ايماقتار • 13 ءساۋىر، 2021

شىعىس قازاقستاندا ءبىر اپتا ىشىندە 22 ءورت تىركەلدى

9 رەت كورسەتىلدى

شىعىس قازاقستان وبلىسىندا 4 ساۋىردەن باستاپ وسى ۋاقىتقا دەيىن 22 رەت ءشوپ ورتەنگەن، دەپ حابارلايدى Egemen.kz

وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، اۋا رايىنىڭ كۇرت جىلىتۋىنا بايلانىستى وڭىردە ءورت قاۋپى كەزەڭى باستالعان. 4 ساۋىردەن باستاپ بۇگىنگە دەيىن 22 رەت ءشوپ ءورتى تىركەلدى. زايسان، گلۋبوكوە، بەسقاراعاي، ءۇرجار، بەسقاراعاي، تارباعاتاي، كوكپەكتى، اياگوز، جارما، كۇرشىم اۋداندارىندا جانە وسكەمەن، سەمەي قالالارىنداعى ءتىلسىز جاۋدىڭ جالپى اۋدانى 243،6 گەكتار ءشوپتى شارپىعان.

«ەلدى مەكەندەردە، اۋىل شارۋاشىلىعى القاپتارىندا قوقىستى ورتەۋ كەزىندە حالىقتىڭ وتتى ابايسىز پايدالانۋىنا بايلانىستى جانە تابيعات اياسىنداعى دەمالىس كەزىندە سوندىرىلمەگەن تەمەكى تۇقىلىنىڭ سالدارىنان ءورت سانى كۇرت ارتادى. ورمان-دالا ءورتىن بولدىرماۋ ماقساتىندا تجد قىزمەتكەرلەرى رەيدكە شىعىپ، حالىق اراسىندا ءتۇسىندىرۋ جۇمىسىن جۇرگىزۋدە. سونداي-اق جەرگىلىكتى پوليتسيا، ورمان شارۋاشىلىعى قىزمەتكەرلەرىنەن ءورت قاۋىپسىزدىگى تالاپتارىن بۇزۋشىلاردى انىقتاۋ ماقساتىندا ورمان القاپتارىن پاترۋلدەۋ ءۇشىن ءموبيلدى توپتار قۇرىلدى»، دەلىنگەن حابارلامادا.

ورمان جانە دالا القاپتارىندا ءورت قاۋىپسىزدىگى ەرەجەلەرىن بۇزعاندارعا قر اقبتك-ءنىڭ 336، 367، 410-باپتارىنا سايكەس اكىمشىلىك جاۋاپكەرشىلىك قاراستىرىلعان.

وسى رەتتە، ماماندار جانىپ تۇرعان سىرىڭكە، تەمەكى تۇقىلىن تاستاماۋ قاجەتتىگىن، ءورتتىڭ ورمان جانە دالا القاپتارىنان ەلدى مەكەندەرگە تارالىپ كەتۋىنە جول بەرمەۋ ءۇشىن جانعىش قوقىستى شىعارۋ جانە ەلدى مەكەندەردىڭ اۋماقتارىن جيناۋ قاجەتتىگىن ەسكە سالادى. ءورت شىققان جاعدايدا دەرەۋ «101»، «112» نومىرلەرىنە قوڭىراۋ شالۋ كەرەك.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار