يرينا گەرليتس باسكەتبولمەن 11 جاسىندا تابىستى. پاۆلودار قالاسىندا جەرگىلىكتى باپكەر ۆالەري تاراسوۆتىڭ قول استىندا جاتتىعىپ, وسى ونەردىڭ قىر-سىرىنا قانىقتى. ورتا مەكتەپتى اياقتاپ, قولىنا اتتەستات تيگەن بەتتە ول ەش ويلانباستان, كيىم-كەشەگىن جيناستىردى دا الاتاۋ باۋرايىنا اتتاندى. ويتكەنى سول كەزدەرى قازاقستاندا كسرو چەمپيوناتىنىڭ جوعارى ليگاسىندا وينايتىن جالعىز عانا كلۋب بولدى. ول – الماتىنىڭ «ۋنيۆەرسيتەتى». گەرليتس ءدال سول رەسپۋبليكامىزدىڭ باس كومانداسىنىڭ قۇرامىندا ونەر كورسەتۋدى ارماندادى.
«ۋنيۆەرسيتەتتىڭ» ساپىندا يرينا جاسىنداي جارقىلداپ, بىردەن مايتالمان مامانداردىڭ قىراعى نازارىنا ىلىكتى. كوپ ۇزاماي دارىندى قىز كسرو-نىڭ جاستار قۇراماسى ساپىنا قابىلداندى. سول كوماندامەن بىرگە جەرلەسىمىز ءبىراز بەلەستەردى باعىندىردى. اتاپ ايتساق, 1984 جىلى يسپانيانىڭ تولەدو قالاسىندا ەۋروپا بىرىنشىلىگىندە كۇمىس مەدالدى يەلەنسە, 1985 جىلى اقش-تا الەم چەمپيونى اتاندى. اقتوعايلىق ارۋدىڭ ۇلكەن سپورتتاعى كارەراسى وسىنداي جارقىن جەڭىستەرمەن باستالدى.
1986 جىلى كسرو-نىڭ باس كومانداسىنا قابىلدانعان گەرليتس الەم چەمپيوناتىنا قاتىستى. بۇل باسەكەلەر ماسكەۋ, مينسك جانە ۆيلنيۋس قالالارىندا ءوتتى. توپتىق تۋرنيردە بارلىق قارسىلاسىن بەت قاراتپاي ۇتقان وداقتىڭ باسكەتبولشىلارى جارتىلاي فينالدا چەحوسلوۆاكيادان (78:67) باسىم تۇسكەنىمەن, فينالدا اقش-قا (88:108) ەسە جىبەردى. وسى جارىستا قازاقستاننىڭ وكىلى دە ءوزىن جاقسى قىرىنان كورسەتىپ, كوماندالىق ارىپتەستەرىمەن بىرگە كۇمىس مەدالدى موينىنا ءىلدى. ءدال وسى چەمپيوناتتان كەيىن كسرو قۇراماسىنىڭ باس باپكەرى ۆاديم كاپرانوۆتىڭ تاراپىنان گەرليتسكە ماسكەۋدىڭ تسسكا-سىنا اۋىسۋى جايىندا ۇسىنىس ءتۇستى. ارينە اتاعى الىسقا جايىلعان اسكەريلەر كلۋبىنىڭ جەيدەسىن كيۋ ءار سپورتشىنىڭ ارمانى. الايدا جەرلەسىمىز الاتاۋ باۋرايىندا ورنالاسقان اسەم شاھاردى قيىپ كەتە المادى. ول ماسكەۋگە بارۋدان باس تارتىپ, الماتىدا قالدى. ودان كەيىنگى جىلدارى دا يرينا «ۋنيۆەرسيتەتتىڭ» نامىسىن ابىرويلى قورعاپ, جەرگىلىكتى جانكۇيەرلەردىڭ ىقىلاسىنا بولەندى.
يرينا گەرليتس سپورتتىڭ بۇل تۇرىندە تولاعاي تابىستارعا قول جەتكىزگەنى داۋسىز. تارقاتىپ ايتساق, 1986 جانە 1990-جىلدار ارالىعىندا ول ەۋروپا چەمپيونى اتانىپ, ىزگى نيەت ويىندارى مەن دۇنيەجۇزىلىك ۋنيۆەرسيادادا كۇمىس مەدالدى ەنشىلەدى. 1988 جىلى وليمپيا ويىندارىنىڭ قولا جۇلدەسىن يەلەندى. ال 1992 جىلى بارسەلونا وليمپياداسىندا قۇرامىندا گەرليتستەي كەرەمەت ويىنشىسى بار تمد كومانداسى باس جۇلدەنى ولجالادى. ءدۇبىرلى دودانىڭ شەشۋشى تۇسىندا ولار اقش (79:73) پەن قىتايدى (76:66) قاپى قالدىردى.
كەڭەس وداعى ىدىراعاننان كەيىن قازاقستان باسكەتبولى قۇردىمعا كەتتى. ەلىمىزدىڭ وزگە دە مىقتى باسكەتبولشىلارىمەن بىرگە يرينا گەرليتس تە شەكارا استى. بىرەر جىل ول يسپانيانىڭ مادريد پەن وۆەدو قالالارىندا جاساقتاعان كوماندالاردىڭ ساپىندا وينادى. كەيىننەن فرانتسياعا قونىس اۋدارىپ, «بوردو» مەن «رەيمستىڭ» نامىسىن قورعادى. ۇلكەن سپورتتان قول ۇزگەننەن كەيىن يرينا ياكوۆلەۆنا باپكەرلىك قىزمەت اتقاردى. قازىرگى كەزدە ول ءوزىنىڭ وتباسىمەن بىرگە بوردو قالاسىندا تۇرىپ جاتىر.
ايگىلى باسكەتبولشىنى تۋعان كۇنىمەن قۇتتىقتايىن دەپ سوناۋ بوردوعا قوڭىراۋ شالدىق. يرينامەن سويلەسۋدىڭ رەتى كەلمەدى. ول جۇمىس بابىمەن فرانتسيانىڭ ءبىر قيىرىندا جۇرگەن كورىنەدى. تەلەفون تۇتقاسىن كۇيەۋى ۆيكتور كوزيك (ول دا قازاقستانعا تانىمال ۆولەيبولشى) كوتەردى. قازاقستاننان ەكەنىمىزدى, رەسپۋبليكامىزدىڭ باس باسىلىمى – «Egemen Qazaqstan» گازەتىنەن حابارلاسىپ تۇرعانىمىزدى ەستىگەندە كوڭىل كۇيى كوتەرىلىپ قالدى. «راحمەت, ۇمىتپاپسىزدار! يرينا ۇيگە كەلگەندە قۇتتىقتاۋلارىڭىزدى جەتكىزەمىن. زايىبىم دا قاتتى قۋاناتىن بولدى. قازاقستان ەكەۋمىزدىڭ دە كىندىك قانىمىز تامعان جەرىمىز عوي», دەپ اقتارىلا سويلەدى.
