رۋحانيات • 20 ءساۋىر، 2021

«قۇرمەتتى ازامات» اتانۋىما كومەكتەسشى...»

506 رەت كورسەتىلدى

وسىنداي ءوتىنىشتى الىس-جاقىن اعايىندار ارا-تۇرا ايتىپ جاتادى.

قىزىلجار وڭىرىندە دارداي باسشىلىق قىزمەت اتقارىپ جۇرگەن كەزىندە بىلىق-شىلىعى اشكەرەلەنىپ، ورنىنان الىنىپ قانا قويماي، بۇل تۋرالى وڭىرلىك بۇقارالىق اقپارات قۇرالدارىندا جازىلىپ، ابىرويى جالپاق جۇرتتىڭ الدىندا ايرانداي توگىلگەن ءبىر جاسى ۇلكەن كىسى ارادا ون شاقتى جىل وتكەندە ماعان: «الداعى جەتپىسجىلدىق مەرەي­تويىمنىڭ قارساڭىندا «سولتۇستىك قازاقستان وبلىسىنىڭ قۇرمەتتى ازاماتى» اتاعىن العىم كەلەدى. قانداي جاردەمىڭ بولادى؟..» دەپ قولقا سالعانى بار. مەملەكەتتىك قىز­مەتتەگى مانسابىن ماسقاراشىلىقپەن اياق­تاعانىن  مۇلدەم ۇمىتقانداي، «ول اتاقتى مەن الماعاندا كىم الادى؟» دەگەندەي، مەنمەنسي سويلەگەنىنە قاراپ، «مىنا اعامىز قالاي ءوزى؟..» دەپ، قايران قالعانمىن. سودان كەيىن الگى ەكس-شەنەۋنىك وبلىس تۇگىل، ءوزى تۋىپ-وسكەن اۋداننىڭ قۇرمەتتى اتاعىن الۋعا ەڭبەگى ءسىڭدى مە ەكەن دەپ، سۇراستىرىپ كورگەنىمدە ءتىپتى جاعامدى ۇستادىم. سەبەبى ول ءبىر كەزدە ءوزىنىڭ تۋعان اۋىلىنىڭ قىرۋار جەرىن بالاسىنىڭ اتىنا جالعا الىپ، ەگىنشىلىكپەن اينالىسقانىمەن، جۇمىسقا سالعان اۋىلداستارىنىڭ ەڭبەگىنە دۇرىس اقى تولەمەي جانە ولاردىڭ وزىنە سەنىپ تاپسىرعان جەر ۇلەستەرى ءۇشىن دە جارتىمدى ەشتەڭە بەرمەي، ءبارىن قاتتى رەنجىتكەن بولىپ شىقتى. «ول اعايدى اۋدانىمىزدىڭ «قۇرمەتتى ازاماتى» اتاعىنا ۇسىنسام، باسىم پالەگە قالادى. ويتكەنى ونى مۇندا ەشكىم قۇرمەتتەمەيدى»، دەدى اۋدان اكىمى. 

جۋىردا استانادا تۇراتىن تاعى ءبىر جەر­لەسىم  حابارلاسىپ، «سولتۇستىك قازاقستان وب­لىسىنىڭ قۇرمەتتى ازاماتى» اتاعىن ازىرگە سۇرا­ماي-اق قويايىن، اۋەلى ءوز اۋدانىمدىكىن السام دا جارار. سەن اۋدان باسشىلارىن  تانيسىڭ عوي، ءبىر اۋىز ءسوزىڭدى ايتشى...» دەپ قيىلدى. ول ازامات ءومىر بويى باسقا وڭىرلەردە قىزمەت ىستەگەن ەدى. العان اتاق-ماراپاتى دا ءبىر باسىنا جەتەرلىكتەي. تەك ونىڭ ءوزى تۋىپ-وسكەن اۋدانى تۇگىل، تۋعان اۋىلىنا دا قولۇشىن سوزىپ، قارايلاسپاعانىن بىلەمىن. سوندىقتان قوشتاماعانىمدى سەزدىرىپ، ۇندەمەدىم.

نەگىزى، وعان رەنجۋگە دە بولماس. سەبەبى قازىر اۋداننىڭ عانا ەمەس، وبلىستىڭ «قۇر­مەت­تى ازاماتى» دەگەن اتاعىنىڭ ءوزىن دە كىم ال­ماي جاتىر؟! «اق دەگەنى – العىس، قارا دەگەنى – قارعىس» بولىپ تۇرعان اكىمدەر جەر­گىلىكتى ءماسليحاتتاردىڭ ءوز ايتقاندارىنان شىق­پايتىن «كوڭىلشەك» دەپۋتاتتارىنىڭ ء«بىر اۋىزدان» قولداۋىمەن كىمگە بەرگىسى كەلسە، سوعان بەرە سالادى.

ماسەلەن، تەرىسكەي ءوڭىردىڭ بۇرىنعى اكىم­دەرىنىڭ ءبىرى  وبلىستىڭ «قۇرمەتتى ازاماتى» اتاعىن وزىنە  مەشىتتىڭ اسحاناسىنداعى  اۋىز­اشاردا قاتىرىپ ماقتاپ باتا بەرگەن اق­ساقالعا اپەرگەنى ءالى ەسىمدە. ال ول كىسى كەزىن­­دە جارىتىپ جۇمىس ىستەمەي، زەينەتكە ءبىر جىل بۇرىن اتتاندىرىلعانىن (كەڭەس وكى­مەتى تۇسىندا سونداي «جەڭىلدىك» بولعان) جاقسى ءبىلۋشى ەدىم...

سونداي «قۇرمەتتىلەردىڭ» ىشىندە جۇرت جەمقورلىعىن بىلەتىن كەشەگى شەنەۋنىك تە، پاراقورلىعى ءۇشىن ورنىنان الىنعان سۋديا دا بار. وسىنداي  اتاقتى ءوزىنىڭ كانديداتتىق ديسسەرتاتسياسىن «جازۋىنا» جاردەمدەسكەن عالىمعا اپەرىپ تۇرىپ: «بۇل كىسىگە الداعى ۋاقىتتا مال شارۋاشىلىعىن كوتەرۋگە ايانباي اتسالىساتىندىعى ءۇشىن اۆانسپەن بەرەمىز»، دەپ ىشەك-سىلەمىزدى قاتىرا كۇلدىرگەن اكىم دە بولعان. ول اكىمنىڭ ءوزى دە كەيىن قىزمەتىنەن سوگىس الىپ، ءتۇسىپ قالسا دا، ارادا ۋاقىت وتە كەلە، «قۇرمەتتىلەردىڭ» قاتارىنان ويىپ ورىن الىپتى. ء«بىر قىزىمنان ءبىر قىزىم سوراقى» دەگەندەي، جۋىردا بۇرىن سىبايلاس جەمقورلىق قىلمىسى ءۇشىن سوتتالىپ، تۇر­مەدە بىرنەشە جىل وتىرىپ شىققان ەكس-شەنەۋ­نىككە دە مەرەيتويىنا وراي كەزىندە ءوزى باس­قارعان اۋداننىڭ «قۇرمەتتى ازاماتى» اتاعى بەرىلىپتى دەپ ەستىدىم.

ارينە «قۇرمەتتى ازامات» اتاعىن العان­دار­دىڭ ىشىندە لايىقتى تۇلعالار  از ەمەس. تەك سولار جۇرت الدىندا ابىرويدان جۇرداي بول­عان، ەل ىشىندە بيەنى بۇگىمەن، تۇيەنى تۇگىمەن جۇت­قان جەمقورلىعى  جايلى نەشە ءتۇرلى «اڭىز» ايتىلاتىن كەشەگى شەنەۋنىكتەرمەن سالتاناتتى جيىنداردا ءبىر قاتاردا وتىرۋعا ىشتەي ۇيالىپ، نامىستاناتىن دا شىعار-اۋ...

سوندىقتان وسى، قادىرى تۇسكەن اتاقتى بەرۋدى دوعارىپ، ونىڭ ورنىنا بالەنباي اۋداننىڭ جانە بالەنباي وبلىستىڭ «قۇرمەتتى مەتسەناتى» نەمەسە «اتىمتاي جومارتى» دەگەن جاڭا اتاق ەنگىزسەك جانە ونى  ەلباسى ۇسىنعان «تۋعان جەر» باعدارلاماسىنا قۋانا ءۇن قوسىپ، تۋىپ-وسكەن اۋىلدارىنا ميلليونداعان تەڭگەنىڭ الەۋمەتتىك-مادەني عيماراتتارىن سالىپ بەرىپ جاتقان كاسىپكەر ازاماتتارعا بەرسەك، دۇرىس ەمەس پە؟ شىنتۋايتىندا، مۇنداي جاڭا اتاقتىڭ ءجونى بولەك قوي. ال داڭققوي اعايىندارعا اتاق كەرەك بولسا، اتامەكەندەرىنە قولۇشىن بەرسىن. بالكىم، سوندا جەرگىلىكتى باسشىلارعا اركىمدى سالىپ، اتاق سۇراۋشىلىق تا ءوز-وزىنەن تىيىلار...

 

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار