ايماقتار • 19 ءساۋىر، 2021

ەسكى ۇيلەردى ەسىركەگەن جوبا

75 رەت كورسەتىلدى

اپاتتى ۇيلەرىمەن اتى شىققان جاڭاوزەندە «اپاتتى» ساناتىنا جاتپاعا­نىمەن، ەسكى ۇيلەردىڭ دە جاعدايى جاقسى ەمەس. كەيبىرىندە ورىن العان وقىس وقيعالارىمەن بۇل ۇيلەر «اپاتتىعا» سۇرانىپ تۇر دەۋگە دە بولادى. جۋىردا مۇنايلى قالادان ەسكى ۇيلەرگە جوندەۋ جۇرگىزۋ باستالدى دەگەن جاعىمدى جاڭالىق كەلىپ جەتتى.

تۇرعىندارى كۇرت كوبەيۋى سالدارىنان الەۋمەتتىك ماسەلەلەرى كۇن تارتىبىنە كوتەرىلگەن جاڭاوزەن قالاسىندا 262 كوپ پاتەر­لى تۇرعىن ءۇي بار جانە ونىڭ ىشىندە 52 ءۇي كۇر­دەلى جوندەۋدى قاجەت ەتەدى. 1967-1971 جىل­دارى پايدالانۋعا بەرىلگەن بۇل ۇي­لەرگە سودان بەرى كۇردەلى جوندەۋ جاسالماعان.

– جاڭاوزەن قالاسىن الەۋمەتتىك-ەكونو­ميك­الىق دامىتۋدىڭ كەشەندى جوسپارى اياسىندا 2018 جىلى Samruk-Kazyna Trust الەۋمەتتىك جوبالاردى دامىتۋ قورىنىڭ دە­مەۋشىلىگىمەن 25 كوپ پاتەرلى ۇيلەرگە كۇر­­دەلى جوندەۋ جۇمىستارىن جۇرگىزۋگە 257 ملن تەڭگە قاراجات بولىنگەن بولاتىن. وسى قارا­جاتتىڭ 74 ملن تەڭگەسى اتالعان تۇرعىن ۇي­لەرگە قۇرىلىس-تەحنيكالىق زەرتتەۋ جۇر­گىزۋگە، ەنەرگواۋديت جاساۋعا، جوبالىق-سمە­تالىق قۇجات ازىرلەپ، ۆەدومستۆودان تىس ساراپتاما قورىتىندىسىن الۋعا جۇم­سالدى. ساراپتاما قورىتىندىسىنا ساي، كۇردەلى جوندەۋ جۇمىستارىنىڭ قۇنى 1،6 ملرد تەڭگەنى قۇرايدى، – دەيدى جاڭاوزەن قالالىق تۇرعىن ءۇي ينسپەكتسياسى ءبولىمىنىڭ باسشىسى سۇيىندىك مۇحامەدوۆ.

ونىڭ ايتۋىنشا، قازىرگى كەزدە بولىنگەن قاراجاتتىڭ قالعان بولىگىنە، ياعني 183 ملن تەڭگەسىنە 3 كوپ پاتەرلى تۇرعىن ۇيگە كۇردەلى جوندەۋ جۇمىستارى جۇرگىزىلۋدە. جوندەۋ جۇمىستارى بيىل مامىر ايىندا اياقتالادى دەپ جوسپارلانعان.

كۇردەلى جوندەۋ جۇمىستارى بارى­سىن­دا كوپ پاتەرلى تۇرعىن ۇيلەردىڭ تىرەۋ كونس­ترۋكتسيالارى، باسپالداقتارى، شاتىرى جاڭارتىلىپ، ىشكى ينجەنەرلىك جەلىلەرى تولىق اۋىستىرىلىپ، سىرتقى كەلبەتى ارلەنىپ، ەنەرگوتيىمدى نىسانعا اينالاتىندىعى ايتىلۋدا. سونداي-اق بۇل ءوز كەزەگىندە تۇرعىن ءۇيدىڭ پايدالانۋ مەرزىمىن ۇزارتۋعا ىقپال ەتەدى ەكەن. «جاڭارتىلدى» دەگەن جەلەۋدى جامىلىپ جىلتىراق بوياۋمەن باتتاستىرا سالماي، جوندەۋدىڭ ساپالى جۇرگەنى ماڭىزدى.

جەرگىلىكتى اتقارۋشى ورگان تاراپىنان دا جوندەۋ جۇمىستارىنىڭ ساپالى جۇر­گىزىلۋىنە ەرەكشە باقىلاۋ جاسالۋدا، دەيدى قۇزىرلى مەكەمەدەگىلەر. سونداي-اق تۇر­عىن­دار تاراپىنان دا «مەنشىك يەلە­رى بىر­لەستىگى» قۇرىلىپ، جوندەۋ جۇمىس­تا­رىن ءوز قاداعاۋلارىنا العان. كۇر­دە­لى جوندەۋ جۇرگىزىلىپ جاتقان تۇر­عىن ۇي­­لەر قولدانىستاعى تۇرعىن ءۇي زاڭنا­ما­سى­­نا سايكەس باسقارۋدىڭ جاڭا فور­ما­تى­­نا كوشەدى. ياعني پاتەر يەلەرى كوو­پە­را­­تيۆ­ى­نەن «مەنشىك يەلەرىنىڭ بىرلەس­تىگى» نى­­سا­نىندا باسقارىلاتىن بولادى. ىسكە مەن­شىك يەلەرىنىڭ ارالاسۋى جون­دەۋ جۇ­مىس­­­تارى­نىڭ ساپاسىنا دەگەن سەنىم­دى ارت­­تىر­­سا، باسقارۋ فورماتىنداعى وزگەرىس­­تەر جون­دەلگەن ۇيلەردىڭ كەلەشەگىنە جاۋاپ­كەر­­شى­لىكتى جوعارىلاتادى دەگەن ويعا جەتەلەيدى.

ونسىز دا ءبىراز ايقاي-شۋعا سەبەپ بو­لىپ، تۇرعىندارىنىڭ نارازىلىعىن، تۇ­سىن­بەس­تىگىن تۋدىرعان اپاتتى ۇيلەردىڭ سانا­ت­ىن تو­لىق­تىرماي، ەسكى ۇيلەردىڭ دەر كەزىن­دە جوندەۋگە ىلىككەنىنە قۋاناسىڭ، ەندى ولار «ەسكى» دەگەن ايداردان قۇتىلاتىن بولا­دى. تەك جۇمىستىڭ ساپاسى، ناتيجەسى قۋانت­سىن دەيىك.     

 

ماڭعىستاۋ وبلىسى

 

سوڭعى جاڭالىقتار

ۇقساس جاڭالىقتار