بيىل شەگىرتكە وشاقتارىن انىقتاۋ ءۇشىن GPS ناۆيگاتورلاردى پايدالانا وتىرىپ, 524 بىرلىك اۆتوكولىك پەن 1230 تەكسەرۋشىنى جۇمىلدىرۋ ارقىلى شامامەن 38 ملن گەكتار جەردى تەكسەرۋ جوسپارلانۋدا. سونداي-اق شەكارالاس رەسەي, قىتاي جانە وزبەكستان مەملكەتتەرىمەن بىرلەسكەن زەرتتەۋلەر جۇرگىزۋ جوسپارلانعان.
قازىرگى ۋاقىتتا ەلىمىزدىڭ وڭتۇستىك وڭىرلەرىندە تەكسەرۋ جۇمىستارى باستالدى. كوكتەمگى تەكسەرۋ – قىستاپ شىققان شەگىرتكەلەردىڭ جاي-كۇيىن انىقتاۋعا جانە حيميالىق وڭدەۋ جۇرگىزۋ ءۇشىن جاعدايدى بولجاۋعا مۇمكىندىك بەرەدى.
اعىمداعى جىلى رەسپۋبليكا بويىنشا شەگىرتكە زيانكەستەرىنىڭ 640 مىڭ گەكتار القاپتا تارالۋى بولجانۋدا. شەگىرتكەمەن كۇرەسۋگە رەسپۋبليكالىق بيۋدجەتتەن شامامەن 2 ميلليارد تەڭگە قاراستىرىلعان. بۇل قاراجاتقا جەتكىلىكتى پەستيتسيدتەر مەن حيميالىق وڭدەۋ قىزمەتتەرى ساتىپ الىندى.
سونىمەن قاتار, ورتالىق قويمادا قوسىمشا پەستيتسيدتەردىڭ قاجەتتى قورى بار.
وڭدەۋ جۇمىستارىنا183 بىرلىك ارنايى تەحنيكا (150 بىرلىك جەر ءۇستى بۇرىككىشتەرى, 12 ۇشاق, 13 بىرلىك اسا جەڭىل اۋەكەمەلەرى جانە 8 بىرلىك اەروزولدى گاز گەنەراتورلارى) تارتۋ جوسپارلانۋدا.
وڭىرلەردە حيميالىق وڭدەۋ شەگىرتكە زيانكەستەرىنىڭ تارالۋ وشاقتارى انىقتالۋىنا قاراي باستالاتىن بولادى. بۇل ءۇشىن قر اشم اگروونەركاسىپتىك كەشەندەگى مەملەكەتتىك ينسپەكتسيا كوميتەتى وبلىستىق اكىمدىكتەرمەن بىرلەسىپ مونيتورينگ جانە حيميالىق وڭدەۋ جۇمىستارىنىڭ جوسپارىن بەكىتتى.
