رۋحانيات • 12 ءساۋىر، 2021

ەلگە كەرەك ەكى كىتاپ

46 رەت كورسەتىلدى

جۋىردا ەلورداداعى ۇلتتىق اكادەميالىق كىتاپحانا قازاقستاننىڭ بىرىككەن ۇلىبريتانيا كورولدىگىندەگى ەلشىلىگىمەن بىرلەسىپ بريتاندىق جۋرناليست ءارى جازۋشى نيك فيلدينگ كىتاپتارىنىڭ حالىقارالىق ونلاين تانىستىرىلىمىن وتكىزدى. Zoom بايلانىس پلاتفورماسىندا وتكەن باسقوسۋعا ۇلتتىق اكادەميالىق كىتاپحانا وكىلدەرى مەن كىتاپ اۆتورى نيك فيلدينگ، قازاقستاننىڭ ۇلىبريتانياداعى ەلشىلىگىنىڭ وكىلى ايگەرىم سەيسەمباەۆا، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ قاتىستى.

نيك فيلدينگتىڭ تىكەلەي رەداكتورلىعىمەن اعىلشىن تىلىندە جارىق كورگەن ءبىرىنشى كىتاپ «شوقان ءۋاليحانوۆتىڭ تاڭدامالى ەڭبەكتەرى: ۇلى دالا ەتنوگرافى جانە تاريحشىسى» دەپ اتالادى. قازاقتىڭ كورنەكتى عالىمىنىڭ شىعارمالارى تۇڭعىش رەت اعىلشىن تىلىندە كىتاپ بولىپ جارىق كورگەنى جايلى، ياعني، وسى ەڭبەك تۋرالى مالىمەت وتكەن جىلدىڭ سوڭىندا بەلگىلى بولعان ەدى.

جەلتوقسان ايىندا ۇلى­بريتانيا كورولدىگىنىڭ گەو­گرافيالىق قوعامىندا كىتاپ اعىلشىن ءتىلدى قاۋىمعا تانىس­تىرىلىپ، ەڭبەكتىڭ قۇندىلىعى تۋرالى ويلار ايتىلعان بولاتىن. شوقان ءۋاليحانوۆتىڭ ەسسەلەرى تۇڭعىش رەت 1865 جىلى اعىلشىن تىلىنە اۋدارىلىپتى. تۇگەلدەي ەمەس، بار-جوعى ءتورت ەسسە. مىنە، سودان بەرى اعىلشىن تىلىنە اۋدارىلىپ وتىرعانى وسى. بۇل جولى بريتاندىق اۋدارماشى ارچ تەيت جيىرما ەسسەنى تارجىمالاعان. Zoom پلاتفورماسىندا وتكەن ون­لاين تانىستىرىلىمدا «شوقان ءۋاليحانوۆتىڭ تاڭ­دا­مالى ەڭبەكتەرى: ۇلى دالا ەتنوگرافى جانە تاريحشىسى» كىتابىنىڭ رەداكتورى نيك فيلدينگ كىتاپتىڭ ش.ءۋاليحانوۆ اتىنداعى تاريح جا­نە ەتنوگرافيا ينستيتۋتىمەن ىنتىماقتاستىقتا كەمبريدج ۋنيۆەرسيتەتىنىڭ باسپاسىنان جارىق كورگەنىن ايتتى.

ينستيتۋتتىڭ ديرەكتورى زيابەك قابىلدينوۆ باس­تاعان عالىمدار شوقان ءۋالي­حانوۆتىڭ ورتالىق ازيانىڭ گەوگرافياسى، تاريحى، ەتنوگرافياسى جانە ەكونوميكاسىنا ارنالعان اسا ماڭىزدى عىلىمي ەڭبەكتەرىن اعىلشىن ارىپتەستەرىنە ۇسىن­عان. ءوز كەزەگىندە بۇل عىلى­مي ەڭ­بەك­تەردىڭ اعىلشىن عا­لىمدارى تاراپىنان جوعارى با­­عالانعانىن ەلشىلىكتىڭ وكىلى اي­گەرىم سەيسەمباەۆا اتاپ ءوتتى. ونىڭ ايتۋىنشا، كورنەكتى عالىمنىڭ شىعارمالارى كەم­بريدج ۋنيۆەرسيتەتىنىڭ ورتا­لىق ازيانى زەرتتەۋ بويىنشا باكالاۆريات باعدارلاماسىنا ەنگىزىلمەك.

نيك فيلدينگتىڭ ەكىنشى كى­تابى « ۇلى دالاداعى ساياحات­شى­لار» دەپ اتالادى. بۇل كىتاپتا ءحىىى عاسىردان باستاپ حح عاسىرعا دەيىنگى ارالىقتا ۇلى دالاعا سايا­حات جاساعان زەرتتەۋشىلەر تۋرالى ايتىلادى. كىتاپتا بەلگىلى، بەلگىسىز سەبەپتەرمەن اتتارى ۇمىتىلعان سايا­حاتشىلارعا با­سىمدىق بەرىلگەن. ولاردىڭ سايا­حات بارىسىندا كورگەن قيىن­دىقتارى، جەتىستىكتەرى مەن سات­سىزدىكتەرى سيپاتتالعان جازبالارى نازارعا الىنىپ، ولاردىڭ ەڭ قىزىقتارى وسى كىتاپقا توپ­تاستىرىلعان. ونلاين جۇز­دەسۋدە بريتاندىق جۋرناليست ءارى جازۋشى قوس كىتاپتىڭ دا اعىلشىن ءتىلدى وقىرمانعا ور­تالىق ازيا حالىقتارىنىڭ ەرەك­شەلىكتەرىن تانىتۋعا سەپتىگى مول بولاتىنىن جەتكىزدى.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار