اڭگىمە تۇسىنىكتىرەك بولۋى ءۇشىن ءوز باسىمىزدان كەشكەن ءبىر جايدى ايتىپ بەرەيىك. بىلتىر ەڭبەك دەمالىسىندا استاناعا بارعان ساپارىمدا «سەرگەك» جول باقىلاۋ جۇيەسى مەنىڭ جول قوزعالىسى ەرەجەسىن ساقتاماعانىم ءۇشىن 8334 تەڭگە ايىپپۇل سالىپتى. ودان كەيىن, شامامەن 15 كۇندەي ۋاقىت وتكەندە ماشينامدى ساتقان بولاتىنمىن. ساتۋ كەزىندە مامانداندىرىلعان حقو سالىق پەن ايىپپۇلدان قارىزىم بار-جوعىن تەكسەرىپ, ەگەر بولسا سول جەردە قولما-قول تولەتەدى. تولەمەسەڭ, ساتۋ قۇجاتتارىن رەسىمدەمەيدى. دەمەك, مەن سول جولى ءبارىن تولەگەنمىن. ودان كەيىن, جىلدىڭ اياعىندا جسن-ىم ارقىلى سالىق نەمەسە باسقا قارىزىمنىڭ بار-جوعىن ءوزىم دە تەكسەرگەنمىن. ءسويتىپ ەشقانداي قارىزىم جوقتىعىنا كوز جەتكىزگەنمىن.
ەندى جۋىردا بانكتىك تولەم كارتوچكامنىڭ بۇعاتتالعانىن كورىپ تاڭعالدىم. بانك مەنەدجەرى مەنىڭ كارتوچكامدى «ايىپپۇل تولەمەگەنىم ءۇشىن» استانالىق جەكە سوت ورىنداۋشى دانيار قۇرمانباەۆ بۇعاتتاعانىن ايتىپ, ونىڭ تەلەفون ءنومىرىن تاۋىپ بەردى.
سوت ورىنداۋشىسىنا تەلەفون سوعىپ ەدىم, تەلەفوندى كوتەرگەن ءبىر ايەل مەنىڭ «جەكە سوت ورىنداۋشىنىڭ قىزمەتىن» تولەۋىم كەرەك ەكەنىن ايتتى. مەن سوت ورىنداۋشىعا ەشقاشان ءوتىنىش جاساعان ەمەسپىن, ونىڭ ەشقانداي قىزمەتىن سۇراعان نەمەسە العان ەمەسپىن دەگەن ساۋالىما ول: «سىزگە نۇر-سۇلتان قالالىق پوليتسيا دەپارتامەنتىنىڭ اكىمشىلىك پوليتسياسى جول قوزعالىسى ءتارتىبىن بۇزعانىڭىز ءۇشىن ايىپپۇل تولەۋگە №207100033781575 ۇيعارىم جاساعان ەكەن, سوت ورىنداۋشى سول بويىنشا جۇمىس ىستەگەن. ەندى ونىڭ قىزمەتى ءۇشىن 2083 تەڭگە تولەيسىز», دەپ قاراپ تۇر.
«مەن بۇل ايىپپۇلدى ۋاقىتىندا تولەگەن ەدىم عوي. سوت ورىنداۋشى بۇل ماسەلەگە نەگە ارالاسقان؟ د. قۇرمانباەۆتىڭ مەنىڭ كارتوچكامدى بۇعاتتاۋىنا نەگىز بولعان قۇجاتتى كورسەتىڭىز نەمەسە ايتىڭىز», دەگەن ەدىم. ء«بىز تەك جوعارىدا اتالعان ۇيعارىمنىڭ نەگىزىندە ءسىزدىڭ كارتوچكاڭىزدى بۇعاتتادىق» دەدى. ول ول ما, «ەندى ءسىز 2083 تەڭگە ەمەس, 4488 تەڭگە تولەيسىز, تولەمەسەڭىز كارتوچكاڭىز بۇعاتتان شىعارىلمايدى», دەپ قورقىتتى. امال جوق, 4488 تەڭگەنى تولەپ, كارتوچكامىزدى بوساتىپ الدىق. ايتپەسە, ەشقانداي اۋدارىم جاساي الماي قالعان ەدىك.
بۇل نە سوندا؟ اكىمشىلىك ءىس سوتقا بەرىلمەسە, ايىپپۇل تولەۋگە سوت ورىنداۋشىسى نەگە ارالاسادى؟ ادام ايىپپۇلدى وزدىگىنەن تولەسە, سوت ورىنداۋشىسىنىڭ وعان قانداي قاتىسى بار؟ وعان جەكە ادامنىڭ تولەم كارتوچكاسىن يەسىنە ايتپاي بۇعاتتاۋعا كىم قۇقىق بەردى؟ بۇل ادامنىڭ قۇقىعىن اياققا باسۋ ەمەس پە؟
الدە, بۇل بىرەۋلەردىڭ كولدەنەڭ تابىس تابۋى ءۇشىن قولدان جاسالعان سىبايلاستىق پا؟ بۇعان قۇزىرلى ورگاندار نە ايتار ەكەن؟
سولتۇستىك قازاقستان وبلىسى
