ءدۇبىرلى دودادا نۇر-سۇلتان قالاسىنىڭ كومانداسى ءبىرىنشى ليگادا ەل چەمپيونى اتاندى.
ەلىمىزدىڭ بارلىق وڭىرىنەن ۇزدىك كوكپارشىلار قاتىسقان جارىستا ءبىزدىڭ شاباندوزدار 4 كەزدەسۋ وتكىزىپ تورتەۋىندە دە ايقىن باسىمدىقپەن جەڭىسكە جەتتى. 30 ناۋرىزدا ماڭعىستاۋ وبلىسىنىڭ سپورتشىلارىمەن وتكەن ويىندا سپورتشىلارىمىز 6:3 ەسەبىمەن ۇتسا, كەلەسى كۇنى اقتوبە وبلىسى كوكپارشىلارىمەن بولعان كەزدەسۋ 8:2 ەسەبىمەن ءبىزدىڭ جىگىتتەردىڭ پايداسىنا شەشىلدى.
شىمكەنت قالاسىنىڭ كوكپارشىلارىن دا 10:2 ەسەبىمەن ويسىراتا جەڭدى. ال 4 ءساۋىر كۇنى قۇرامانىڭ كەزەكتى قارسىلاسى پاۆلودار قالاسىنىڭ قۇراماسى ويىنان باس تارتىپ, جەڭىس ءبىزدىڭ سپورتشىلاردىڭ ەنشىسىندە قالدى. اقتىق سىندا قاراعاندى وبلىسىن 7:2 ەسەبىمەن ۇتىپ, ەلوردا كوكپار قۇراماسى ءبىرىنشى ليگا چەمپيوندارى اتاندى.
«سپورتشىلاردىڭ دايىندىعى جانە جىلقىلاردى دايىنداۋ تۇرعىسىنان ۇلكەن جۇمىس جۇرگىزىلدى. وڭتۇستىك پەن سولتۇتسىك ايماقتىڭ اراسىنداعى كليماتتىق ايىرماشىلىققا قاراماستان, وڭتۇستىكتە وقۋ-جاتتىعۋ جيىندارى وتكىزىلدى. جىلقىلار بەيىمدەلە الدى, سپورتشىلار فيزيكالىق تۇرعىدان دايىن بولدى, سوندىقتان ويىن جاقسى ءوتتى. جىگىتتەر قورعانىستا دا, جەكپە-جەكتە دە بارىن سالدى. ارى قارايعى باستى ماقساتىمىز – جوعارى ليگاداعى ۇزدىك ۇشتىككە ەنۋ», دەدى «نۇر-سۇلتان» كوكپار كلۋبىنىڭ ديرەكتورى دونيار يبراەۆ.
ەلوردا كومانداسىنىڭ ساپىندا قازبەك امانگەلدينوۆ, نۇربولات قارتقوجاق, اسقار وڭعارباەۆ, ازامات حاسەنوۆ, اباي ەرەجەپ, جاقسىلىق امالبەكوۆ, ەلدوس تىلەبالديەۆ, مەيىرجان ءماتجان, ۆلاديرمير كيل, اليجان قاتتابوسىنوۆ, ارسلان قابجانوۆ, ەلجاس ەسەنگەلدى سىندى شاباندوزدار ونەر كورسەتتى.
