ءۇندىستان ۇكىمەتى مەن دەنساۋلىق ساقتاۋ مەكەمەلەرى COVID-19 جۇقتىرعان ادامدار سانى كۇرت وسۋىنە بايلانىستى قيىندىققا تاپ بولدى. ەمحانالاردا – مەديتسينالىق جابدىق, جانساقتاۋ بولىمدەرىندە – ورىن, ءدارى-دارمەكتەر, وتتەگى مەن وكپە جەلدەتكىشتەرى تاپشى. قايتىس بولعانداردىڭ دەنەلەرى ءمايىتحانالار مەن كرەماتوريلەردە جينالىپ قالعان. سەنبىدە ءولىم سانى 2624 ادامعا جەتكەن. بۇل جوعارى كورسەتكىش جاعدايدىڭ قانشالىقتى ۋشىعىپ بارا جاتقانىن كورسەتىپ وتىر. جەكسەنبىدە تاعى 349 691 ادامنان ىندەت انىقتالعان. وسىلايشا پاندەميا باستالعالى ەلدە كوروناۆيرۋس جۇقتىرعانداردىڭ سانى 17 ملن-عا جەتتى. ناۋقاستارعا لىق تولى اۋرۋحانالار وتتەگى جەتىسپەۋىنەن جاڭادان تۇسكەن اۋرۋلاردان باس تارتۋعا ءماجبۇر.
كۇنى كەشە اقش بيلىگى ۇندىستانداعى جاعداي الاڭداتىپ وتىرعانىن جەتكىزدى. ەلدىڭ مەملەكەتتىك حاتشىسى ەنتوني بلينكەن اقش قوسىمشا كومەك پەن جابدىقتاردى جەتكىزۋ ءۇشىن ءۇندىستان ۇكىمەتىمەن تىعىز بايلانىستا ەكەنىن ايتتى. ءۇندىستان بيلىگى اۋىر زارداپ شەككەن شالعايداعى اۋداندارعا جۇكتەردى تاسىمالداۋ ءۇشىن پويىزدار مەن اۋە كۇشتەرىن جىبەرەتىن بولادى.
وتتەگىنىڭ جەتىسپەۋىنەن ناۋقاستار اۋرۋحانادا كوز جۇمىپ جاتقان دەليدەگى جاعداي ءتىپتى كۇردەلى. ەلدە جەكسەنبىدە قايتىس بولعانداردىڭ سانى الدىڭعى كۇننەن دە اسىپ ءتۇستى. دۇنيەجۇزىلىك دەنساۋلىق ساقتاۋ ۇيىمى (ددۇ) بۇل جاعداي كوروناۆيرۋستىڭ اۋىر سالدارى قانداي بولۋى مۇمكىن ەكەنىن تاعى ءبىر رەت ەسكەرتىپ جاتقانداي دەپ مالىمدەدى.
جىل باسىندا عانا ءۇندىستان ۇكىمەتى ىندەتتى جەڭگەنىنە سەنىمدى ەدى. اقپان ايىنىڭ ورتاسىندا ۆيرۋس جۇقتىرعاندار سانى 11 مىڭعا دەيىن ازايىپ, ۆاكتسينالار ەكسپورتتالا باستالعان. ناۋرىزدا دەنساۋلىق ساقتاۋ ءمينيسترى ءۇندىستان پاندەميانىڭ ەڭ سوڭعى كەزەڭىندە ەكەنىن ايتقان.
