ايەلدەر كۇرەسىنەن قازاقستان قۇراماسىنىڭ قورجىنىنا العاشقى التىندى ۆالەنتينا يسلاموۆا سالدى. وسىعان دەيىن ازيا چەمپيوناتىنا ەكى مارتە قاتىسىپ, ءۇشىنشى ورىننان اسا الماعان ساقا سپورتشى بۇل جولى التىن تۇعىرعا كوتەرىلدى. ءبىر كەرەمەتى, 50 كيلو سالماقتا ونەر كورسەتكەن ۆالەنتينا ءۇش كەزدەسۋدى دە مەرزىمىنەن بۇرىن اياقتادى. تۇساۋكەسەر كەزدەسۋىندە ۇندىستاندىق سەما سەمانىڭ سىلىكپەسىن شىعارىپ, ايقىن جەڭىسكە قول جەتكىزگەن ول ىلە-شالا موڭعوليالىق انۋداري ناندينتسەتسەگ پەن تايپەيلىك يۋنگ حسۋن ءليننىڭ ساناۋلى سەكۋندتاردا تاس-تالقانىن شىعاردى. فينالدا جەرلەسىمىز وزبەكستاندىق جاسمينا يمماەۆانىڭ وسال تۇسىن وڭاي تاپتى. وسىلايشا, ازيا چەمپيونى اتانۋ ءۇشىن ۆالەنتينا يسلاموۆاعا نەبارى بەس-التى مينۋت قانا جەتكىلىكتى بولدى.
76 كيلو سالماقتاعى ەلميرا سىزدىقوۆا تۇساۋكەسەر كەزدەسۋىندە الەم كۋبوگى مەن ازيا ويىندارىنىڭ قولا جانە قۇرلىق بىرىنشىلىگىنىڭ كۇمىس جۇلدەگەرى, قىرعىزستاندىق ايپەرى مەدەتقىزىنا ەسە جىبەردى. سول ساتتە جەرلەسىمىزگە ەندى باس جۇلدە بۇيىرمايتىن شىعار دەپ ويلادىق. بىراق ريو وليمپياداسىندا جەڭىس تۇعىرىنا كوتەرىلگەن سىزدىقوۆا الماتىدا دا وزىنە ارتىلعان سەنىمدى اقتادى. اينالمالى جۇيە بويىنشا وتكەن جارىستا قاتارىنان ەكى قارسىلاسىن قاپى قالدىرعان ول فينالدا مەدەتقىزىمەن قايتا كەزدەستى. بۇل جولى ەلميرا ايپەرىنىڭ قوس جاۋىرىنىمەن كىلەمگە قادادى. تازا جەڭىس! وسىلايشا, الاتاۋ بوكتەرىندە قازاق ەلىنىڭ ءانۇرانى ەكىنشى مارتە شىرقالدى.
العاشقى اينالىمدا 55 كيلو سالماقتاعى ايشا ءۋاليشان كورەيالىق كيم حيۋندى قاپى قالدىرىپ, ەكىنشى كەزدەسۋدە موڭعوليالىق دۋلگۋن مۇڭحبولد بولورماعا ەسە جىبەردى. ءۇشىنشى كەزەڭدە وزبەكستاندىق مادينا وسمونجانوۆاعا دا ايشانىڭ ءالى جەتپەدى. دەسەك تە وسى جالعىز جەڭىستىڭ ءوزى جەرلەسىمىزگە قولا مەدالدى ەنشىلەۋ ءۇشىن جەتكىلىكتى بولدى. ال 59 كيلو سالماقتاعى ديانا قايۋموۆا مەن 68 كيلو سالماقتاعى اناستاسيا پاناسسوۆيچ قاتارىنان ەكى كەزدەسۋدە ساتسىزدىككە ۇشىراپ, جارىستى مەرزىمىنەن بۇرىن اياقتادى.
كەلەسى جارىس كۇنى تاعى بەس ارۋىمىز بوز كىلەمگە شىقتى. سولاردىڭ اراسىنان ەڭ ۇزدىك ناتيجەگە 72 كيلو سالماقتاعى ءجاميلا باقبەرگەنوۆا قول جەتكىزدى. ۇندىستاندىق ديۆيا كاكرانعا عانا ەسە جىبەرگەن قازاق قىزى كۇمىس مەدالدى موينىنا ءىلدى. شەشۋشى تۇستا ول موڭعوليالىق سپورتشىعا سان سوقتىردى. 53 كيلو سالماقتاعى اسىلزات ساعىمباي مەن 57 كيلو سالماقتاعى التىناي ساتىلعان قولا جۇلدەگە قول سوزدى. ال يرينا كۋزنەتسوۆا (62 كيلو) مەن گاۋھار مۇقاتاي (65 كيلو) قالىڭ توپتىڭ اراسىندا قالىپ قويدى.
جالپى ايەلدەر كۇرەسىنەن ازيا چەمپيوناتى 1996 جىلدان بەرى ۇزدىكسىز ۇيىمداستىرىلىپ كەلەدى. سول كەزدەن بەرى 23 مارتە جالاۋى جەلبىرەگەن ايتۋلى جارىستىڭ جالپىكوماندالىق ەسەبىندە باس جۇلدە تەك جاپونيا مەن قىتاي قۇرامالارىنا عانا بۇيىرعان ەكەن. كۇنشىعىس ەلىنىڭ ارۋلارى 15 مارتە تەڭدەسسىز دەپ تانىلسا, اسپاناستى ەلىنىڭ بۇرىمدىلارى 8 رەت دارا شىقتى. الاتاۋ باۋرايىندا وتكەن ءدۇبىرلى دوداعا جوعارىدا اتالعان ەكى مەملەكەتتىڭ قىزدارى قاتىسقان جوق. وسى جاعدايدى ءۇندى ەلىنىڭ سۇلۋلارى ۇتىمدى پايدالاندى. 4 التىن, 1 كۇمىس جانە 2 قولانى ولجالاعان ولار جالپى ەسەپتە كوش باستادى. ەكىنشى ورىندا – موڭعوليا. ولار 2 التىن, 5 كۇمىس جانە 1 قولانى قورجىنعا سالدى. قازاقستاننىڭ ارۋلارى ءۇشىنشى ساتىعا جايعاستى. ءبىزدىڭ قىزدار 2 التىن, 1 كۇمىس جانە 3 قولانى ەنشىلەدى. وسىلايشا, قازاق ەلىنىڭ بۇرىمدىلارى ءوز تاريحىنداعى توعىزىنشى رەت كوماندالىق سايىستا ۇزدىك ۇشتىكتى قورىتىندىلادى. سونداي-اق بۇل جارىستا قىرعىزستان (2 التىن, 1 كۇمىس, 1 قولا), وزبەكستان (1 كۇمىس, 1 قولا), تايپەي (1 كۇمىس) جانە وڭتۇستىك كورەيانىڭ (2 قولا ) وكىلدەرى جەڭىس تۇعىرىنا كوتەرىلدى.
الماتى
