«سالىمشىلاردىڭ وتىنىشتەرىنە سايكەس, الىنعان سومانىڭ شامامەن 33,5 پايىزى تۇرعىن ءۇيدى يپوتەكاسىز (تولىق ساتىپ الۋ) الۋعا, شامامەن 30 پايىزى يپوتەكالىق قارىزدى وتەۋگە, 23 پايىزدان استام سوما جاقىن تۋىستارىنا بەرۋگە جوسپارلانۋدا. سالىمشىلاردىڭ ارنايى شوتتارىنا كەلىپ تۇسكەن تولەمدەردىڭ ورتاشا سوماسى 5 ملن تەڭگەدەن اسادى. وتىنىشتەردىڭ باسىم بولىگى ماڭعىستاۋ وبلىسى (18%), ودان كەيىن الماتى (17,3%) جانە نۇر-سۇلتان (13,8%) قالالارىنىڭ تۇرعىندارىنان كەلىپ ءتۇستى», دەلىنگەن قور حابارلاماسىندا.
ەمدەلۋ ماقساتىندا ازاماتتار 3,5 ملرد تەڭگەدەن استام قارجى العان. ورتاشا ەسەپپەن العاندا ءبىر ءوتىنىش بويىنشا ەمدەلۋگە 1 ملن تەڭگە زەينەتاقى جيناقتارى اۋدارىلادى.
تەلەگرامداعى FINANCE.KZ كانالىنىڭ جازۋىنشا, جوبانىڭ ۋاكىلەتتى وپەراتورى سانالاتىن «وتباسى بانك» زەينەتاقى قارجىسىن ءوز شوتتارىندا ورنالاستىرۋ ارقىلى 2,42 ملرد تەڭگەگە جۋىق پايىزدىق تابىس الۋى مۇمكىن ەدى. بۇل قارجى – سالىمشىلار ءوز وتىنىشتەرىن دۇرىس تولتىرىپ, زەينەتاقى قارجىسى ارنايى شوتتا 10 كۇننەن ارتىق جاتپاعان جاعدايدا تۇسەتىن مينيمالدى سوما ەكەن.
«9 ساۋىردە «وتباسى بانك» ارنايى شوتىنا 1 ترلن تەڭگەدەن استام سوما كەلىپ ءتۇستى. بۇل قارجى بانكتىڭ ورتاق بالانسىنا ءتۇسىپ, قىسقا مەرزىمدى وپەراتسيالارعا قاتىسادى. بۇل رەتتە بانك كليەنتتەرگە ەشقانداي پايىزدىق تابىس ەسەپتەمەي, ونى تولىقتاي وزىندە قالدىرادى» دەپ جازادى كانال.
ءبىرىنشى كرەديتتىك بيۋرونىڭ مالىمدەۋىنشە, نارىققا مول اقشا كەلەدى ەكەن دەگەن سپەكۋليانتتىق كۇتىمنىڭ ءوزى-اق باسپانا باعاسىنىڭ شارىقتاپ كەتۋىنە اكەلىپ سوقتى.
«2020 جىلدىڭ ەكىنشى جارتىسىنان باستاپ ەكىنشى نارىقتاعى 1 شارشى مەتر تۇرعىن ءۇي باعاسى ايىنا 1 پايىزدان كەم ەمەس قارقىنمەن ءوستى. 2021 جىلدىڭ قاڭتارىندا جىلدامدىق 5 پايىزعا دەيىن ارتتى. جاڭا ۇيلەر باعاسى دا جىل باسىندا 3 پايىزعا قىمباتتادى. الايدا اقپانداعى باعا ءوسىمى قاڭتارمەن سالىستىرعاندا ءبىرشاما كەمىدى. بجزق-دان مول اقشا اعىنىنىڭ نەگىزگى بولىگى اقپاننىڭ العاشقى جارتىسىندا ءتۇستى: 322 ملرد تەڭگەدەن استام قاراجات. ساراپشىلاردىڭ پايىمداۋىنشا, زەينەتاقى جيناقتارىنىڭ ءبىر بولىگىنىڭ تولەم مولشەرلەمەسىنىڭ تومەندەۋىمەن (قاراجات اقپاننىڭ العاشقى 9 كۇنىنە قاراعاندا ناۋرىزدىڭ 25 كۇنىندە از اۋدارىلعان), مۇنداي وپەراتسيالاردىڭ سانى ازايادى, بۇل جالپى ديناميكاعا اسەر ەتۋى مۇمكىن» دەلىنگەن بيۋرو حابارلاماسىندا.
ۇلتتىق ستاتيستيكا بيۋروسىنىڭ اقپاراتى بويىنشا, اقپان ايىندا ەلىمىزدە 41 101 ساتىپ الۋ-ساتۋ كەلىسىمى جاسالعان. بۇل قاڭتارمەن سالىستىرعاندا 90,5 پايىزعا, 2019 جىلدىڭ اقپانىمەن سالىستىرعاندا 78,9 پايىزعا كوپ. 2021 جىلدىڭ قاڭتار-اقپان ايلارىندا تۇرعىن ءۇي ساتىپ الۋ بويىنشا 62 678 كەلىسىم جاسالىپتى.
