قر سىرتقى ىستەر مينيسترلىگىنەن ءمالىم ەتكەندەي, قازاقستان مەن ازەربايجان اراسىنداعى مادەنيەت جانە عىلىم سالاسىنداعى ۇزاق مەرزىمدى ىنتىماقتاستىق باعدارلاماسىن جۇزەگە اسىرۋ شەڭبەرىندە قازاقستان ەلشىسى سەرجان ابدىكارىموۆ ازەربايجاننىڭ ۇلتتىق عىلىم اكادەمياسىنىڭ ورتالىق عىلىمي كىتاپحاناسىندا بولىپ, ونىڭ ديرەكتورى مامەد اليەۆپەن كەزدەسۋ وتكىزدى.
اتالمىش كىتاپحانادا 7-14 ءساۋىر ارالىعىندا «قازاق ادەبيەتى اپتالىعى» وتۋدە.
م.اليەۆ بۇل جوبا ەكى مەملەكەتتىڭ ەكىجاقتى مادەني جانە عىلىمي ىنتىماقتاستىعىن نىعايتۋعا ەلەۋلى ۇلەس قوساتىنىن جەتكىزدى.
س.ابدىكارىموۆ ەكى ەل جاستارىنىڭ يگىلىگى ءۇشىن ءبىلىم بەرۋ, كىتاپ الماسۋ جانە عىلىمي زەرتتەۋلەر سالاسىنداعى بايلانىستاردى كەڭەيتۋدىڭ ماڭىزدىلىعىن اتاپ ءوتتى.
«كەزدەسۋ قورىتىندىسى بويىنشا تاراپتار كىتاپحانا ىسىندەگى عىلىمي-اقپاراتتىق ىنتىماقتاستىقتى جانداندىرۋعا, قازاقستان مەن ازەربايجاننىڭ عىلىمي كىتاپحانالارى مەن مەكەمەلەرى اراسىنداعى ءتيىستى كەلىسىمدەرگە قول قويۋعا كەلىستى», دەدى ءسىم-نەن.
