بۇگىنگى تۇركىستان – اتا-بابالار اماناتىنا, الاش اسىلدارىنىڭ اماناتىنا ادالدىقتىڭ ايقىن ايعاعى.
بۇگىنگى تۇركىستان – «بولاشاققا باعدار: رۋحاني جاڭعىرۋ» باعدارلاماسىنىڭ ايرىقشا ءارى ناقتىلى ناتيجەسى. جەمىسى مەن جەڭىسى.
ارينە, تۇركىستاندى تۇركىلەر ءتورى كۇيىندە تەرەڭ تۇسىنبەككە تاعىلىمدايتىن, ۇلىلىعىن ۇجدان ۇناسىمدارىمەن ۇعىندىراتىن الەم – ازىرەت سۇلتان الەمى. ياعني, ياساۋي كەسەنەسى. تايقازان باستاعان جاۋھار جادىگەرلەر. تۇركىستان شاھارىنىڭ تۇبىندە تۋىپ-وسكەن تەمىرحان مەدەتبەك:
«لايلاسا – قايتا تۇنار تۇنىقپىن,
كومسە جەرگە – ءونىپ شىعار ۇرىقپىن.
الىپ قازان,
بەرىك قازان,
تايقازان – قازانى بۇل, قازانى بۇل رۋحتىڭ!» - دەپ جىرلاعان.
ءيا, تۇركىتىلدەس مەملەكەتتەر باسشىلارىنىڭ ءسامميتى ونلاين فورماتىندا ءوتىپ جاتتى. ال تۇركىستانىمىز جىل سايىن, اي سايىن ەمەس, ءتىپتى ساعات سايىن ءوسىپ-ءونىپ, وركەندەپ-ورلەپ بارا جاتقانداي كورىندى. احمەت ياساۋي ەسكەرتكىشىنىڭ تۇبىندە جاستار قىزعالداق ەگىپ ءجۇر. مەنىڭ قۇرداسىم مەدەتبەكتىڭ جوعارىداعى «تايقازان» جىرىن جاتقا ايتادى. انە, تاعى دا ءبىرى ۇلىقبەك ەسداۋلەتتىڭ ولەڭىن وقي باستادى:
«قوينىڭدا قىرۋار حيكمەت ءبىلىمى جاتىر,
مۇسىلىمدەردىڭ مارحابات ءىلىمى جاتىر.
قاسيەتىڭ مەن كيەڭدى مويىندادى الەم,
الدىڭا كەلىپ, باس ءيىپ, جۇگىنىپ اقىر.
ىنتىعىپ نەگە ۇمتىلار ساعان مۇنشا ادام,
قانشاما اقىن جىر ارناپ, قالام جۇمساعان؟!
« ۇلىلىق دەگەن نە؟» دەسە, كورسەتەم سەنى,
«قاسيەت دەگەن نە؟» دەسە, قارايمىن ساعان!»
- دەيدى اقيىق اقىن.
اي, اينالايىن, الاش اسىلدارى-اي... مۇستافا شوقاي: «تۇركىستان, تۇتاس بول!», تۇرار رىسقۇل ۇلى: «تۇركىتىلدەس, تۇگەل بول!» - دەمەپ پە ەدى؟! ساڭلاقتاردىڭ ءسامميتى – اماناتتارعا ادالدىق. ابزالدىق. تۇركىستان دەكلاراتسياسى – دالەل مەن دايەكتىڭ ءبىر پاراسى. ەلباسى قىرعىزستاندا وتكەن سامميتتە تۇركىستانعا, احمەت ياساۋيگە ەرەكشە نازار جىققان. كەشەگى كەلەلى جيىندا دا كەمەل ويلارىن ورتاعا سالدى. قازاقستان پرەزيدەنتى قاسىم-جومارت توقاەۆ تۇركىستان شاھارى مەن ياساۋي ماسەلەسىن تۋ ەتىپ كوتەرۋدى مانىستەدى.
ىزگىلىك ىلىمدەرىن, ادامدىق قادىر-قاسيەت حاقىنداعى حيكمەتتەرىن حۇسني حاتتاردايىن قۇنارلاندىرىپ, تۇركى تىلىندە تاعىلىمداپ, قايتكەندە تۇركى جۇرتىنىڭ كوزىن اشامىن, كوڭىلىن كوركەيتەمىن, كوكىرەگىن وياتامىن دەپ, ۇيقى-كۇلكى كورمەگەن كورەگەنىمىز – احمەت اتامىزدىڭ ارۋاعى ريزا بولعاي.
تۇركىستان تۇرلەنە تۇسەر. ىندەتتەر دە شەگىندى. بۇل ءۇشىن دە بىرلىك پەن ىنتىماق, ىرىستى ەڭبەك, جوعارى جاۋاپكەرشىلىك كەرەك.
تۇركىلەر ءتورى – تۇركىستان تۇلەي بەرەر. تۇركىتىلدەس مەملەكەتتەر باسشىلارى – باۋىرلارىمىز تالاي كەلەر. «قوش كەلدىڭىزدەر!» دەرمىز. باسشىلار عانا ەمەس, تۇركىتىلدەس بارشا تۋىستار, باسقا دا تۋريستەر ءساتتى ساپارلار شەگەر. اللا الدان جارىلقاعاي!
مارحابات بايعۇت,
جازۋشى, قازاقستاننىڭ ەڭبەك سىڭىرگەن قايراتكەرى,
حالىقارالىق «الاش» جانە «تۇركى الەمىنە قىزمەت» سىيلىقتارىنىڭ لاۋرەاتى
