ايماقتار • 13 ءساۋىر، 2021

تانىسىن قاتىگەزدىكپەن ولتىرگەن قىلمىسكەرگە سوت ۇكىمى شىقتى

1268 رەت كورسەتىلدى

قوستاناي وبلىسىنىڭ تۇرعىنى تانىسىنىڭ باسىن كەسىپ الىپ، كوشە بويىندا شەلەككە سالىپ جۇرگەن. سوت ۇكىمى بويىنشا وعان قاتاڭ جازا كەسىلەدى، دەپ حابارلايدى Egemen.kz

جانتۇرشىگەرلىك جايت بىلتىر، 3 جەلتوقسان كۇنى رۋدنىي قالاسىندا بولعان. 

«سوتتالۋشى سول كۇنى تانىسىنىڭ پاتەرىندە الكوگولدىك ىشىمدىك ىشكەن. تۇندە ەكەۋىنىڭ اراسىندا جانجال تۋىنداپ ب. ەسىمدى كۇدىكتى اس ءۇي پىشاعىمەن جابىرلەنۋشىنىڭ مويىن تۇسىنان بىرنەشە جەرگە پىشاق جاراقاتىن سالادى. سودان سوڭ باسىن كەسىپ العان. كەسىلگەن باستى شەلەككە سالىپ جابىرلەنۋشىنىڭ ۇيىنەن شىعىپ كەتەدى. الايدا پوليتسياعا ەرىكتى تۇردە ءوزى حابارلاسىپ كىناسىن مويىندادى»، دەلىنگەن سوت حابارلاماسىندا.

سوتتالۋشى 99-باپتىڭ 2-بولىگى بويىنشا كىنالى دەپ تانىلدى.

سوتتالۋشىنىڭ بۇرىن سوتتى بولماعانىن ەسكەرىپ، سونداي-اق ەرىكتى تۇردە پوليتسەيلەردى شاقىرىپ كىنالى ەكەنىن مويىنداعانى ءۇشىن سوت ونى قاتاڭ رەجىمدەگى قىلمىستىق-اتقارۋ جۇيەسى مەكەمەسىندە 16 جىلعا باس بوستاندىعىنان ايىردى.

سونىمەن قاتار سوتتالۋشىعا الكوگوليزمنەن ءماجبۇرلى تۇردە ەمدەۋ تاعايىندالدى. بۇدان بولەك، جابىرلەنۋشىنىڭ جالپى سوماسى 2 329814 تەڭگەنى قۇرايتىن تالابىن وتەپ بەرۋ تولىعىمەن قاناعاتتاندىرىلدى. ۇكىم ءالى زاڭدى كۇشىنە ەنگەن جوق.

 

گاۋحار قاپاش

سوڭعى جاڭالىقتار

ۇقساس جاڭالىقتار