ايماقتار • 14 ءساۋىر، 2021

سەس شارا قولدانباي وتىر: الماتىداعى اۋەزوۆ اۋدانىنىڭ اكىمى كارانتين ەرەجەسىن بۇزعان

31 رەت كورسەتىلدى

الماتى قالاسىنداعى اۋەزوۆ اۋدانىڭ باسشىسى كارانتيندىك نورمالاردى ساقتاماي، قىزمەتكەرلەرمەن بەتبە-بەت جينالىس وتكىزگەن، ءارى ول ءۇشىن جاۋاپقا تارتىلماعان، دەپ حابارلايدى Egemen.kz قالالىق سانيتارلىق-ەپيدەميالىق باقىلاۋ دەپارتامەنتىنە سىلتەمە جاساپ.

ونلاين بريفينگ بارىسىندا قالالىق سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى سادۋاقاس بايعابىلوۆ اۋدان اكىمىنىڭ نە سەبەپتى جاۋاپقا تارتىلماعانى تۋرالى ايتىپ بەردى.

سادۋاقاس بايعابىلوۆتىڭ ايتۋىنشا، كارانتيندىك شەكتەۋلەردى بۇزعان اۋدان اكىمى بۇل كۇندە اۋماقتىق مونيتورينگتىك توپتى باسقاراتىندىقتان، وسى ىستە مۇددەلەر قاقتىعىسى بار ەكەنىن راستادى.

«مۇندا مۇددەلەر قاقتىعىسى بار. ويتكەنى مونيتورينگ توپتاردى اۋدان اكىمدەرى ءوز باقىلاۋىنا الادى. وسى ماسەلەگە ءتيىستى شارالار قابىلداۋ ءۇشىن جوعارى ورگاندارعا جۇگىنۋ قاجەت»، دەدى سادۋاقاس بايعابىلوۆ.

سونىمەن قاتار ول اتالعان جايت تۋرالى ماتەريالدار سانيتارلىق-ەپيدەميالىق باقىلاۋ ورگاندارىنا جىبەرىلمەگەنىن جانە ولار تەك ءتيىستى دايەكتەر كەلىپ تۇسكەننەن كەيىن شارا قابىلدايتىنىن العا تارتادى.

«كارانتيندىك شارالاردى بۇزاتىن مەملەكەتتىك ورگانداردىڭ ءبىرىنشى باسشىلارىن جاۋاپقا تارتۋ جونىندەگى جاڭا باستامالار مەن تەتىكتەرىن قاراستىرۋ قاجەت. سونى نەگىزگە الا وتىرىپ، مونيتورينگتىك توپتاردىڭ جۇمىسى جونىندەگى الگوريتمگە ەنگىزۋ كەرەكتىگىن باسا ايتتى.

اۋدان اكىمى 20 ناۋرىزداعى قاۋلىنىڭ توعىزىنشى تارماعىن بۇزا وتىرىپ، كەمىندە ەكى رەت بەتپە-بەت كەزدەسۋلەر وتكىزگەن. 26 ناۋرىزدا وتكەن ءبىرىنشى جيىنعا جانداربەك بەكشيننىڭ ءوزى، سونداي-اق دەنساۋلىق ساقتاۋ ءمينيسترى جانە اكىمدىك قىزمەتكەرلەرى قاتىسقان.

ايتا كەتەرلىگى، كارانتيندىك تالاپتاردى ساقتاماعانى ءۇشىن ەشكىم جاۋاپقا تارتىلمايدى. اكىمدىك وكىلىنىڭ ايتۋىنشا، الماتى مەن سەس بيلىگى ەپيدەميالىق احۋالدىڭ كۇرت ناشارلاۋىنا بايلانىستى وتىرىس وتكىزۋ قاجەت بولعان. ول جيىنعا قاتىسۋشىلار قورعانىس قۇرالدارىن قولدانعانىن جانە پتر-تەست تاپسىرعانىن اتاپ ءوتتى. سانيتارلىق دارىگەردىڭ قاۋلىسىن بۇزعان ەكىنشى وتىرىستى 29 ناۋرىزدا الماتى قالاسى اۋەزوۆ اۋدانىنىڭ اكىمى سايران سايفەدەنوۆ وتكىزدى. كەزدەسۋدە كوپپاتەرلى تۇرعىن ۇيلەردى باسقارۋدىڭ جاڭا نىسانىنا كوشىرۋ تالقىلانعان دەسەدى.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار