مەملەكەت باسشىسى پرەزيدەنت اكىمشىلىگىنىڭ قۇرىلىمىندا وسى جاڭا لاۋازىمنىڭ بەكىتىلۋى جاھاندىق جانە وڭىرلىك كۇن ءتارتىبىنىڭ جىلدام وزگەرۋى كەزىندە حالىقارالىق ىنتىماقتاستىق ماسەلەسىنە ەل باسشىلىعى تاراپىنان ەرەكشە نازار اۋدارىلاتىنىن اتاپ ءوتتى.
پرەزيدەنت ارناۋلى وكىل قىزمەتىنىڭ باستى باسىمدىقتارى رەتىندە COVID-19 پاندەمياسىنىڭ اۋىر سالدارىن ەڭسەرۋ, ۇلتتىق ەكونوميكانى جانە الەۋمەتتىك سالانى جەدەل قالپىنا كەلتىرۋ ماقساتىندا سىرتقى رەسۋرستاردى تارتۋ ءۇشىن شەتەلدىك ارىپتەستەرمەن تىعىز بايلانىستاردى ارتتىرۋ قاجەتتىگىنە توقتالدى.
وسىعان بايلانىستى كەزدەسۋدە تسيفرلىق جانە جاسىل تەحنولوگيالارعا باسا ءمان بەرىلىپ, وزىق ينۆەستيتسيالىق جوبالاردى ىسكە اسىرۋدا, كوپجاقتى قارجى-ەكونوميكالىق ۇيىمدارمەن ىنتىماقتاستىقتى ارتتىرۋدا, دۇنيەجۇزىلىك ساۋدا ۇيىمى اياسىندا جاڭارتىلعان الەمدىك ساۋدا ارحيتەكتۋراسىن قالىپتاستىرۋدا قازاقستاننىڭ بەلسەندى اتسالىسۋى قاجەت ەكەنىنە نازار اۋدارىلدى.
سونىمەن قاتار ەرجان قازىحانوۆقا گۋمانيتارلىق سالا, كليمات ديپلوماتياسى, سونداي-اق, قازاقستاننىڭ نەگىزگى سىرتقى ساياسي باستامالارىن ىلگەرىلەتۋ سياقتى حالىقارالىق ىنتىماقتاستىقتاعى ماڭىزدى مىندەتتەر جۇكتەلدى.
جوعارىدا اتالعان مىندەتتەردى ەسكەرە وتىرىپ, قاسىم-جومارت توقاەۆ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ بارىسىندا وتاندىق جانە شەتەلدىك زەرتتەۋ ورتالىقتارىمەن, قازاقستاننىڭ ازاماتتىق قوعامىمەن كەرى بايلانىس ورناتۋدىڭ ماڭىزدىلىعىن اتاپ ءوتتى.
پرەزيدەنت سىرتقى ىستەر ءمينيسترى, پرەزيدەنت كومەكشىسى, بۇۇ جانە ەقىۇ جانىنداعى قر تۇراقتى وكىلى, اۆسترياداعى, ۇلىبريتانيا مەن اقش-تاعى ەلشى سياقتى جاۋاپتى قىزمەتتەردەگى جۇمىس تاجىريبەسى ە.قازىحانوۆقا وزىنە جۇكتەلگەن جاڭا مىندەتتەردى ابىرويمەن اتقارۋعا سەپتىگىن تيگىزەتىنىنە سەنىم ءبىلدىردى.
