كارانتين شارالارىن بۇزعانى ءۇشىن بيزنەس سۋبەكتىلەرى مەن جەكە تۇلعالارعا جالپى سوماسى 170 ملن تەڭگەدەن اساتىن ايىپپۇل سالىندى
جىل باسىنان بەرى مونيتورينگتىك توپتار 12,5 مىڭعا جۋىق نىساندى تەكسەردى, كارانتيندىك شارالار بۇزىلعان 1426 نىسان انىقتالعان. زاڭدى جانە جەكە تۇلعالارعا جالپى سوماسى 172 ملن تەڭگەگە 2438 حاتتاما تولتىرىلدى. 28 قاساقانا قاۋلى بۇزۋشىعا قاتىستى سوت قىزمەتىن توقتاتۋ تۋرالى شەشىم قابىلداندى.
جۇقتىرۋ وقيعالارىنىڭ كوبەيگەنىنە, سونىمەن بىرگە مۋتاتسيالانعان بريتاندىق جانە وڭتۇستىك افريكالىق كۆي شتامدارىنىڭ تارالۋىنا قاراماستان, قالا تۇرعىندارى مەن كاسىپكەرلىك سۋبەكتىلەرى كەلۋشىلەر مەن قىزمەتكەرلەردىڭ ومىرلەرىنە قاۋىپ توندىرە وتىرىپ, ەپيدەميولوگتاردىڭ تالاپتارىن بۇزۋدى جالعاستىرۋدا.
مىسالى, الماتى مەدەۋ اۋدانىنىڭ مونيتورينگتىك توبى ءساۋىردىڭ 2-نەن 3-نە قاراعان ءتۇنى نازارباەۆ داڭعىلى, 226 مەكەن – جايى بويىنشا Bakard تۇنگى مەكەمەسىنە (بۇرىن Kowloon دەگەن اتپەن بەلگىلى), زەنكوۆ كوشەسى, 13 مەكەن-جايى بويىنشا Persona تۇنگى كلۋبىنا (بۇرىن «Cيني FunToMass» دەگەن اتپەن بەلگىلى) جانە قارمىسوۆ كوشەسى, 84ا مەكەن-جايى بويىنشا «تارحۋن» كافەسىنە كەلگەندەردى شىعاردى. مونيتورينگتىك توپ كەلگەن كەزدە ءبىرىنشى مەكەمەدە شامامەن 50 ادام بولعان, ەكىنشىسىندە – 40 ادام.
المالى اۋدانىندا 2-نەن 3-ساۋىرگە قاراعان ءتۇنى مونيتورينگتىك توپ «گوگول» تۇنگى مەكەمەسىندە 100 - دەن استام كەلۋشىلەردى انىقتادى; «لوليتا» مەيرامحاناسىندا مونيتورينگتىك توپ كەلگەن ساتتە مەكەمەدە 50 ادام بولعان.
بۇل نىساندار قالانىڭ باس مەملەكەتتىك سانيتار دارىگەرىنىڭ قاۋلىسىن بۇزا وتىرىپ جۇمىس ىستەگەن. جۇمىس رەجيمىن بۇزۋمەن قاتار, ادامداردىڭ كوپ جينالۋىنا تىيىم سالۋ, بەتپەردە رەجيمى, الەۋمەتتىك قاشىقتىق سياقتى ەپيدەميولوگيالىق تالاپتاردىڭ ساقتالماۋى تىركەلدى. زاڭدى جانە جەكە تۇلعالارعا اكىمشىلىك بۇزۋشىلىق جانە ايىپپۇل سالۋ تۋرالى حاتتامالار تولتىرىلدى.
ەستەرىڭىزگە سالا كەتەيىك, قالادا كۇشەيتىلگەن شەكتەۋ شارالارى قولدانىلۋدا. كوپشىلىك ءىس-شارالارعا, سونداي-اق بىرقاتار كاسىپكەرلىك سۋبەكتىلەرىنىڭ, اسىرەسە ويىن-ساۋىق مەكەمەلەرىنىڭ جۇمىسىنا تىيىم سالىنعان.
تىيىم سالىنعانىنا قاراماستان, مەيرامحانالارعا, كلۋبتار مەن دامحانالارعا بارۋدى توقتاتپاعان الماتىلىقتاردى ەپيدەميولوگتار كەلۋشىلەر اراسىندا كوروناۆيرۋستىق ينفەكتسيانىڭ تاسىمالداۋشىلارى بولۋى مۇمكىن ەكەنىن ەسكەرتەدى. الماتى اكىمدىگى قالانىڭ باس مەملەكەتتىك سانيتار دارىگەرىنىڭ تالاپتارىن - بەتپەردە كيۋدى, كارانتين رەجيمىنىڭ جەڭىلدەگەنىنە قاراماستان, حالىقتىڭ كوپ جينالۋى جانە جۇقتىرۋ قاۋپى جوعارى ويىن-ساۋىق مەكەمەلەرىنە بارۋدان باس تارتۋدى ۇسىنادى.
