– يران – قازاقستاننىڭ تاياۋ شىعىستاعى ماڭىزدى سەرىكتەستەرىنىڭ ءبىرى. زامان قالاي قۇبىلسا دا, ەلدەرىمىز اراسىنداعى جاقسى قارىم-قاتىناستار ۇزىلگەن جوق. حالىقارالىق احۋال ءوزارا ىنتىماقتاستىعىمىزدىڭ دامۋىنا اسەر ەتپەدى. ءبىز بۇل جاعدايدى جوعارى باعالايمىز. وسى مۇمكىندىكتى پايدالانا وتىرىپ, يران پرەزيدەنتى حاسان رۋحانيعا جۇرەكجاردى سالەمىمدى جولدايمىن, – دەدى قاسىم-جومارت توقاەۆ. 
ءوز كەزەگىندە موحامماد دجاۆاد زاريف قازاقستان پرەزيدەنتىنىڭ قوناقجايلىق تانىتقانىنا العىس ايتىپ, نۇر-سۇلتان قالاسىنا تاعى دا كەلۋگە قۋانىشتى ەكەنىن اتاپ ءوتتى.
سىرتقى ىستەر ءمينيسترى يران پرەزيدەنتى حاسان ءرۋحانيدىڭ سالەمى مەن ناۋرىز مەرەكەسىنە بايلانىستى قۇتتىقتاۋىن جەتكىزدى. سونداي-اق حاسان ءرۋحانيدىڭ قازاقستان پرەزيدەنتى قاسىم-جومارت توقاەۆتى وزىنە ىڭعايلى ۋاقىتتا يرانعا رەسمي ساپارمەن كەلۋگە شاقىرعانىن ناقتىلادى.
– ءبىز ءسىزدىڭ ەلىڭىزبەن اراداعى ىنتىماقتاستىقتىڭ دامۋىنا زور ءمان بەرەمىز. قازاقستان وڭىردەگى جاقىن كورشىلەرىمىزدىڭ ءارى دوستاس مەملەكەتتەرىمىزدىڭ ءبىرى, – دەدى موحامماد دجاۆاد زاريف.
كەزدەسۋ بارىسىندا تاراپتار ەكىجاقتى ىنتىماقتاستىقتى تالقىلاپ, وڭىرلىك جانە جاھاندىق كۇن تارتىبىندەگى وزەكتى ماسەلەلەر بويىنشا پىكىر الماستى.
