كوروناۆيرۋس • 16 ءساۋىر، 2021

نۇر-سۇلتان ستاتسيونارلارىندا 4،5 مىڭعا جۋىق ناۋقاس ەمدەلىپ جاتىر

26 رەت كورسەتىلدى

سوڭعى تاۋلىكتە ەلوردادا كوروناۆيرۋس جۇقتىرۋدىڭ 600-دەن استام جاعدايى انىقتالدى. قالادا ينفەكتسيانىڭ جوعارى دەڭگەيى بايقالادى. بۇل تۋرالى نۇر-سۇلتاندا كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى كوميسسيا وتىرىسىندا ەلوردانىڭ باس مەملەكەتتىك سانيتارلىق دارىگەرى سارحات بەيسەنوۆا ءمالىم ەتتى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

«بۇگىنگى تاڭدا قالادا ينفەكتسيانىڭ جوعارى دەڭگەيى باسىلار ەمەس. ءبىر تاۋلىك ىشىندە 7 386 زەرتتەۋ جۇرگىزىلدى، ونىڭ 678-ءى — وڭ ناتيجە، ال ونىڭ ىشىندە 77-ءسى قايتا تالداۋ ناتيجەلەرى. 601-ءى — العاش رەت انىقتالىپ وتىر. سيمپتومدارى بار 422 جاعدايدىڭ 11-ءى الدىن الۋ شارالارى بارىسىندا انىقتالدى. بايلانىستا بولعاندار — 132، ءوز ءوتىنىشى بويىنشا — 279. بۇل شەكتەۋ جانە كارانتين شارالارىنىڭ بۇزىلۋىن، جەكە تۇلعالاردىڭ دا، زاڭدى تۇلعالاردىڭ دا الدىن الۋ شارالارىن ساقتاماعانىن راستايدى. جۇرت ءۇي جاعدايىندا ءبىز كورسەتكەن شارالاردى ساقتامايدى»، دەپ اتاپ ءوتتى سارحات بەيسەنوۆا.

ونىڭ مالىمەتىنشە، 60 جاستان اسقان ادامدار اراسىندا كۆي اۋرۋىنىڭ 2-3%-عا ءوسۋى بايقالادى.

قالالىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ تا دەنساۋلىق ساقتاۋ جۇيەسىنە شامادان تىس كۇش تۇسكەنىن اتاپ ءوتتى.

«قازىرگى ۋاقىتتا امبۋلاتونگ كەزەڭىندە 4 373 ناۋقاس جاتىر. قالادا كۇن سايىن 250 بريگادا جۇمىس ىستەيدى جانە پتر الادى. ستاتسيونارلاردا 1 112 ادام — ورتاشا جانە ورتاشا اۋىر جاعدايدا. قازىر جانساقتاۋ بولىمىندە جاتقان ادامداردىڭ سانى 100-دەن اسادى، ونىڭ ىشىندە 32 ادام — يۆل اپپاراتىندا»، دەدى قالالىق قوعامدىق دەنساۋلىق ساقتاۋ باسقارماسىنىڭ باسشىسى.

ونىڭ ايتۋىنشا، قازىر حالىق مۇنداي جۇكتەمەدەن بەيحابار. سەبەبى دەنساۋلىق ساقتاۋ جۇيەسى تىڭعىلىقتى دايىندالعان، ال ءدارىحانالار مەن ستاتسيونارلاردا، بولشەك ساۋدادا دارىلىك زاتتار قورى جەتكىلىكتى.

بۇل رەتتە دارىگەرلەر قالا تۇرعىندارىن ادام كوپ جينالاتىن جەرلەرگە بارماۋعا، سانيتارلىق نورمالار مەن كارانتيندىك تالاپتاردى ساقتاۋعا شاقىرادى. ولار ۆاكتسيناتسيانى قاۋىپتى ينفەكتسيامەن كۇرەسۋدىڭ ەڭ ءتيىمدى ءادىسى دەپ سانايدى. بۇل قالىپتى ومىرگە تەزىرەك ورالۋعا كومەكتەسەدى.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار