ونىڭ ايتۋىنشا, باكالاۆرياتقا تۇسۋشىلەر مىندەتتى تۇردە ۇبت تاپسىرىپ, سول سەرتيفيكاتپەن ءتيىستى بازاعا تىركەلەدى. وسىلايشا, كونكۋرسقا قاتىسىپ, سول باللمەن گرانت ۇتىپ الۋى مۇمكىن.
«ال ماگيستراتۋراعا كەلسەك, ول دا ەكى جىلدان بەرى ۇبت سياقتى تەستىلەۋ فورماتىندا وتكىزىلىپ كەلەدى. ءار ۋنيۆەرسيتەت ءوز بيلەتتەرىن, تاپسىرمالارىن دايىنداپ, وزدەرى تەكسەرىپ, شەشىم قابىلدايدى. ءارتۇرلى تاۋەكەلدەر بولدى, سوندىقتان ماگيستراتۋراعا قابىلداۋ تەتىگىن, جالپى ءراسىمىن وزگەرتتىك. الدىڭعى جىلى دا, بيىل دا, ماگيستراتۋراعا قابىلداۋ ەلەكتروندى فورماتتا ناقتى تەستىلەۋدىڭ, ورتالىقتاندىرىلعان تەست ناتيجەسىندە جۇرگىزىلەدى. ولار ءوز قۇجاتتارىن تاپسىرىپ, جيناعان باللدارىنا قاراي گرانت ۇتىپ الۋى مۇمكىن», دەدى مينيستر.
پاندەمياعا بايلانىستى سوڭعى كۋرستا وقيتىن ستۋدەنتتەر مەن ماگيسترانتتاردىڭ ديپلوم قورعاۋىنا دا بىرقاتار وزگەرىستەر ەنگىزىلدى.
«قازىرگى كەزدە ستۋدەنتتەردىڭ كوبىسى قاشىقتان, كەيبىرى جاتاقحانادا جاتىپ وقىپ جاتىر. كوپتەگەن مۇعالىمدەر دە, وقىتۋشىلار دا قاشىقتان وقىتۋ فورماتىندا بولعاننان كەيىن ولاردىڭ ديپلومدارىن, ءارى ماگيسترلاردىڭ ديسسەرتاتسيالارىن قورعاۋ ءراسىمىن ەلەكتروندى فورماتتا وتكىزۋگە بولادى. ءموردىڭ, قولدىڭ قويىلۋى سياقتى مىندەتتى تالاپتاردى دا الىپ تاستادىق. قازىر ءتۇسىندىرۋ جۇمىستارى جۇرگىزىلۋدە», دەدى ا.ايماعامبەتوۆ.
بعم باسشىسى قازىرگى ۋاقىتتا PhD ديسسەرتاتسيالارىن دا ونلاين تۇردە قورعاۋعا مۇمكىندىك بەرىلگەنىن اتاپ ءوتتى. بۇل حالىقارالىق تاجىريبە. باستىسى, ساپانى تومەندەتپەۋ. وسى باعىتتا ءتيىستى جۇمىستار جۇرگىزىلۋدە.
