كوللاجدى جاساعان امانگەلدى قياس, «ەQ»
اتاپ ايتقاندا, مەملەكەتتىك باقىلاۋ جەلىسى بويىنشا – 11, تەحنيكالىق رەتتەۋ بويىنشا – 21, سەرتيفيكاتتاۋ جانە اككرەديتتەۋ بويىنشا – 9, مەترولوگيا جانە مەملەكەتتىك قىزمەتتەر بويىنشا 11 نورماتيۆتىك-قۇقىقتىق اكتىنى ازىرلەۋى كەرەك. ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى ۇلتتىق اككرەديتتەۋ ورتالىعى باس ديرەكتورىنىڭ ءبىرىنشى ورىنباسارى قاينار تايجانوۆتىڭ ايتۋىنشا, اتالعان قۇقىقتىق اكتىلەر اككرەديتتەۋ ءراسىمىن جەتىلدىرۋگە دە قاتىستى بولماق. ياعني قاۋىپتى ءونىمنىڭ ۇلگىلەرىن ىرىكتەۋ پراكتيكاسىن ەنگىزۋ, ءونىمدى الۋ جانە كەرى قايتارىپ الۋ تەتىكتەرىن رەگلامەنتتەۋ, نارىقتى قاداعالاۋ ينستيتۋتىن ەنگىزۋ, باقىلاۋ جانە قاداعالاۋ پروتسەسىن تسيفرلاندىرۋ قاجەت.
– «سۇر» جانە «قارا» سەرتيفيكاتتاۋعا قارسى كۇرەسكە باسا نازار اۋدارىلادى. وسى مىندەت شەڭبەرىندە بيىل ەۋروپالىق جۇيەدەگى قاۋىپتى ونىمدەر ءتىزىلىمىن ەنگىزۋ جوسپارلانعان. سونداي-اق ەلەكتروندى مەملەكەتتىك باقىلاۋ جۇيەسىن ەنگىزۋ, ستاندارتتاردىڭ جاڭا ينتەرنەت-دۇكەنىن ىسكە قوسۋ مىندەتى تۇر. ايتا كەتەيىك, بارلىق مەملەكەتتىك ستاندارتتار قازاقستان اۋماعىندا تەگىن جۇزەگە اسىرىلادى. بيىلعى جاڭاشىلدىق وسى. ستاندارتتاردى ساراپتاۋدى جوسپارلاۋدى ازىرلەۋ پروتسەسىن تسيفرلاندىرۋ جۇمىس كەزىندە وندىرۋشىلەر مەن بيزنەس-قوعامداستىققا كوبىرەك ينتەگراتسيالانۋعا جانە ءوز مۇددەلەرىن قورعاۋعا جول اشادى, – دەدى ق.تايجانوۆ ورتالىق كوممۋنيكاتسيالار قىزمەتىندە وتكەن بريفينگتە.
وسىلايشا, ولشەم بىرلىكتەرىن قامتاماسىز ەتۋدىڭ مەملەكەتتىك جۇيەسىنىڭ ەلەكتروندىق ءتىزىلىمىن ەنگىزۋ ءونىمدى وندىرىسكە شىعارۋدا كاسىپكەرلەر مەن وندىرۋشىلەردىڭ شىعىنىن ەداۋىر ازايتپاق. مەترولوگيالىق قىزمەت كورسەتۋ پروتسەستەرىن تسيفرلاندىرۋ دا ماڭىزدى. بۇل دەگەنىمىز – سايكەستىكتى ەلەكتروندى باعالاۋدى ەنگىزۋ. ياعني ءونىمدى اينالىسقا جەدەل شىعارۋ ءۇشىن سەرتيفيكاتتاۋ جانە دەكلاراتسيالاۋ پروتسەستەرىن جۇرگىزۋ كەرەك.
– ەلەكتروندى اككرەديتتەۋدى دامىتۋ, مەترولوگيانى تەحنيكالىق رەتتەۋدىڭ ينتەراكتيۆتى كارتاسىن ەنگىزۋ, جالپى وسىناۋ جۇمىس تۇرلەرى كاسىپكەرلەردىڭ دە, وندىرۋشىلەردىڭ دە تىكەلەي قاتىسۋىن قاجەت ەتەدى. سوندىقتان قوعامنىڭ, سالالىق كاسىپكەرلەردىڭ بىرلەستىكتەرىن بارىنشا تىعىز ىنتىماقتاستىققا جانە وسى جۇمىستاردى بىرلەسىپ جۇرگىزۋگە شاقىرامىن. مۇنى سوڭىنا دەيىن جەتكىزۋ كەرەك, – دەدى ق.تايجانوۆ.
