جوباعا ءۇش مەملەكەتتىڭ قاتىسى بار. ستارتاپتى بەلورۋسيالىق IT-ماماندار دايىنداپ, جوبانىڭ ءوزى ەستونيادا تىركەلىپ, بىراق جۇمىسىن قازاقستاندا باستاماق. ستارتاپتىڭ ماقساتى – فەرمەرلەر مەن قالا تۇرعىندارىن ءبىر پلاتفورمادا توعىستىرىپ, دەلدال جانە الىپساتارلاردى ارالاستىرماي, تازا تابيعي ءونىمدى تۇتىنۋشىعا تىكەلەي جەتكىزىپ بەرۋ.
– قازىر ەكوونىمدەرگە دەگەن سۇرانىس وتە جوعارى. ءبىزدىڭ باستى ەرەكشەلىگىمىز – ەكى تاراپقا دا قولايلىمىز. بيزنەس تۇرعىسىنان قارايتىن بولساق, فەرمەرلەردى ارتىق پروبلەمادان ارىلتامىز. ءونىمدى تۇتىنۋشىعا ءوزىمىز جەتكىزەمىز. ال كليەنتتەردىڭ حيميا قوسىلماعان, تازا, تابيعي ونىمدەردى تاڭداپ الۋىنا مۇمكىندىك سىيلايمىز. ورگانيكالىق ونىمدەردىڭ الەمدىك نارىعى 20 جىلدا 6 ەسە ءوستى جانە قۇنى 106 ملرد دوللاردان اسىپ كەتتى. جەكە بيزنەس دايىنداعان ورگانيكالىق ونىمدەر ماركەتپلەيسى 2021 جىلى ەڭ تەز كوتەرىلگەن بيزنەسكە اينالۋدا, – دەيدى يدەيا اۆتورى باحت نيازوۆ.
ستارتاپ اياسىندا شارۋا قوجالىقتارى, شاعىن كاسىپكەرلىك ونىمدەرى «تسيفرلانىپ», قولونەر شەبەرلەرىنىڭ ونىمدەرى دە نارىققا شىعارىلماق. جوباعا قاتىسۋ ءۇشىن وندىرۋشىلەر ساپالى, تازا, تابيعي ءونىم شىعارىپ, ءونىمنىڭ ەكولوگيالىق تازالىعىن قامتاماسىز ەتۋى كەرەك. جوبا ۇيىمداستىرۋشىلارىنىڭ ايتۋىنشا, قازىردىڭ وزىندە پلاتفورماعا ونشاقتى بيزنەسمەن قوسىلعان. بازادا الماتى وبلىسىنداعى سىر, ءسۇت ونىمدەرىن, جەمىس-جيدەك, حالال ەت, قۇس ەتىن وندىرۋشىلەر بار. فيتنەس-ونىمدەر دە بارشىلىق. قوسىمشاعا كارتانى تىركەپ, ونىمگە تاپسىرىس بەرۋگە بولادى. اۆتورلار كەلەشەكتە جوبانىڭ اۋديتورياسى مەن تاپسىرىس گەوگرافياسىن ارتتىرامىز دەيدى.
– ءبىز تۇراقتى دامۋ پرينتسيپتەرىنە نەگىزدەلگەن كەز كەلگەن بيزنەستى قولداۋعا دايىنبىز. بىراق ءبىزدىڭ باستى نازارىمىز شاعىن (20 ادامعا دەيىن) ورگانيكالىق جانە تابيعي ونىمدەر وندىرۋشىلەر مەن ساتۋشىلار, ءدامحانالار, مەيرامحانالار, slow food جانە ەكو-وتەلدەر. قازىرگى تاڭدا قازاقستاندا, الماتى قالاسىندا جۇمىس ىستەپ جاتىرمىز. سونداي-اق اقش پەن ەستونيادا كەڭسەمىز بار. جاقىن ۋاقىتتا رەسەي جانە ەۋروپا نارىعىنا شىعۋدى جوسپارلاپ وتىرمىز, – دەيدى جوبا اۆتورلارى.
