توي تويلاۋ تىيىلماي تۇر

بارلىق ءوڭىر بويىنشا ازاماتتاردىڭ قوعامدىق ورىنداردا جاپپاي جينالۋىمەن بايلانىستى 5 مىڭعا جۋىق «ورەسكەل» بۇزۋشىلىق انىقتالدى.

ونىڭ ىشىندە 4 مىڭ فاكتى مەيرامحانالار مەن تۇنگى كلۋبتاردىڭ شەكتەۋ ۋاقىتىنان تىس جۇمىس ىستەۋىمەن, 1 مىڭعا جۋىق فاكتى تويلار وتكىزۋمەن بايلانىستى.

اتاپ ايتقاندا:

نۇر-سۇلتان قالاسىندا 10 ساۋىردە «حان تالاپاي» مەيرامحاناسىندا 160 ادامنىڭ قاتىسۋىمەن توي وتكىزىلگەن, 17 ساۋىردە «برۋكلين» كافەسىندە شەكتەۋ ۋاقىتىنا قاراماستان 30 ادامعا جانە «نيرۆانا» كافەسىندە 40 ادامعا قىزمەت كورسەتۋ فاكتىسى انىقتالعان;

الماتى قالاسىندا 15 ساۋىردە «مياتا» لاۋندج بارىندا شەكتەۋ ۋاقىتىنان كەيىن 60 كەلۋشىگە, 17 ساۋىردە «ەلەكسير» كلۋبىندا 40 ادامعا قىزمەت كورسەتۋ فاكتىسى تىركەلگەن;

اتىراۋ وبلىسىندا 4 ساۋىردە «اراي» مەيرامحاناسىندا 80 ادام قاتىسقان توي وتكەن, 16 ساۋىردە «ورتا» مەيرامحاناسى تۇنگى ۋاقىتتا 40 كەلۋشىگە قىزمەت كورسەتۋدى جالعاستىرعان;

قوستاناي قالاسىندا ۇستىمىزدەگى جىلدىڭ 17 ساۋىرىندە «سالەم كافەسىندە» توي وتكەن, 28 ناۋرىزدا شەكتەۋ مەرزىمىنە قاراماستان «دجون سنوۋ» كافەسى جۇمىسىن جالعاستىرعان;

باتىس قازاقستان وبلىسىندا 9 ساۋىردە 70 ادامنىڭ قاتىسۋىمەن, 10 ساۋىردە 60 ادام قاتىسۋىمەن توي وتكىزۋ, كافەلەردىڭ شەكتەۋگە قاراماستان قىزمەت ەتۋى فاكتىلەرى انىقتالعان.

شىمكەنت قالاسىندا 3-ءشى, 11-ءشى جانە 12 ءساۋىر كۇندەرى مەيرامحانالاردا توي وتكىزۋ فاكتىلەرى تىركەلگەن.

اقتوبە وبلىسىندا 10 ساۋىردە «اق جەلكەن», «يۋرتا» مەيرامحانالارىندا 100 ادامنىڭ قاتىسۋىمەن تويلار وتكەن. «بارروككو» كافەسى شەكتەۋ ۋاقىتىنان كەيىن قىزمەت كورسەتكەن.

تاراز قالاسىندا «ادەمى مەرۋەرت» مەيرامحاناسىندا 4 ساۋىردە 100 ادامنىڭ قاتىسۋىمەن توي وتكەن.

اقمولا, قاراعاندى وبلىستارىندا دا توي وتكىزۋ, كافەلەردىڭ تۇنگى ۋاقىتتا قىزمەت ەتۋى ءالى كۇنگە دەيىن جالعاسۋدا.