زاڭدى تۇلعالار دەپوزيتى بويىنشا تەك ءۇش قارجى ينستيتۋتى عانا – ForteBank, ەۋرازيالىق بانك جانە سيتيبانك ايلىق ديناميكادا ءوسىم كورسەتكەن. الايدا ءۇش اي قورىتىندىسى بويىنشا مينۋس كورسەتكىشكە يە. اي سايىنعى جانە ءۇش ايداعى ءوسىم بويىنشا كوشباسشىلىق تىزگىن ForteBank قولىندا تۇر. پورتفەلدى 154,5 ملرد تەڭگەگە ءوسىرىپ, تۇڭعىش رەت 1 ترلن تەڭگەلىك مەجەدەن اسىپ تۇسكەن. بۇل بانكتىڭ جاقىندا Global Finance نۇسقاسى بويىنشا «قازاقستان ۇزدىك بانكى» اتالىمىن جەڭىپ الۋى دا ونىڭ وتاندىق بيزنەستەگى ورنىن نىقتاي تۇسكەن سەكىلدى. ناۋرىز ايىنداعى قۇلدىراۋ ساتىندە بانكتىڭ ىسكەرلىك بەلسەندىلىگى كورپوراتيۆتىك سالىم بويىنشا 72,9 ملرد تەڭگە ءوسىم كورسەتتى. سونىمەن قاتار ءوسىم بويىنشا العاشقى ۇشتىكتە كورپوراتيۆتىك دەپوزيت مولشەرى 536,5 ملرد تەڭگەگە جەتكەن «بانك تسەنتركرەديت» (+ 29,5 ملرد تەڭگە) جانە 212,8 ملرد تەڭگەگە جەتكەن ۆتب بانك (+ 27,4 ملرد تەڭگە) بار.
ازىرگە ForteBank ەلدەگى ۇزدىك قارجى ينستيتۋتى بولىپ قالا بەرۋدە. 2018 جىلدان بەرى ۇزدىك بانك اتاعىن ەشكىمگە بەرگەن جوق. بىلتىرعى اكتيۆتەر ساپاسىن باعالاۋ AQR ناتيجەسى دە بانكتىڭ سەنىمدىلىگىن دالەلدەدى. ءدال قازىرگى ساتتە قارجى ينستيتۋتىنىڭ 20 فيليالى مەن 100-گە جۋىق بولىمشەسى جۇمىس ىستەيدى.
Finprom.kz مالىمەتى بويىنشا, زاڭدى تۇلعالار جيناقتاعان 10 ترلن تەڭگە ەلدەگى بۇكىل دەپوزيتتىڭ تەڭ جارتىسىن قۇرايدى. ياعني پاندەميانىڭ اۋىر سوققىسىنا قاراماستان, نارىقتاعى بەلسەندى ويىنشىلار ءوز ورىندارىن جانە تابىستارىن ساقتاپ قالا العان دەپ پايىمداۋعا نەگىز بار. رەسمي ستاتيستيكا بويىنشا قازاقستان اۋماعىندا بەلسەندى قىزمەت قىلاتىن 168,5 مىڭ كومپانيا بار.
ناۋرىز ايىنداعى جاعداي بويىنشا ەل اۋماعىندا جالپى سانى 463 مىڭ كاسىپورىن تىركەلگەن. بۇل 2020 جىلمەن سالىستىرعاندا 3 پايىزعا كوپ. ونىڭ 335,2 مىڭى قىزمەتىن توقتاتپاعان. تاعى 46,3 مىڭ كومپانيا نارىققا جاڭادان كەلگەن.
