الەم • 11 ءساۋىر، 2021

183 حالىقارالىق بايقاۋشى قىرعىزستانداعى رەفەرەندۋمدى باقىلايتىن بولادى

7 رەت كورسەتىلدى

الدىڭعى اقپاراتتارىمىزدا حابارلاعانىمىزداي، قىرعىز رەسپۋبليكاسىندا بۇگىن، 11 ءساۋىر كۇنى ساعات 08.00-دە جەرگىلىكتى كەنەشتەرگە سايلاۋ جانە جاڭا كونستيتۋتسيا جوباسى بويىنشا رەفەرەندۋم ءوتىپ جاتىر، دەپ حابارلايدى Egemen.kz كابار اگەنتتىگىنە سىلتەمە جاساپ.

ورتالىق سايلاۋ كوميسسياسىنىڭ توراعاسى نۇرجان شالدايبەكوۆا ءمالىم ەتكەندەي، ەل بويىنشا بارلىعى 2 483 سايلاۋ ۋچاسكەسى اشىلدى. جەرگىلىكتى كەنەشتەرگە سايلاۋ 448 قالا مەن اۋىلدا قۇرىلعان 2273 داۋىس بەرۋ پۋنكتىندە وتەدى.

«28 قالالىق كەنەشكە 59 پارتيا تىركەلگەن. 796 ورىنعا 11 782 كانديدات ءۇمىتتى. ورتاشا، 1 ورىنعا 59 پارتيادان كەلىپ وتىر. 420 اۋىلدىق كەنەش دەپۋتاتتىعىنا 18 772 ادام ءۇمىتتى. ءبىر 1 ورىنعا ورتاشا 2،5 ادامنان كەلەدى»، دەدى ول.

بارلىعى جەرگىلىكتى كەنەشتەر سايلاۋىنا 3 ملن 318 مىڭ 130 ەلەكتورات تىركەلگەن.

ال رەفەرەندۋمعا – 3 ملن 606 مىڭ 201. سونىمەن قاتار سايلاۋ بارىسىن 183 حالىقارالىق بايقاۋشى جانە قىرعىزستاننىڭ 11 قوعامدىق ۇيىمى باقىلايتىن بولادى.

اقپاراتتى شەتەلدىك جانە جەرگىلىكتى 179 باق تاراتادى. قىرعىزستان ازاماتتارىنا ءتۇرلى تۇستەگى ەكى بلانك، سونداي-اق جەگىلىكتى كەنەش سايلاۋىنا جانە رەفەرەندۋمعا قاتىسۋ ءۇشىن بيومەتريالىق سايكەستەندىرۋدەن وتۋگە ارنالعان ەكى چەك بەرىلەتىن بولادى.

جوگوركۋ كەنەش دەپۋتاتتارى «قىرعىز رەسپۋبليكاسىنىڭ كونستيتۋتسياسى تۋرالى» زاڭ جوباسى بويىنشا رەفەرەندۋم (بۇكىلحالىقتىق داۋىس بەرۋ) تاعايىنداۋ تۋرالى» زاڭ جوباسىن ماقۇلداپ، رەفەرەندۋمدى بيىلعى 11 ساۋىرگە بەلگىلەگەنىن بۇعان دەيىن جازعان بولاتىنبىز. جاڭا كونستيتۋتسيا جوباسىنداعى باستى ايىرماشىلىق – پرەزيدەنتتىك باسقارۋ نىسانىنا كوشۋ.

سونداي-اق دەپۋتاتتار سانىن 120-دان 90-عا دەيىن قىسقارتۋ ۇسىنىلىپ وتىر.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار