەن بيىلعى سايكەس مەرزىمدەگى قۇس سانى 22,6 پايىزعا ازايعان. سونىڭ كەسىرىنەن جۇمىرتقا ءوندىرۋ 69 پايىزعا دەيىن تومەندەگەن. ءتىپتى قىزىلجار اۋدانىنداعى قۇس سانى 46,8 پايىزعا دەيىن كەمىپتى. بۇل جۇمىرتقا وندىرۋگە عانا ەمەس, قۇس ەتىن وندىرۋگە دە تەرىس اسەرىن تيگىزىپ وتىر. سونىڭ ىشىندە قىزىلجار اۋدانىندا 19,1 پايىزعا تومەندەسە, پەتروپاۆل قالاسىندا ەت ونىمدەرىن شىعارۋ 42,3 پايىزعا دەيىن قۇلدىراعان.
وبلىس اكىمى قۇمار اقساقالوۆ قۇس تۇماۋىنان بىلتىر 1 ملن-عا جۋىق قۇس قىرىلعانىن ايتتى. مەملەكەت 813 ملن تەڭگە وتەماقى تولەگەن. بۇگىنگى تاڭدا قۇس فابريكالارى 1 ملن باس قۇس اكەلگەن, تاعى دا 760 مىڭ باس اكەلۋگە كەلىسىمشارت جاساعان. بۇل قۇستار مامىر ايىندا جەتكىزىلمەك.
وسى ارقىلى كەيبىر قۇس فابريكالارى ءونىم كولەمىن بۇرىنعى دەڭگەيگە جەتكىزدى. ماسەلەن, «ياكور» قۇس فابريكاسى قازىر 14 ملن داناعا دەيىن جۇمىرتقا شىعارادى. بۇل بۇرىنعى كورسەتكىشكە قارايلاس. بىراق وسى قىزىلجار اۋدانىنداعى «بەسكول قۇس فابريكاسى» داعدارىستان ءالى دە ارىلا الماي, ءونىم كولەمىن دىتتەگەن مەجەگە جەتكىزە الماي وتىرعان كورىنەدى. بۇرىن ۇنەمى الدان كورىنەتىن وزىق كاسىپورىننىڭ ءبىر سوققىدان وڭالماي قالعانى ما؟ بىلتىر بۇل كاسىپورىن قۇس تۇماۋىنان قاتتى زارداپ شەكتى. فابريكا باسشىسىنىڭ ايتۋىنا قاراعاندا, 180 مىڭ تاۋىق قىرىلدى. وبلىستاعى اۋىلشارۋاشىلىق كاسىپورىندار اراسىندا ۇنەمى الدىڭعى قاتاردا جۇرەتىن بەسكولدىكتەرگە بۇل وڭالماس سوققى بولدى. ونىڭ ۇستىنە, وتەماقىنى دا تولىق الا الماعان.
سويتسەك, گاپ باسقادا. وبلىس اكىمىنىڭ ءبىرىنشى ورىنباسارى مارات تاسماعامبەتوۆ بەسكولدىكتەر 25 مىڭ قۇس ساتىپ العانىن ايتتى. سونداي-اق الداعى شىلدە ايىنا دەيىن تاعى 100 مىڭ تاۋىق جەتكىزبەك ەكەن. ەڭ باستىسى, بۇل كاسىپورىن ەندى وزىندەگى ۇيرەكتى تەگىس ەتكە ساتىپ, جۇمىرتقا وندىرۋگە اۋىسىپ جاتقان كورىنەدى. بۇل ءۇشىن بۇرىنعى عيماراتىن دا قايتا جاراقتاپ, ەندى تەك تاۋىق وسىرۋگە ىڭعايلاپتى. قازىر كاسىپورىن 30 مىڭ ۇيرەكتى ساتۋعا ازىرلەپ وتىر. سونىڭ ەسەبىنەن گەرمانيادان تاۋىق ساتىپ الماق. كاسىپورىن ماماندارى قازىر نەمىس تەحنولوگياسىن مەڭگەرۋ قامىمەن گەرمانيادا ءجۇر.
سولتۇستىك قازاقستان وبلىسى
