«بۇگىن كوپتەگەن ەلدە ەكولوگيالىق ءبىلىم كۇنى اتالىپ وتۋدە. بۇل وتە ماڭىزدى كۇن دەپ ەسەپتەيمىن. قورشاعان ورتاعا, ەكولوگياعا قاتىناسىمىز ءبىلىم مەن تاربيەگە تىكەلەي بايلانىستى. الدىمىزدا قورشاعان ورتانى قورعاۋ سالاسىنداعى ءبىلىم بەرۋدى جەتىلدىرىپ, عالامشارىمىزدىڭ تۇراقتى دامۋىن قامتاماسىز ەتۋ مىندەتى تۇر. اعارتۋشىلىق جۇمىس ازاماتتارىمىزدىڭ, وسكەلەڭ ۇرپاقتىڭ جاۋاپكەرشىلىگىن كۇشەيتىپ, اكتۋالدى ەكولوگيالىق پروبلەمالارعا نازار اۋدارۋعا مۇمكىندىك بەرەدى», دەپ جازدى م. مىرزاعاليەۆ.
ۆەدومستۆو باسشىسى ەكولوگيانى جاقسارتۋ باعىتىنداعى جۇمىستار مەن شارالار تۋرالى حالىقتى اقپاراتتاندىرىپ وتىرۋدىڭ ماڭىزى تۋرالى دا اتاپ ءوتتى.
«بۇگىندە ەلىمىزدە ەكولوگيا ماسەلەلەرىن شەشۋ باعىتىندا اۋقىمدى جۇمىستار جۇرگىزىلىپ جاتىر. جاڭا ەكولوگيالىق كودەكس قابىلداندى, تومەنكومىرتەكتى دامۋ تۇجىرىمداماسى دايىندالۋدا, ۇلتتىق پاركتەردە ەكولوگيالىق ءتۋريزمدى دامىتۋ تۇجىرىمدامالارى ازىرلەندى, وڭىرلەردەگى ەكولوگيالىق ماسەلەلەردى شەشۋگە نەگىزدەلگەن جول كارتالارى جۇمىس ىستەپ تۇر. اتقارىلىپ جاتقان جۇمىستار تۋرالى ازاماتتارىمىزدى اقپاراتتاندىرۋ دا وتە ماڭىزدى, سەبەبى جوسپارلارىمىزدى ءبىز قوعامنىڭ قاتىسۋىنسىز ءساتتى جۇزەگە اسىرا المايمىز», دەدى مينيستر.