ەسكە سالا كەتەيىك, قازىرگى كەزدە مەملەكەتارالىق ستاندارتتاۋ جۇيەسىن جەتىلدىرۋ جۇمىستارى جۇرگىزىلۋدە. وسى جىلدىڭ 1 ساۋىرىندە سەناتتىڭ جالپى وتىرىسىندا مەملەكەتارالىق ستاندارتتاۋ جونىندەگى قۇجاتتاردى تاراتۋ تۋرالى كەلىسىمدى مەملەكەتتىك راتيفيكاتسيالاۋعا ارنالعان زاڭ جوباسى ۇسىنىلىپ, قابىلداندى. جوبانىڭ ماقساتى – تمد ەلدەرى اراسىندا مەملەكەتارالىق ستاندارتتاۋ جونىندەگى قۇجاتتاردى تاراتۋدىڭ بىرىڭعاي قاعيداتتارىن قالىپتاستىرۋ.
– بۇل جۇمىس كەلەسىدەي قۇرالدار ارقىلى جۇزەگە اسىرىلادى. ءبىرىنشى – ستاندارتتاردى تاراتۋعا تەك ءبىر عانا ۇيىم قۇقىلى. بۇل ستاندارتتاۋ جونىندەگى ۇلتتىق ورگان نەمەسە ول ۋاكىلەتتىلىك بەرگەن ۇيىم بولۋى مۇمكىن. «ستاندارتتاۋ تۋرالى» زاڭىنا سايكەس, بۇل فۋنكتسيا قازاقستان مەترولوگيا جانە ستاندارتتاۋ ينستيتۋتىنا بەكىتىلگەن. ەكىنشى – تمد ەلدەرىنىڭ مەملەكەتارالىق ستاندارتتاردى رۇقساتسىز تاراتۋدان قورعاۋ زاڭنامالىق تۇرعىدان بەكىتىلۋى قاجەت. مۇنداي فاكتىلەردى انىقتاۋ ۇلتتىق زاڭنامامىزبەن بەكىتىلمەگەن. وسىعان بايلانىستى ستاندارتتاردى رۇقساتسىز تاراتقانى ءۇشىن اكىمشىلىك ايىپپۇل سالۋ بويىنشا ۇسىنىستار ازىرلەنىپ, ادىلەت مينيسترلىگىنە جىبەرىلدى. سونىمەن قاتار ءوزارا ءىس-قيمىلدى ۇيلەستىرۋ ستاندارتتار جونىندەگى بيۋرو ارقىلى ورتالىقتاندىرىلىپ, جۇزەگە اسىرىلاتىن بولادى. مۇنداي ءتاسىل ىسكە اسىرىلاتىن مەملەكەتارالىق ستاندارتتاردى ورتالىقتاندىرىلعان ەسەپكە الۋدى, ولاردى پايدالانۋدىڭ زاڭدىلىعى مەن قاجەتتىلىگىن قامتاماسىز ەتۋگە باعىتتالعان, – دەپ ناقتىلادى ۇلتتىق اككرەديتتەۋ ورتالىعى باس ديرەكتورىنىڭ ءبىرىنشى ورىنباسارى.
بۇگىندە كەلىسىمگە بىرقاتار ەل قول قويعان. ال رەسەي فەدەراتسياسى, بەلارۋس رەسپۋبليكاسى, قىرعىزستان جانە مولدوۆا رەسپۋبليكاسى مەملەكەت ىشىندەگى راسىمدەردى اياقتادى. ناتيجەسىندە, مەملەكەت ءۇشىن مەملەكەتارالىق ستاندارتتاردى زاڭدى ساتۋ, ولاردى زاڭناماعا بەيىمدەۋ ءۇشىن قۇقىقتىق نەگىز جاسالادى. ال بيزنەستىڭ شىعىندارى ازايادى. جالپى العاندا, كەلىسىمنىڭ قابىلدانۋى تاۋارلاردىڭ ەركىن قوزعالىسىنا جانە حالىقارالىق ساۋدا جەلىسىنىڭ ىقپالداسۋىنا جول اشپاق.
