ماۋلەن اشىمباەۆ سەناتتىڭ قاراۋىندا جاتقان زاڭ جوبالارى جونىندە حابارلادى. ولاردىڭ ىشىندە مەملەكەت باسشىسىنىڭ باستاماسىمەن ەنگىزىلگەن جەر قاتىناستارىن رەتتەيتىن تۇزەتۋلەر ەرەكشە ورىن الادى.
سپيكەر ءماجىلىس ماقۇلداعان زاڭ جوباسى وسى ايدىڭ اياعىنا دەيىن سەناتتىڭ وتىرىسىنا ەنگىزىلەتىنىن, سودان كەيىن قۇجات پرەزيدەنتكە قول قويۋعا جىبەرىلەتىنىن ايتتى.
ال سايلاۋ زاڭناماسىنا ەنگىزىلەتىن وزگەرىستەرگە كەلەر بولساق, سەناتورلار اتالعان زاڭ جوباسىنىڭ ءماجىلىس قاراۋىنان ءوتۋىن كۇتۋدە. ماۋلەن اشىمباەۆتىڭ ايتۋىنشا, سەنات بۇل ماسەلەنى مامىر ايىنىڭ ءبىرىنشى ونكۇندىگىندە قاراپ, ءتيىستى زاڭ جوباسىن قابىلداۋدى جوسپارلاپ وتىر.
سونىمەن قاتار سەنات توراعاسى پارلامەنتتىڭ جىل باسىنان بەرى ەۋرازيالىق ەكونوميكالىق وداق اياسىندا قول قويىلعان 8 حالىقارالىق شارتتى راتيفيكاتسيالاعانىن جەتكىزدى. قازىرگى ۋاقىتتا ارمەنيا مەن قىرعىزستاننىڭ ەۋرازيالىق ەكونوميكالىق وداققا قاتىسۋىنا بايلانىستى كەيبىر ماسەلەلەردى ايقىندايتىن كەلىسىمدەردى راتيفيكاتسيالاۋ جۇمىستارى جۇرگىزىلىپ جاتىر.
ماۋلەن اشىمباەۆ قاسىم-جومارت توقاەۆقا سەناتتا مۇمكىندىگى شەكتەۋلى جاندار ءۇشىن ينكليۋزيۆتى قوعامدىق ورتا قالىپتاستىرۋ ماسەلەسى بويىنشا جۇمىس توبى قۇرىلعانى تۋرالى ايتتى. بۇل جۇمىس توبى ۇلتتىق قوعامدىق سەنىم كەڭەسىنىڭ بەسىنشى وتىرىسىنىڭ قورىتىندىسى بويىنشا مەملەكەت باسشىسىنىڭ تاپسىرماسىمەن قۇرىلدى. سپيكەردىڭ ايتۋىنشا, زاڭناماعا ەنگىزىلەتىن ءتيىستى وزگەرىستەر مەن تولىقتىرۋلار بيىل ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ مينيسترلىكتەرىمەن بىرلەسىپ ازىرلەنەدى.
سەنات توراعاسى مەملەكەت باسشىسىنا سەناتورلاردىڭ قاتىسۋىمەن وتەتىن الداعى بىرقاتار حالىقارالىق ءىس-شارالار جونىندە مالىمەت بەردى.
