ۆەدومستۆو باسشىسى باعدات ءمۋسيننىڭ ايتۋىنشا, بۇدان بىلاي قازاقستاندا ءۇش بانك قارجىلىق قىزمەتتەردى ۇسىنۋ كەزىندە كليەنتتەردەن جەكە كۋالىكتى تالاپ ەتپەيدى.
– تسيفرلى قۇجاتتار سەرۆيسى قاشان ىسكە قوسىلادى دەپ ءبارى سۇرايدى. ءبىز ونى زاڭنامالىق تۇرعىدا بەكىتىپ, تەحنيكالىق جاعىنان جۇزەگە اسىرىپ قويدىق. ەندى تەك تەحنيكالىق ينتەگراتسيانى جەتىلدىرە ءتۇسۋ عانا قالدى. قازىردىڭ وزىندە ءۇش بانك كليەنتتەن قۇجات سۇراماۋعا دايىن. ولار بۇل جايىندا وزدەرىنىڭ پيار-ستراتەگياسىن ۇسىنۋ كەزىندە جاريالايدى, – دەيدى مينيستر.
ب.ءمۋسيننىڭ سوزىنشە, قازىر قۇجاتتاردىڭ تسيفرلى سەرۆيسىندە 13 قۇجات بار. سەرۆيس قاعاز قۇجاتتاردى ۇسىنۋ قاجەتتىگىن توقتاتادى. قازىرگى ۋاقىتتا اتالعان سەرۆيستە 9 قۇجات ۇسىنىلعان: قازاقستان ازاماتىنىڭ جەكە كۋالىگى, نەكەنى تىركەۋ جانە بۇزۋ تۋرالى كۋالىك, تۋ تۋرالى جانە اتى-ءجونىن اۋىستىرۋ تۋرالى كۋالىك, جۇرگىزۋشى كۋالىگى, ءبىلىمى تۋرالى ديپلوم, ستۋدەنت بيلەتى جانە پتر-تەست ناتيجەسى.
«اقپاراتتاندىرۋ تۋرالى» زاڭعا ەلەكتروندى قۇجاتتاردىڭ قاعاز قۇجاتتارمەن تەڭ دارەجەدە قولدانىلاتىنى تۋرالى نورما ەنگىزىلگەندىكتەن, بۇل قۇجاتتار لەگيتيمدى بولىپ سانالادى.
سونىمەن قاتار ەلەكتروندى جەكە كۋالىكتى نۇر-سۇلتان مەن الماتى قالالارى اراسىنداعى اۋە ساپارى كەزىندە دە قولدانۋعا بولادى. «ەير استانا» اۋە كومپانياسىنىڭ تۇراقتى رەيستەرىمەن ۇشاتىن جولاۋشىلار اۋەجايدا eGov Mobile قوسىمشاسى ارقىلى ەلەكتروندى جەكە كۋالىكتى كورسەتۋگە قۇقىلى. تسيفرلى قۇجاتتار سەرۆيسىن پايدالانۋشى ازاماتتار رەيسكە تىركەلۋ كەزىندە, ۇشار الدىنداعى تەكسەرۋدەن وتەر كەزدە قوسىمشا ارقىلى جاسالاتىن QR-كودتى كورسەتۋگە مىندەتتى. الداعى ۋاقىتتا تسيفرلى قۇجاتتار سەرۆيسى ەلىمىزدەگى بارلىق اۋەجايدا ەنگىزىلمەك. ازىرگە جوبا قاناتقاقتى رەجىمدە جۇزەگە اسىپ جاتقاندىقتان جولاۋشىلار وزىمەن بىرگە جەكە كۋالىگىن دە الىپ جۇرگەنى ابزال.
«تسيفرلى قۇجاتتار» – eGov Mobile ءموبيلدى قوسىمشاسىندا جەكە ەلەكتروندى قۇجاتتاردى ساقتايتىن سەرۆيس. سونداي-اق بۇل قىزمەت ازاماتقا ونىڭ كەلىسىمى بويىنشا ءۇشىنشى تۇلعالارعا قۇجاتتارعا قول جەتكىزۋگە مۇمكىندىك بەرەدى. ول ءۇشىن «تسيفرلى قۇجاتتارعا» كىرىپ, قاجەتتى قۇجاتتى اشىپ, «قولجەتىمدىلىكتى اشۋ» باتىرماسىن باسۋ جەتكىلىكتى. وسىدان سوڭ ءۇشىنشى تاراپتىڭ ءبىر رەتتىك سكانەرلەۋى ءۇشىن بىرەگەي QR-كود جاسالادى.