الايدا جاعداي قىسقا مەرزىمنىڭ ىشىندە كۇردەلەنىپ كەتتى. ۆيرۋستىڭ ۋاقىت وتكەن سايىن وزگەرىپ, جاڭا شتامدارى پايدا بولدى. ودان بولەك, وسى ايدىڭ باسىنداميلليونداعان ادامدى جيناعان كۋمب مەلا فەستيۆالى سياقتى قوعامدىق مەرەكەلەردەن سوڭ جاعداي باسقاشا وربىگەن. دەليدەگى اۋرۋحانالار ۇلكەن داعدارىستىڭ الدىندا تۇرعاندارىن ەسكەرتتى. دارىگەرلەردىڭ ايتۋىنشا, قالاداعى بارلىق اۋرۋحانا تولىعىمەن قۇلدىراۋدىڭ الدىندا تۇر. ەگەر وتتەگى تاۋسىلسا, تالاي ناۋقاستىڭ ءومىرىن ساقتاپ قالۋ مۇمكىن ەمەس ەكەنى ايتىلدى. سونداي-اق ەلدەگى وتتەگى زاۋىتتارىن ۇكىمەت دەرەۋ ءوز باقىلاۋىنا الۋى كەرەك دەيدى دارىگەرلەر.
ءۇندىستاننىڭ وڭتۇستىگىندەگى ۆەللور قالاسىنداعى حريستيان مەديتسينا كوللەدجىنىڭ ۆيرۋسولوگى گاگانديپ كان ۆۆس-گە بەرگەن پىكىرىندە ۆيرۋستىڭ تارالۋىن توقتاتۋ ءۇشىن قوسىمشا شارالار قاجەت ەكەنىن ايتقان. ول بارلىق ءىس-شارانى دەرەۋ توقتاتۋ كەرەك دەگەن پىكىردە. اسىرەسە جۇزدەگەن ادام جينالاتىن ءۇندى تويلارىنا شەكتەۋ قويۋ كەرەك. مامان ساياسي, ەكونوميكالىق نە وتباسىلىق سەبەپپەن وتەتىن جيىنداردى دا ازىرگە وتكىزۋگە بولمايتىنىن العا تارتادى. ول تولىعىمەن لوكداۋن ەمەس, ىندەت ورشىگەن ايماقتاردى قاتاڭ باقىلاۋعا الۋ كەرەكتىگىن باسا ايتتى.
جىعىلعانعا جۇدىرىق بولعانداي, مۋمبايدىڭ سولتۇستىگىندەگى ۆيرار قالاسىنداعى ەمحانالاردىڭ بىرىندە ءورت شىعىپ, 15 ناۋقاستىڭ ءومىرىن جالماعان. اۋا كونديتسيونەرىنەن تۇسكەن ۇشقىندار ەكى مينۋتتان كەيىن قارقىندى تەراپيا ءبولىمىن وتقا وراعان. ءۇندىستاننىڭ تاعى ءبىر وڭىرىندە ونسىز دا جەتكىلىكسىز وتتەگى اعىپ كەتىپ, ماحاراشترا شتاتىنىڭ ناشيك اۋدانىنداعى اۋرۋحانادا 24 ناۋقاس وتتەگى كۇتىپ جاتىپ قايتىس بولعان.
وسى كۇردەلى جاعدايدا ەل بيلىگىنە دەگەن نارازىلىق كۇشەيە تۇسكەن. ويتكەنى ورتالىقتاعى بيلەۋشىلەر جاعدايعا قاتىستى شارا قولدانۋدىڭ ورنىنا ءۇنسىز بولعان. ءساۋىر ايىندا قىسقا مالىمدەمەلەردە پرەمەر-مينيستر مودي ۇلتتىق ۆاكتسينالاۋ بارىسىن تالقىلاپ, جاعدايدىڭ الاڭداتارلىق ەكەنىن ايتىپ قانا قويعان. قاۋىپسىزدىك شارالارى رەتىندە تەستىلەۋدى كوبەيتىپ, باقىلاۋدى ارتتىرۋدى جانە حالىقتان اباي بولۋدى سۇراپ قانا قويعان ەكەن. ۇكىمەت باسشىسى جاعدايدىڭ قيىن ەكەنىنە قاراماستان, ءتيىمدى كۇرەس شارالارىن ايتۋمەن عانا بولعان. تەك سەيسەنبىدە مودي جاعدايدىڭ شۇعىل ەكەنىن اتاپ ءوتىپ, حالىققا ۇندەۋىندە جاڭا شارالار قابىلداعان. سونداي-اق ەلدەگى ىندەتتىڭ ەكىنشى تولقىنى تۋرالى رەسمي جاريالاندى.
