پرەزيدەنت • 16 ءساۋىر، 2021

پرەزيدەنتتىڭ سىبايلاس جەمقورلىققا قارسى ءىس-قيمىل جونىندەگى كەڭەستە سويلەگەن ءسوزى

1466 رەت كورسەتىلدى

مەملەكەت باسشىسى قاسىم-جومارت توقاەۆتىڭ سىبايلاس جەمقورلىققا قارسى ءىس-قيمىل جونىندەگى كەڭەستە سويلەگەن ءسوزى جاريالاندى، دەپ حابارلايدى Egemen.kz

پرەزيدەنت ءسوزىنىڭ ءماتىنىن مەملەكەت باسشىسىنىڭ ءباسپاسوز حاتشىسى بەرىك ءۋالي ءوزىنىڭ Facebook پاراقشاسىندا جاريالادى.

«مەنىڭ جارلىعىما سايكەس اليك جاتقامباي ۇلى شپەكباەۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى لاۋازىمىنان بوساتىلدى.

اگەنتتىكتە ونىڭ باسشىلىعىمەن جەمقورلىقپەن كۇرەستە اۋقىمدى جۇمىس اتقارىلدى.

وسى قۇرىلىمنىڭ قىزمەتى ايتارلىقتاي جاڭعىردى. جەمقورلىققا قارسى بىرقاتار جوبالار مەن باستامالار قولعا الىندى. سولاردىڭ قاتارىندا «ADALDYQ ALANY»، «ANTIKOR ORTALYGY»، «ADAL BILIM» جانە تاعى باسقالارى بار.

اليك جاتقامباي ۇلىنا وسى قىزمەتتەگى تابىستى جۇمىسى ءۇشىن العىس ايتامىن.

بۇگىن مەنىڭ جارلىعىما سايكەس سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى لاۋازىمىنا مارات مۇرات ۇلى احمەتجانوۆ تاعايىندالدى. مەملەكەتتىك قىزمەتتەگى تاجىريبەسى مول مامان. ادىلەت مينيسترلىگىندە، باس پروكۋراتۋرادا باسشىلىق لاۋازىمداردى اتقاردى. كەزىندە ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ ورىنباسارى بولدى. سوندىقتان مەن ونى وسى لاۋازىمعا تاعايىنداۋ تۋرالى شەشىم قابىلدادىم.

جالپى، مەملەكەتتىڭ قاۋىپسىزدىگى جانە حالىقتىڭ ءال-اۋقاتى جەمقورلىقپەن كۇرەستە جۇزەگە اسىرىلاتىن جۇيەلى ءارى ءتيىمدى شارالارعا تىكەلەي بايلانىستى.

وسىعان وراي، اگەنتتىك الدىندا بىرقاتار ماڭىزدى مىندەتتەر تۇر.

بىرىنشىدەن، سىبايلاس جەمقورلىققا قارسى ءىس-قيمىلدى بارلىق دەڭگەيدە ءتيىمدى جۇرگىزۋ ءۇشىن كەشەندى جۇمىس اتقارۋ قاجەت.

مۇنداي شارالار قىلمىستىق قۋدالاۋ ارەكەتىمەن عانا شەكتەلمەۋى كەرەك. ونداي ءتاسىلدىڭ كەرى اسەرى بولادى. مەملەكەتتىك اپپارات شەشىم قابىلداۋدان تارتىنىپ، بيۋروكراتياعا بوي الدىرادى جانە لاۋازىمدى تۇلعالار جەكە جاۋاپكەرشىلىك الۋدان جالتارادى.

اگەنتتىك جۇمىس بارىسىندا جىبەرىلەتىن قاتەلىكتەردى قاساقانا جاسالعان قىلمىستاردان اجىراتا بىلۋگە ءتيىس. سونداي-اق، كىنالى ادامدى قىلمىستىڭ بارلىق قۇرامى بولعان كەزدە عانا جاۋاپقا تارتۋى قاجەت.

ەكىنشىدەن، قوعام وكىلدەرىنىڭ بەلسەنە اتسالىسۋى جانە الدىن الۋ شارالارى سىبايلاس جەمقورلىققا قارسى كۇرەستىڭ باستى قۇرالدارىنا اينالۋى كەرەك.

قازىرگى تاڭدا مەنىڭ تاپسىرمام بويىنشا «قوعامدىق باقىلاۋ تۋرالى» زاڭ دايىندالىپ جاتىر.

بۇل قۇجات مەملەكەتتىك ورگانداردىڭ قوعام الدىنداعى اشىقتىعى مەن ەسەپتىلىگىن قامتاماسىز ەتۋدى كوزدەيدى. سونداي-اق، بەلسەندى ازاماتتارعا قۇقىقتىق باقىلاۋ قۇرالدارىن بەرەدى. وسى زاڭ جوباسىنىڭ الەۋەتىن بارىنشا پايدالانىپ، قوعامدى جەمقورلىقپەن كۇرەسۋگە كەڭىنەن تارتۋ قاجەت.

ۇشىنشىدەن، قىلمىستىق جولمەن الىنعان م ۇلىكتى ىزدەستىرۋ جانە تاركىلەۋ ىسىنە باسا ءمان بەرگەن ءجون. مۇنى «follow the money» قاعيداتى دەيدى.

قىلمىستىق جولمەن الىنعان دۇنيە-م ۇلىكتى تاركىلەۋ جونىندەگى بۇلجىماس قاعيدات سىبايلاس جەمقورلىققا قاتىستى كەز كەلگەن ءىس-ارەكەتتەن اۋلاق بولۋعا ىنتالاندىرۋعا ءتيىس. بۇل جۇمىستى اگەنتتىك قارجى مونيتورينگى ورگاندارىمەن بىرلەسىپ اتقارۋى كەرەك.

مەنىڭ تاپسىرمام بويىنشا قىلمىستىق پروتسەستىڭ ءۇش بۋىندى مودەلى ەنگىزىلىپ جاتىر. مۇنداي مودەل ايىپتاۋشىلىق ۇستانىمدى باسەڭدەتىپ، قىلمىستىق پروتسەسكە زاڭسىز ارالاسۋدى بولدىرمايدى.

اگەنتتىككە ءوز قىزمەتىن قىلمىستىق پروتسەستىڭ ءۇش بۋىندى مودەلىنە بەيىمدەۋدى تاپسىرامىن.

جالپى، حالىقارالىق وزىق تاجىريبەنى ەسكەرىپ، سىبايلاس جەمقورلىققا قارسى باستامالاردى ەنگىزۋدى جالعاستىرا بەرگەن ءجون.

قوعام، بيزنەس جانە ينۆەستورلار سىبايلاس جەمقورلىق قىسىمىنان ساقتايتىن مىقتى قورعان بار ەكەنىن سەزىنۋگە ءتيىس.

جاڭا باسشى اگەنتتىك جۇمىسىنىڭ تيىمدىلىگىن ودان ءارى ارتتىرا تۇسەدى دەپ سەنەمىن.

ەڭبەكتەرىڭىز جەمىستى بولسىن!»، دەدى مەملەكەت باسشىسى.

 

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار