كوللاجدى جاساعان زاۋرەش سماعۇل, «EQ»
«نازارداعى باستى ماسەلە, بۇل – ادامداردىڭ دەنساۋلىعى. ءبىز دەنساۋلىق ساقتاۋ مينيسترلىگىمەن كەلىسىپ, كلينيكالىق زەرتتەۋلەردىڭ ءۇشىنشى كەزەڭىندە ۆاكتسينانىڭ اسەرىن تولىعىراق زەرتتەۋ ءۇشىن وسىنداي تاكتيكانى قولداندىق. قازىرگى ۋاقىتتا ۆاكتسينا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىندا ءبىلىم جانە عىلىم مينيسترلىگى ساتىپ العان قۇرال-جابدىقتارمەن ءوندىرىلىپ جاتىر. بۇل – بىرەگەي قۇرىلعى. ەگەر مۇنداي قۇرىلعى قولدا بولماعاندا, ءبىز بۇگىنگىدەي تاماشا ناتيجە كورسەتە الماس ەدىك», دەدى ءبىلىم جانە عىلىم مينيسترلىگى عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا.
قازاقستاندىق عالىمدار وتاندىق ۆاكتسينانى 2020 جىلدىڭ 9 مامىرىندا ازىرلەگەنىن ايتا كەتكەن ءجون. ول قاۋىپسىز تەحنولوگيا بويىنشا يممۋنوستيمۋلياتور قوسۋ ارقىلى ولتىرىلگەن ۆيرۋستان جاسالدى.
2020 جىلدىڭ 17 قىركۇيەگىندە 44 ەرىكتىنىڭ قاتىسۋىمەن كلينيكالىق زەرتتەۋلەردىڭ I كەزەڭى باستالدى. ۆاكتسينا قاۋىپسىز ەكەنىن كورسەتتى. ەرىكتىلەردىڭ جاعدايى قالىپتى بولدى. 17 قازاندا كلينيكالىق زەرتتەۋلەردىڭ II كەزەڭى باستالدى. وعان 200 ۆولونتەر قاتىستى. زەرتتەۋ ناتيجەلەرى بويىنشا ۆاكتسينا جوعارى يممۋنوگەندىلىك پەن تيىمدىلىگىن كورسەتتى.
بىلتىر 19 جەلتوقساندا دەنساۋلىق ساقتاۋ مينيسترلىگى كلينيكالىق سىناقتاردىڭ قورىتىندى III فازاسىن جۇرگىزۋگە رۇقسات بەردى. 3 مىڭ ادام ەرىكتى بولىپ, QazVac برەندىمەن QazCovid-in ۆاكتسيناسى ەگىلدى. ۆاكتسينا ەرىكتىلەرگە اراسىنا 21 كۇن سالىپ, 2 مارتە ەگىلدى. ناتيجەسىندە, ولاردىڭ قانىندا قاجەتتى قورعانىس انتيدەنەلەرى پايدا بولدى. ەرىكتىلەردىڭ جاعدايى جاقسى, شاعىمدارى بولعان جوق. ءبىلىم جانە عىلىم مينيسترلىگى ءباسپاسوز قىزمەتىنىڭ حابارلاۋىنشا, 2021 جىلعى ءساۋىر ايىنىڭ سوڭىندا كلينيكالىق زەرتتەۋلەردىڭ III فازاسىنىڭ ارالىق ناتيجەلەرى بەلگىلى بولادى. سودان كەيىن وتاندىق ۆاكتسينا جاپپاي پايدالانۋعا جىبەرىلەدى.
